Հայաստանում կորոնավիրուսի ախտորոշումը կկատարվի տեղական արտադրության թեստերով

Մայիսի 22-ի դրությամբ Հայաստանում  կորոնավիրուսով վարակվածների թիվն ավելացել է 322-ով և հասել 5 928-ի։ Բուժվել է 293 պացինետ, ապաքինվածների ընդհանուր թիվը կազմում է 2 874: Շարունակում են բուժում ստանալ 2 952 մարդ:

Կորոնավիրուսից մահվան ևս չորս դեպք է արձանագրվել։ Մահացածների ընդհանուր թիվը հասավ 74-ի։

• Եթե չփոխենք կորոնավիրուսի տարածման տեմպը, կունենանք հարյուրավոր զոհեր — Փաշինյան
• Քաղաքական գործիչները՝ կորոնավիրուսի մասին։ Ինչո՞ւ է Հայաստանը վարակվածների թվով առաջատարը տարածաշրջանում

Հայաստանում մոտ 2 շաբաթից կորոնավիրուսի ախտորոշումը կկատարվի տեղական արտադրության թեստերով։ Նախատիպերը, որոնք արտադրվել են Գիտությունների ազգային ակադեմիայի մոլեկուլային կենսաբանության ինստիտուտում, արդեն փորձարկվում են։

«Մենք սկսել ենք թեստերի լաբորատոր փորձարկումները՝ մինչև արտադրությունը սկսելը: Մի քանի նախատիպեր ենք պատրաստել արդեն, որոնք այս պահին փորձարկում ենք՝ դրական և բացասական ստուգիչների հետ: 

Երևի մի օրից կսկսենք փորձարկել հիվանդների նմուշներով, որպեսզի ստուգենք թեստերի ճշտությունը: Բայց դա կրկին լինելու է ոչ թե թեստավորում, այլ փորձարկում՝ թեստի աշխատանքի ճշտությունը ստուգելու համար», — ասել է ինստիտուտի տնօրեն Արսեն Առաքելյանը:

Հայ մասնագետները կարտադրեն օրական 1000-3000 թեստ: