Հայաստանում չեն ուզում կորոնավիրուսի դեմ պատվաստվել։ Նախարարներն օրինակ կծառայեն

Հայաստանում արդեն ավելի քան երկու շաբաթ է կորոնավիրուսային վարակի դեմ քաղաքացիների պատվաստում է ընթանում։ Սակայն, ինչպես պարզվել է, պատվաստման տեմպերը շատ դանդաղ են, դեռևս պատվաստվել է ընդամենը 2 690 մարդ։

Վարչապետի պաշտոնակատար Նիկոլ Փաշինյանը հայտարարել է, որ դա «խայտառակ ցածր ցուցանիշ է» և կառավարության անդամներին պարտավորեցրել է մեկ շաբաթում կորոնվիրուսի դեմ պատվաստումներ կատարել։

Պատվաստման տեմպերն արագացնելու համար նախօրեին AstraZeneca-ով պատվաստվել են փոխվարչապետի պաշտոնակատար Տիգրան Ավինյանն ու առողջապահության նախարարի պաշտոնակատար Անահիտ Ավանեսյանը։

Ավելի վաղ հաղորդվում էր 700 հազար մարդ պատվաստելու առողջապահության նախարարության մտադրության մասին։

Այսօրվա դրությամբ Հայաստանն ունի անգլաշվեդական AstraZeneca և ռուսական «Սպուտնիկ V» պատվաստանյութերը, հաղորդվում է նաև չինական արտադրության պատվաստանյութ ներկրելու պլանների մասին։

Հայաստանում կորոնավիրուսով վարակման առաջին դեպքը գրացվել է 2020 թ․ մարտի 1-ին։ 2020 թ․ մարտի 16-ից մինչև սեպտեմբերի 11-ն արտակարգ դրության ռեժիմ էր գործում։ Այնուհետև կարանտին սահմանվեց, որը կշարունակվի մինչև 2021 թ․ հուլիսի 11-ը։ Վերջին մեկ օրում գրանցվել է վարակման 656 նոր դեպք։ Վարակվածների ընդհանուր թիվը երկրում հասել է 215 528-ի, ապաքինվել է 197 171 մարդ, մահացել՝ 4 087-ը։

• Հայաստանում սկսվում է կորոնավիրուսի դեմ պատվաստումը, պատվաստանյութերը բաշխվում են հիվանդանոցների միջև
• Կորոնավիրուս․ դրա մասին միֆերը տարածվում են համավարակից արագ

Պատվաստվածները կկարողանան մեկնել առանց թեստի

«Հաջորդ շաբաթ փոփոխություններ կկատարվեն կարանտինի կարգում։ Պատվաստվածներն այլևս ՊՇՌ թեստեր չեն հանձնի երկրից դուրս գալու համար։ Սա վերաբերում է միայն մեր քաղաքացիներին։ Սա կարևոր քայլ է սահմանափակումների հաղթահարման և նորմալ կյանքի վերադառնալու համար», — հայտարարել է Անահիտ Ավանեսյանն ապրիլի 29-ի ճեպազրույցի ժամանակ։

Այժմ, առողջապահության նախարարի պաշտոնակատարի խոսքով, 18 տարեկանից բարձր քաղաքացիները կարող են պատվաստվել AstraZeneca պատվաստանյութով։ Սպասվում են ինչպես այդ, այնպես էլ «Սպուտնիկ V»-ի նոր խմբաքանակներ։

Ըստ բժիշկների՝ երկրի բնակիչները մեծ հետաքրքրություն են ցուցաբերում ռուսական «Սպուտնիկ V» պատվաստանյութի նկատմամբ։ Սակայն այն հասանելի է դեռևս միայն ռիսկի խմբի քաղաքացիների համար։

«Բոլոր պատվաստանյութերը, որոնք կան Հայաստանում, 100%-ով պաշտպանում են հիվանդության ծանր և ծայրահեղ ծանր ընթացքից։ Սա շատ կարևոր է, քանի որ չորս հազար մահվան դեպքերը սարսափելի են: Եթե դրա դեմ պայքարելու հնարավորություն կա, ապա պետք է քայլեր ձեռնարկել, և պետք չէ մանիպուլյացիաների ենթարկվել», — հայտարարել է Անահիտ Ավանեսյանը։

