Հայաստանում սուր շնչառական վարակներ են տարածվել

Ինչպես տեղեկացնում են ՀՀ առողջապահության նախարարությունից, վերջին երկու շաբաթվա ընթացքում դիտվում է սուր շնչառական վարակների աշխուժացում՝ պայմանավորված գրիպի Ա և Բ տեսակների տարածմամբ:

Հիվանդների մոտ նկատվում են բարձր ջերմություն, մարմնի ջարդվածության զգացողություն, գլխացավեր:

Հիվանդությունների ակտիվացումը բացատրվում է ձմեռվա վերջին վիտամինների պաշարի պակասով, ինչը թուլացնում է իմունային համակարգը:

Գրիպից և դրա բարդություններից խուսափելու նպատակով բժիշկները խորհուրդ են տալիս խուսափել գրիպանման երևույթներով հիվանդների հետ շփումից, չզբաղվել ինքնաբուժումով, առանց բժշկի ցուցումի չօգտագործել հակաբիոտիկներ, քանի որ դրանք ցուցված չեն գրիպի բուժման համար, հագնվել եղանակին համահունչ, հետևել անձնական հիգիենային՝ հաճախակի լվանալով ձեռքերը տաք ջրով և օճառով, ինչպես նաև օգտագործել միայն մեկանգամյա օգտագործման անձեռոցիկներ: