Հայաստան. Ազգային ժողովի շենքում պատգամավորներից մեկը գտել է Լենինի արձանը
Ազգային ժողովի շենքում պատգամավորներից մեկը գտել է Խորհրդային ղեկավար Վլադիմիր Լենինի արձանը: Ընդդիմադիր «Ելք» խմբակցության պատգամավոր Նիկոլ Փաշինյանը ֆեյսբուքյան իր էջում հրապարակել է խորհրդարանի սենյակներից մեկում իր հայնաբերած արձանի լուսանկարը:
«Հենց նոր տեսա Ազգային ժողովում: Երևի բերել են, որ ապրիլին մտցնեն Ազգային ժողովի դահլիճ: Վերջին բոլշևիկի նախընտրական արշավի մեկնարկը»,— մեկնաբանել է իր լուսանկարը Նիկոլ Փաշինյանը:
Ազգային ժողովի հասարակայնության հետ կապերի վարչության պետ Արսեն Բաբայանն ասել է, որ արձանը Ազգային ժողովի շենքում է գտնվում խորհրդային տարիներից ի վեր:
«Ուղղակի հիմա որոշվել է տանել այնպիսի տեղ, որտեղ պահպանում են չօգտագործվող իրերը»,- ասել է նա:
Ըստ նրա՝ Լենինի արձանի ճակատագիրը կլուծվի, երբ «աշխատակազմը կցանկանա դրան անդրադառնալ»:
