Հայաստանում կորոնավիրուսը դուրս է գալիս մայրաքաղաքի սահմաններից

Հայաստանում կորոնավիրուսը դուրս է գալիս Երևանի սահմաններից։ Մարտի 12–ին տեղեկություններ են հայտնվել, որ վարակվել է Էջմիածին քաղաքի բնակիչներց մեկը։

Այս լուրն արդեն հաստատել է քաղաքապետ Դիանա Գասպարյանը։ Մեկուսացվել է 40  մարդ։ Ընդհանուր առմամբ, երկրում մեկուսացված է 57 քաղաքացի։

Մարտի 11–ին հայտարարվեց, որ երկրում կորոնավիրուսով վարակվելու երեք նոր դեպք է հայտնաբերվել։ Վարակվածներից մեկը մայրաքաղաքից 20 կմ հեռավորության վրա գտնվող Էջմիածին քաղաքի բնակիչ է։

Այժմ Հայաստանում չորս վարակված կա։ Առաջին հիվանդի մասին հայտնի է դարձել մարտի 1–ին։ 29-ամյա Հայաստանի քաղաքացին Իրանից էր վերադարձել։

• Ամեն ինչ՝ կորոնավիրուսի մասին

• Կորոնավիրուս․ պանդեմիա է հայտարարվել։ Ի՞նչ է դա նշանակում և ի՞նչ սպասել

Ի՞նչ է տեղի ունեցել Էջմիածնում

Մարտի 12–ին Facebook-ում տեսանյութ հայտնվեց, որում, երևում է, թե ինչպես է շտապօգնության մոտ տասը մեքենա՝ միացրած ազդանշաններով, անցնում Էջմիածնի փողոցներից մեկով։

https://www.facebook.com/100011027627128/videos/1061805840863660/

Քաղաքապետը պարզաբանել է, որ այդ մեքենաներով բժիշկները տեղափոխում էին Էջմիածնի վարակված քաղաքացու հետ շփվածներին։ Միաժամանակ նա կոչ է արել խուճապի չմատնվել․

«Վարակված քաղաքացին այժմ բուժում է անցնում Նորքի ինֆեկցիոն հիվանդանոցում։ Նա իրեն նորմալ է զգում»։

Քաղաքապետի գրառման տակ արված մեկնաբանություններում օգտատերերը գրում են, որ մարտի ութին վարակված կնոջ տղայի նշանադրության արարողությունն է եղել և, հնարավոր է, որ վարակվածների թիվն ավելի մեծ է։

Սակայն «Էջմիածին» բուժկենտրոնի փոխտնօրեն Կարինե Խաչիկյանը պնդում է․

«Բոլոր այն անձինք [40 մարդ], ովքեր անմիջական շփման մեջ են եղել վարակված քաղաքացու հետ, մեկուսացվել են և տեղափոխվել հատուկ պահպանման վայր»։

Նա հաղորդել է, որ մեկուսացվածների մեջ է նաև բժիշկը, որը հետազոտել է Իտալիայից ժամանած վարակված քաղաքացիներին։

Նրանք վերադարձել են մարտի 10–ին։ Այդ օրը Երևանի օդանավակայանն Իտալիայից ժամանած երկու ինքնաթիռ է ընդունել։ Այդ եվրոպական երկրում վարակի տարածման առնչությամբ որոշվել է սահմանափակել ողջ բնակչության տեղաշարժը, եթե չկա անհրաժեշտություն և «հարգելի պատճառ»։ Եվ Հայաստանի քաղաքացիները ստիպված են եղել լքել այն։ Հայաստանի՝ Իտալիայից ժամանած բնակիչներն օդանավակայանում զննում անցնելուց հետո տնային կարանտինի տակ են առնվել։

Իսկ մարտի 11–ին հայտնի է դարձել վարակման երեք նոր դեպքերի մասին։

Ինքնամեկուսացումը վարակի տարածման դեմ պայքարի միակ տարբերակն է

Հայաստանում շատերն են վրդովված այն փաստով, որ Էջմիածնի բնակիչը, որն Իտալիայից է վերադարձել մոտ մեկ շաբաթ առաջ, ազատ կարող էր շրջել քաղաքում և տարբեր միջոցառումների մասնակցել։ Առողջապահության նախարարին քննադատում են, որ վարակի օջախ հանդիսացող երկրներից ժամանածները չեն մեկուսացվում։