«Եկեք մեզնից սկսենք»․ վարչապետի պաշտոնակատար

Հայաստանի կառավարության անդամներն ու պետական կառույցների աշխատակիցները պետք է անպայման պատվաստվեն։ Այս մասին Նիկոլ Փաշինյանը հայտարարել է կառավարության նիստին․

«Եկեք մեզնից սկսենք։ Մենք բոլորս պետք է պատվաստվենք։ Այս պահին Հայաստանում պատվաստված է ընդամենը 2690 մարդ, սա խայտառակ ցածր ցուցանիշ է։ Այսօր աշխարհում պատվաստված քաղաքացիների թիվը երկրի որակի նշան է՝ բոլոր առումներով՝ տնտեսական, քաղաքական, քաղաքակրթական»։

Նրա խոսքով՝ եթե իշխանությունը խոսում է այն մասին, որ 18 տարեկանից բարձր բոլոր քաղաքացիները կարող են պատվաստվել, անհրաժեշտ է իրենից սկսել, այնուհետև պատվաստել պետական գերատեսչությունների բոլոր աշխատակիցներին․

«Պետական մարմիններում մենք պետք է առաջատար լինենք, որպեսզի բոլորը տեսնեն, մենք պատվաստվել ենք և շարունակում ենք ապրել»։

Փաշինյանը հիշեցրել է, որ պատվաստումն անհրաժեշտ է Հայաստանի քաղաքացիներին ինչպես երկրից անխափան մեկնելու, այնպես էլ երկիր այցելել ցանկացող զբոսաշրջիկների թվի ավելացման համար․

«Եթե այստեղ ոչ ոք չպատվաստվի, երկիրը ռիսկային է համարվելու, և ոչ ոք այստեղ չի գալու»։

Կառավարության պատվաստված անդամներ

Առողջապահության նախարարի պաշտոնակատար Անահիտ Ավանեսյանն ու փոխվարչապետի պաշտոնակատար Տիգրան Ավինյանը կորոնավիրուսի դեմ պատվաստվել են բրիտանաշվեդական AstraZeneca պատվաստանյութով։

Փոխվարչապետի պաշտոնակատար Տիգրան Ավինյանը նշել է, որ AstraZeneca-ի ընտրությունը պատահական չի եղել․ հատկապես հենց այս պատվաստանյութի մասին են այնպիսի լուրեր տարածվում, որոնք մարդկանց մոտ մտավախություններ են առաջացնում․

«Մենք հատուկ ենք ընտրել AstraZeneca-ն, որովհետև երևի թե ամենաշատը հենց տվյալ պատվաստանյութի մասին են սուտ լուրերը տարածվում: Որքանով որ ինձ է հայտնի, մոտավորապես 200 միլիոն դեպքից վատ դեպքեր եղել են ընդամենը մի քանի տասնյակ: Այժմ արագորեն ասեկոսեներ են տարածվում պատվաստանյութի մասին, մենք էլ որոշել ենք մեր օրինակով ցույց տալ, որ այն որակյալ է»։

Առողջապահության նախարարության ղեկավարը նույնպես անդրադարձել է այս թեմային․

«Մեր քաղաքացիները վստահում են «Սպուտնիկ V» պատվաստանյութին, իսկ AstraZeneca-ի վերաբերյալ նրանց մոտ հարցեր են առաջանում։ Անկեղծ ասած, ի սկզբանե մենք չէինք էլ ուզում ասել, թե ինչ պատվաստանյութ ենք ընտրել, քանի որ դրանք բոլորը շատ որակյալ և արդյունավետ են»։

Նա նաև կառավարության անդամներին կոչ է արել իրենց օրինակով ցույց տալ, որ պատվաստումը կարևոր քայլ է, իսկ երկրի քաղաքացիներին՝ հետևել նրանց օրինակին․

«Պատվաստանյութի կողմնակի ազդեցության թեկուզ չնչին հավանականությունը գրեթե զրոյի է հավասար, եթե համեմատենք կորոնավիրուսով վարակման և օրգանիզմին հասցրած ծանր հետևանքների ու մահվան ելքի հետ»։