Հայաստանում շարունակում է աճել կորոնավիրուսով վարակվածների թիվը, արդեն 28 հիվանդ կա

Թարմացում

22:15

Եվս երկու մարդու մոտ հաստատվեց կորոնավիրուսի առկայությունը։ Այս պահին ճշտվում է նրանց շփման շրջանակը՝ շտապ մեկուսացնելու նպատակով:

Հաստատված դեպքերի թիվը  մարտի 15-ին հասավ 28-ի:

Նաև հայտարարվում է այն մասին, որ առաջին պացիենտը, ում մոտ կորոնավիրուս էր ախտորոշվել, արդեն առողջ է՝ երկրորդ թեստը բացասական է, նա արդեն կարող է հիվանդանոցից տուն վերդառնալ:

20:30

Հայաստանում հաստատվել է կորոնավիրուսի ևս 3 դեպք։ Մինչ այդ հաղորդված երեք դեպքի հետ միասին այսօր, մարտի 15-ին գրանցվեց արդեն 6 նոր դեպք, հիվանդների ընդհանուր թիվը հասավ 26-ի:

«Ունենք ևս 3 հաստատված դեպք, որից 2-ը փոխկապակցված են «Էջմիածնի» դեպքի հետ և ի սկզբանե մեկուսացված են եղել: Մյուս դեպքը արձանագրվել է Մեղրի քաղաքում` Իտալիայից վերջերս վերադարձած մեր քաղաքացու մոտ», — գրել է իր ֆեյսբուքյան էջում առողջապահության նախարար Արսեն Թորոսյանը:

Նոր դեպքի հետ սերտ շփում ունեցողները այս պահին ճշտվում և մեկուսացվում են:

18:00

Մարտի 15–ին կորոնավիրուսով վարակվածների թիվը Հայաստանում հասել է 23–ի։

Բոլոր երեքը, ում մոտ հաստատվել է հիվանդությունը, շփվել են նույն կնոջ հետ, որն Իտալիայից էր վարակված վերադարձել Էջմիածին, և նրանք արդեն մեկուսացված էին։

Բանն այն է, որ վարակված կինը, չնայած ջերմությանն ու հիվանդության մյուս ախտանիշների առկայությանը, չէր մեկուսացել։ Տասն օր շարունակ՝ նախքան նրա մոտ վարակի հաստատումը, նա մի շարք մարդաշատ միջոցառումներ էր այցելել, այդ թվում՝ նշանադրության արարողություն։ Մի քանի տասնյակ հյուրեր, որոնք հրավիրված են եղել տոնակատարությանը, կարանտինի մեջ են, ոմանք վարակվել են։

Վարակվածների թվում, որոնց մասին հայտնի է դարձել մարտի 14–ին, դպրոցական կա։ Նա արդեն բուժում է ստանում հիվանդանոցոմ, մեկուսացված են նրա հետ շփում ունեցած համադասարանցիներն ու ուսուցիչները։

• Հայաստանում կորոնավիրուսով արդեն 20 հիվանդ կա։ Ինքնամեկուսացվել և կորոնավիրուսի թեստ են հանձնել վարչապետն ու նրա տիկինը

• Կորոնավիրուսը Հայաստանում դուրս է գալիս մայրաքաղաքի սահմաններից

• Ամեն ինչ՝ կորոնավիրուսի մասին

• Կորոնավիրուս․ պանդեմիա է հայտարարվել։ Ի՞նչ է դա նշանակում, և ի՞նչ սպասել

Մանրամասներ՝ նոր դեպքերի մասին

Նոր վարակվածների մասին ֆեյսբուքյան իր էջում մանրամասներ է հաղորդել առողջապահության նախարարը։

Արսեն Թորոսյանը գրել է, որ ստացվել են ևս 52 անցկացված թեստերի արդյունքները, 49–ը բացասական է եղել, երեքը՝ դրական։ Վարակման վերջին բոլոր դեպքերը, որոնք հայտնաբերվել են մարտի 14-ին և 15-ին, այն անձինք են, որոնք շփվել են Էջմիածնի՝ Իտալիայից ժամանած բնակչի հետ և արդեն մեկուսացվել էին։ Այդ առնչությամբ բժիշկները կարծում են, որ իրավիճակը երկրում դեռևս վերահսկողության տակ է։

Նախարարը հաղորդել է նաև, որ մարտի 15–ի երեկոյան արդեն հայտնի կլինեն Հայաստանում կորոնավիրուսով առաջին վարակվածի կրկնակի թեստի արդյունքները։ Եթե դրանք բացասական լինեն, նա հիվանդանոցից դուրս կգրվի։

«21 հիվանդի, այդ թվում՝ երեխայի առողջական վիճակը բավարար է։ Մյուս երկու հիվանդների մոտ թոքաբորբ է, նրանց կյանքին նույնպես վտանգ չի սպառնում», — հաղորդել է Արսեն Թորոսյանը։