Եվ Արսեն Թորոսյանը պատասխանել է․

«Բոլոր ուղևորներին հնարավոր չէ մեկուսացնել։ Մեկուսացվում են միայն հաստատված դեպքերն ու նրանց հետ անմիջական շփված անձինք։ Նույնը կիրառվում է նաև երեկվանից․ մեկուսացվում են քաղաքացիներ, որոնք անմիջական շփում են ունեցել երեք նոր վարակվածների հետ, պարզվում է նրանց շփման շրջանակը։ Անհնար է բոլորին մեկուսացնել։ Գլխավորը ժամանակին հայտնաբերելն է, թեստով հաստատելը, շփման շրջանակը պարզելն ու տարածումը կանխելը»։

Ընդ որում, Թորոսյանը կարծում է, որ վարակի տարածման դեմ ամենագործուն եղանակն ինքնամեկուսացումն է և երկրի յուրաքանչյուր բնակչի սոցիալական պատասխանատվությունը․

«Եթե վարակը տարածվում է և գաղտնի փուլ ունի, մենք չենք կարող մեկուսացնել հազարավոր քաղաքացիների․․․ Ես կոչ եմ անում ռիսկի գոտում ներառված երկրներից ժամանած քաղաքացիներին փորձել սահմանափակել շփումներն ու տնից դուրս չգալ, իսկ ախտանշանների ի հայտ գալու դեպքում ինքնաբուժմամբ չզբաղվել, այլ դիմել համապատասխան ծառայություններին, որպեսզի մենք կարողանանք ճիշտ նույնականացնել վարակը, թեստեր անցկացնել և որոշել հիվանդության տեսակը»։

Ըստ նախարարի՝ ինքնամեկուսացումը ենթադրում է, որ մարդը տնից դուրս չի գալիս ոչ խանութ, ոչ աշխատանքի։ Կորոնավիրուսի դեմ պայքարն, ըստ Արսեն Թորոսյանի, կարող է հասնել ինքնամեկուսացումից հրաժարվողներին պատասխանատվության ենթարկելուն․

«Այս պահին մենք դիտարկում ենք ինքնամեկուսացման ռեժիմը խախտածներին վարչական պատասխանատվության ենթարկելու մեխանիզմների կիրառման հնարավորությունը»։

Հետագա քայլերը

Հայաստանի այն քաղաքացիների համար, որոնք դեռ Իտալիայում են, մարտի 15–ին չարտերային չվերթ կիրականացվի։

«Ֆինանսական ծախսերը կկրեն Հայաստանի կառավարությունն, Atlantis European Airways ավիաընկերությունն ու «Արմենիա միջազգային օդանավակայաններ» ընկերությունը», – ֆեյսբուքյան իր էջում գրել էր փոխվարչապետ Տիգրան Ավինյանը։

Իսկ կառավարությունը լուծում է այդ հատուկ չվերթով ժամանած քաղաքացիներին կարանտինի տակ առնելու հարցը։ Այդ հարցի վերաբերյալ վերջնական որոշում դեռ չկա։

Ի՞նչ են գրում սոցցանցերում

Եթե դեռևս մի քանի օր առաջ Հայաստանում լիակատար հանգստություն էր, ինչպես փողոցներում, այնպես էլ սոցիալական ցանցերում, ապա մարտի 11–ին իրավիճակը կտրուկ փոխվել է։

Ֆեյսբուքի հայկական տիրույթի օգտատերերը պահանջում են անհապաղ միջոցներ ձեռնարկել վարակի տարածումը կանխելու համար։ Այն ուղևորներին, որոնք երկիր են ժամանում «վտանգավոր գոտիներից», օգտատերերը կոչ են անում անմիջապես մեկուսացնել, քանի որ մեծ մասը չի հավատում, որ մարդիկ կարող են ինքնուրույն ինքնամեկուսացվել երկու շաբաթով։

Ահա մի քանի մեկնաբանություն․

«Ես չեմ հավատում, որ մեր քաղաքացիներն այդքան գիտակից են և տանը նստելու են։ Բարեկամները կգան, գրկախառնություններ, պաչիկներ։.

«Իսկ ո՞վ է հետևելու այդ տնային կարանտինին։ Եթե Չինաստանի պես բոլոր դռները մեխեն, դա կլինի տնային կարանտին»։

«Պետք է լիակատար ապուշ լինել՝ կորոնավիրուսին այսքան անփութորեն վերաբերվելու համար․․․ Ի՞նչ «տնային կարանտինի» մասին է խոսքը։ Մեր բժշկության և կարգապահության այս մակարդակով այստեղ բոլորը կմեռնեն»։