Հայաստան ապօրինի ներկրվել է ադրբեջանական խնձոր, հարուցվել է քրեական գործ

Հայաստանի շուկաներում հայտնված ադրբեջանական խնձորը ներկրվել է ապօրինի. դեպքերի առթիվ հարուցվել է քրեական գործ: Այս մասին հայտնում է ՀՀ պետական եկամուտների կոմիտեն (ՊԵԿ):

Օրեր առաջ սոցիալական կայքերում աղմուկ էր բարձրացրել, որ Երևանի խանութներում վաճառվում են ադրբեջանական մակնշմամբ կանաչ խնձորներ: Հրապարակվել էին լուսանկարներ, որոնցից պարզ էր, որ ադրբեջանական ստվարաթղթե արկղերի մեջ պահվող խնձորը աճեցվել է մերձկասպյան այգիներում և էկոլոգիապես մաքուր է:

Բայց բնակչությունն անհանգստացած էր, կարծիքներ էին շրջանառվում, որ ադրբեջանական խնձորները կարող են թունավոր լինել: Մասնագետները հորդորում էին նախ պարզել, թե ո՞վ է անօրինական ճանապարհով բերել դրանք Հայաստան:

Սննդամթերքի անվտանգության պետական ծառայությունը (ՍԱՊԾ) վերջապես ուսումնասիրեց շուկան ու հաստատեց, որ ադրբեջանական ծագման խնձոր հայստանյան շուկաներում իսկապես վաճառվում է:

Միաժամանակ, ՍԱՊԾ-ից հայտարարեցին, որ ադրբեջանական խնձորների ներկրողը հայտնի չէ, և բնակչությանը կոչ արեցին չգնել դրանք:

Պետական եկամուտների կոմիտեն էլ արդեն պարզել է, որ խնձորը Հայաստան է ներկրվել ապօրինի ձեռնարկատիրությամբ զբաղվող անձանց կողմից, ովքեր  պարբերաբար հատել են Վրաստան-Հայաստան սահմանը առևտուր իրականացնելու համար: Ավելին, ըստ ՊԵԿ-ի, նրանք սահմանային անցակետի Բագրատաշենի մաքսակետի որոշ աշխատակիցների կաշառք են տվել, որպեսզի կարողանան խնձորները ներկրել հանրապետություն:

Մանրամասները պարզելու համար գործը փոխանցվել է ՀՀ գլխավոր դատախազությանը: