Հայաստանում քրեական գործ է հարուցվել ընտրությունների օրը լրագրողների վրա հարձակման փաստի առթիվ

Հայաստանի գլխավոր դատախազությունը քրեական գործ է հարուցել «խորհրդարանական ընտրություններին լրագրողական գործունեությանը խոչընդոտելու կապակցությամբ»: Լրագրողների վրա հարձակվել են, երբ նրանք բացահայտել են ընտրողներին կաշառելու փաստը:

Միջադեպը տեղի է ունեցել Երևանի Կոնդ թաղամասում իշխող Հանրապետական կուսակցության թեկնածու Հակոբ Բեգլարյանի շտաբի մոտ:

Ազատություն ռադիոկայանի լրագրող Սիսակ Գաբրիելյանն ու Araratnews.am տեղեկատվական կայքի լրագրող Շողիկ Գալստյանը տեսել են, թե ինչպես են ընտրողներն ընտրատարածք գնալուց առաջ մտնում թեկնածու Բեգլարյանի շտաբ և այնտեղից փողով դուրս գալիս:

Սիսակ Գաբրիելյանն ինքն է մտել շտաբ: Շտաբի անդամները, լրագրողներին տեսնելով, հայտարարել են, որ «ընտրակաշառք չեն բաժանում, այլ աշխատավարձ, և նա լավ կանի լքի տարածքը»: Վեճի ընթացքում լրագրողի վրա երիտասարդներ են հարձակվել՝ խլելով հեռախոսը: Այնուհետև ծեծկռտուք է սկսվել, որի ընթացքում Սիսակ Գաբրիելյանն աչքի շրջանում թեթև վնասվածք է ստացել:

Շողիկ Գալստյանը նկարահանում էր տեղի ունեցածը շտաբի դրսի կողմից: Տեղացիները խլել են նրա հեռախոսը, վիրավորել և նրան այդտեղից հեռացրել՝ թույլ չտալով տեսանկարահանում իրականացնել:

Քրեական գործերը հարուցվել են ՀՀ ՔՕ 149-րդ հոդվածի 3 և 52 մասի համաձայն (ընտրական իրավունքի իրականացման, ընտրական հանձնաժողովների աշխատանքի կամ ընտրություններին մասնակցող անձի իրավասությունների իրականացման խոչընդոտում մի խումբ անձանց կողմից բռնի ուժի կիրառմամբ կամ դրա կիրառման սպառնալիքով):

Ընդհանուր առմամբ այսօրվա դրությամբ Հայաստանում 9 քրեական գործ է հարուցվել քվեարկության օրը կատարված խախտումների վերաբերյալ: Հիմնականում, դրանք հարուցվել են կրկնակի ընտրելու կամ մեկ այլ մարդու փոխարեն քվեարկելու փորձերի կապակցությամբ: