Հայաստանում կրկին փակվում են ուսումնական հաստատություններն․ ավելացել է վարակվածների թիվը

Կորոնավիրուսի պատճառով Հայաստանի բոլոր մանկապարտեզները և ուսումնական հաստատությունները փակվում են՝ դեռևս մինչև մարտի 23–ը։ Այս մասին ֆեյսբուքյան իր էջում մարտի 13–ին հայտնել է վարչապետ Նիկոլ Փաշինյանը։

Այս որոշումը կայացվել է այն բանից հետո, երբ կորոնավիրուս է հաստատվել ևս հինգ անձի մոտ։ Մինչև մարտի 12–ը Հայաստանում միայն մեկ վարակված կար, որը հայրենիք էր վերադարձել Իրանից։

• Կորոնավիրուս․ պանդեմիա է հայտարարվել։ Ի՞նչ է դա նշանակում, և ի՞նչ սպասել

• Կորոնավիրուսի բռնկում․ խուճապի վաճառականների աստեղային ժամը

• Կորոնավիրուս․ այլևս ոչ մի գրկախառնություն, ողջույններ՝ միայն արմունկներով և կոշիկներով։ ՏԵՍԱՆՅՈՒԹ

Ինչի՞ց ամեն ինչ սկսվեց

Վարակման առաջին դեպքի մասին հայտնի դարձավ մարտի 1–ին։ Հայաստանի 29-ամյա քաղաքացին հատուկ չվերթով Իրանից էր վերադարձել։ Այդ երկրի հետ սահմանը փակվել էր փետրվարի 23–ին, սակայն Իրանի և Հայաստանի քաղաքացիների համար գործում էին հատուկ չվերթներ, որոնք թույլ էին տալիս նրանց հայրենիք վերադառնալ։

Տասն օր շարունակ նա կորոնավիրուսով միակ հիվանդն էր։ Նրա հետ շփված բոլոր անձինք մեկուսացվել են։ Բոլորն, այդ թվում՝ վարակվածն, իրենց լավ էին զգում։ Այդպիսով, Հայաստանում խուճապ չէր նկատվում։

Իրավիճակը փոխվեց մարտի 11–ին, երբ տեղեկություններ հայտնվեցին  վարակման միանգամից երեք նոր դեպքի մասին։  Վարակվածներից մեկը մայրաքաղաքից մոտ 20 կմ հեռավորության վրա գտնվող Էջմիածին քաղաքի բնակիչ է։

Սոցցանցերում լուրեր էին պտտվում, որ նա Հայաստան է եկել 10 օր առաջ, և այդ ընթացքում հասցրել է մի շարք տոնական միջոցառումների մասնակցել, այդ թվում՝ նշանադրության արարողության, որտեղ շատ հյուրեր են եղել։

Մարտի 12–ի երեկոյան արդեն հայտնի դարձավ վարակման ևս երկու դեպքերի մասին։ Իսկ մարտի 13-ին առողջապահության նախարար Արսեն Թորոսյանը ուղիղ եթերի ընթացքում տեղեկացրել է, որ կորոնավիրուս է հայտնաբերվել ևս երկու քաղաքացու մոտ, որոնք մեկուսացված են:

Այժմ Հայաստանում ութ վարակված կա։

Կառավարության գործողությունները

Վարչապետն ընդհատեց իր արձակուրդը։ Մարտի 13–ին Նիկոլ Փաշինյանը հայտարարեց, որ Հայաստանի բոլոր մանկապարտեզները և ուսումնական հաստատությունները կփակվեն նվազագույնը մինչև մարտի 23–ը։

«Մարտի 18-19-ին մենք կրկին կանդրադառնանք այս թեմային։ Եթե անհրաժեշտություն լինի, ապա կրկին կերկարաձգենք [կարանտինը]», — ասել է Փաշինյանն իր ֆեյսբուքյան էջում ուղիղ միացման ժամանակ։

Վարչապետը կոչ է արել քաղաքացիական պատասխանատվություն դրսևորել և հնարավորինս չմասնակել զանգվածային միջոցառումների, որոնք մարդկանց մեծ կուտակումներ են ենթադրում։

«Կորոնավիրուսի բռնկման կանխարգելման հանձնաժողովն աշխատում է օպերատիվ ռեժիմով և հետևում իրավիճակին», — հայտարարել է Փաշինյանը։

Վարչապետը դիմել է նաև նշանադրությանը մասնակցած հյուրերին, որտեղ եղել է վարակված կինն Էջմիածնից, նա կոչ է արել նրանց բոլորին ինքնամեկուսանալ.

«Մեր ամենամեծ օպերատիվ խնդիրը նշանդրեքի մասնակիցներին հայտնաբերելն է ու այն անձանց շրջանակը պարզելը, որոնց հետ շփվել է հիվանդը։ Բոլոր քաղաքացիներին, որոնք մասնակցել են այդ միջոցառմանը կամ շփվել հյուրերի հետ, որոնց մոտ ախտանշաններ են նկատվում, կոչ եմ անում ինքնամեկուսանալ»։

Հայաստանի հիվանդանոցները դժվարություններ կունենան հիվանդների մեծ թվի դեպքում առանց ԱՀԿ օգնության

Հայկական լրատվամիջոցներում լուրեր կան, որ Առողջապահության համաշխարհային կազմակերպության ներկայացուցիչներն (ԱՀԿ) արդեն մի քանի օր է, ինչ ստուգում են տեղի հիվանդանոցները՝ հասկանալու համար, թե արդյոք երկիրը պատրաստ է դիմակայելու կորոնավիրուսի պանդեմիային։

«Հրապարակ» օրաթերթը, վկայակոչելով պատասխանատու շրջանակներում ունեցած իր աղբյուրներին, պնդում է, որ, ըստ արտասահմանյան մասնագետների, հայկական հիվանդանոցների մեծ մասն առանց ԱՀԿ օգնության դժվարություններ կունենա հիվանդների մեծ թվի դեպքում, եթե իրավիճակը վատթարանա։ Պատճառը դեղորայքի և հիվանդանոցների մահճակալների պակասն է։

Բուժհիմնարկների աշխատանքը նման պարագայում կհիշեցնի պատերազմական ժամանակները. պլանային հիվանդներին ընդունել չեն կարողանա, բուժում կտրամադրվի միայն կորոնավիրուսով հիվանդներին։