Հայաստանը մարդասիրական օգնություն կուղարկի Լիբանան
Հայաստանը հատուկ չվերթով մարդասիրական օգնություն կուղարկի Լիբանան։ Դեղորայքով, բուժսարքավորումներով և պարենով բեռնված ինքնաթիռը Երևանից Բեյրութ կուղևորվի օգոստոսի 8–ին։
Այս օգնությունը նախատեսված է «Լիբանանի եղբայրական ժողովրդի համար», ֆեյսբուքյան իր էջում գրել է Հայաստանի վարչապետի մամուլի խոսնակ Մանե Գևորգյանը։
Լիբանանի հայ համայնքը ֆինանսական օգնություն կստանա։
Բեյրութում ամոնիումի նիտրատի հզոր պայթյունի հետևանքով օգոստոսի 6–ի առավոտյան ստացված տվյալներով հայտնի է զոհված 11 հայերի մասին։
Ընդհանուր առմամբ, Լիբանանում զոհվել է ավելի քան 100 մարդ։ Օգոստոսի 4–ից երկրում եռօրյա սուգ է հայտարարվել։
● 2010-2019 թթ–ը լուսանկարներով․ ինչպիսի՞ն էր 21–րդ դարի երկրորդ տասնամյակը
● Միլիոնավոր մարդիկ են փողոցում ցույց անում միանգամից մի քանի երկրներում․ժամանակացույց և ֆոտոռեպորտաժ
Օգնություն կառավարությունից
Հայաստանի վարչապետն օգնություն է առաջարկել Լիբանանին։ Պետությունների ղեկավարները հեռախոսազրույցի ժամանակ քննարկել են, թե, առաջին հերթին, ինչ է անհրաժեշտ։ Նիկոլ Փաշինյանը հաղորդել է, որ Լիբանանի իշխանությունները դեռևս «պարզում են, թե ինչ է անհրաժեշտ, և արդյունքներն ամփոփելուց հետո Հայաստանի կառավարությունը համապատասխան որոշում կկայացնի»։
Վարչապետի մամուլի խոսնակ Մանե Գևորգյանը ֆեյսբուքյան իր էջում գրել է նաև, որ «կառավարությունն՝ արտաքին գործերի նախարարության և Սփյուռքի գործերի գլխավոր հանձնակատարի գրասենյակի միջոցով մշտական կապի մեջ է Լիբանանի կառավարության և համայնքային կառույցների ղեկավարների հետ՝ մեր երկրի կողմից եղբայրական Լիբանանին օգնություն ցուցաբերելու նպատակով»։
Կառավարությունն օգնություն կհասցնի Բեյրութ և հայկական համայնքի համար։
Մարդասիրական օգնություն տեղափոխող ինքնաթիռով Բեյրութ կմեկնի նաև սփյուռքի գործերի գլխավոր հանձնակատար Զարեհ Սինանյանը։ Նա տեղում կծանոթանա իրավիճակին՝ որոշելու համար, թե էլ ինչպես կարելի է օգնել մարդկանց։
«Հայաստան» համահայկական հիմնադրամը Կենտրոնական բանկում հատուկ հաշվեհամար է բացել, և հիմնադրամի կայքում միջոցների առցանց հավաքագրման հնարավորություն ստեղծել։ Հայաստանի բոլոր բնակիչները, որոնք ուզում են օգնել լիբանանցիներին, կարող են գումար փոխանցել այդ հաշվեհամարին։
Օգնություն գործարարներից
Բեյրութին օգնություն կտրամադրեն նաև հայ գործարարները։
Մասնավորպես, Հայաստանի խոշոր գործարարներներից մեկի՝ Գագիկ Ծառուկյանի բարեգործական հիմնդրամը 100 մլն դրամ է տրամադրել զոհված հայերի ընտանիքներին և Անթիլիասում Սուրբ Գրիգոր Լուսավորիչ հայկական վնասված եկեղեցու վերականգնման համար։
Օգնություն կցուցաբերի նաև ռուսաստանաբնակ հայ գործարար Սամվել Կարապետյանը։ Նրա բարեգործական հիմնադրամը զոհված հայերի ընտանիքներին 10 հազարական դոլար կտրամադրի և 200 հազար դոլար՝ Բեյրութի Սուրբ Գևորգ հայկական եկեղեցու վերականգնմանը։
Լիբանանի հայ համայնքի մասին
Լիբանանում մոտ 150 հազար հայ է ապրում։ Լիբանանի համայնքն ամենաբազմամարդը չէ, սակայն ամենաակտիվներից մեկն է համարվում։
Ինչպես հաղորդել է Քուվեյթի հայկական թեմի առաջնորդ, վարդապետ Պետրոս Մանվելյանը, պայթյունը տեղի է ունեցել Բեյրութի հայկական թաղամասի մերձակայքում։ Իրավիճակն այնտեղ, ըստ նրա, աղետալի է․
«Արդեն 8 ամիս է, ինչ մեր երկիրը փորձում է հաղթահարել տնտեսական խնդիրները, որոնց գումարվել է կորոնավիրուսի հետ կապված իրավիճակը, հիվանդանոցներում տեղ չկա, հիմա էլ այս պայթյունները»։
Ըստ հոգևորականի՝ տուժել են տեղի հայերի տներն ու խանութները։ Լրջորեն վնասվել է Բեյրութի հայկական եկեղեցին և Անթիլիասի կաթողիկոսարանի գլխավոր տաճարը (այստեղ է գտնում Մեծի Տանն Կիլիկիո կաթողիկոսի նստավայրը)։
