Հայաստանում կարկուտը կրկին զգալի վնաս է հասցրել գյուղացիների բերքին

Հայաստանում կարկուտը կրկին վնասել է ծիրանի, սալորի, խնձորի և բանջարեղենի բերքը: Այն կես ժամ է տևել և, ըստ նախնական տվյալների, այս տարի ամենաուժեղն է եղել և ամենամեծ վնասն է հասցրել գյուղացիներին: Վնասի հստակ չափերը դեռ պետք է գնահատվեն: Աղետի էպիկենտրոն՝ Արմավիրի մարզ, օպերատիվ խումբ է մեկնել:

Հակակարկտային կայանները հերթական անգամ լավ չեն գործել անհայտ պատճառով: Գյուղատնտեսության նախարարությունը խոստովանել է, որ դրանք ոչ ամբողջ հզորությամբ են աշխատել:

«Հակակարկտային կայաններն աշխատել են, սակայն ոչ այն ծավալով, որ մենք կցանկանայինք»:

Առավել շատ և հաճախ կարտկից տուժում են Հայաստանի Արմավիրի մարզի տնտեսությունները, չնայած որ այստեղ ավելի քան 150 հակակարկտային կայան է տեղադրված: Նախորդ կառավարությունն արդեն զգացել էր դրանց անարդյունավետությունն ու փորձում էր կարկուտից պաշտպանելու այլ մեթոդներ գտնել: Խոսվում էր հակակարկտային ցանցերի կիրառման անհրաժեշտության մասին: Սակայն դրանք չափազանց թանկ էին գյուղացիների համար, և մեծ մասը հրաժարվում էր բերքը պաշտպանելու այդ մեթոդից:

Նախարարների նոր կաբինետը՝ Նիկոլ Փաշինյանի գլխավորությամբ, իր առաջին իսկ նիստին քննարկել է այն հարցը, թե ինչպես օգնել Արմավիրի շրջանի բնակիչներին և փոխհատուցել կարկտի հասցրած վնասը:

Այժմ Հայաստանի կառավարությունը երեք տարով հետաձգել է «ՎԱԲԱ» ընկերության համար ԱԱՀ վճարումը սարքավորումներ ներկրելու համար: Կառույցը Հայաստանում հակակարկտային ցանցեր է արտադրելու և պատրաստվում է գործարան կառուցել Վանաձոր քաղաքում:

Հայաստանի տնտեսական զարգացման և ներդրումների նախարար Արծվիկ Մինասյանը նշել է, որ ամբողջ արտադրությունը կազմակերպվելու է Հայաստանում.

«Ընկերությունն այս նախագծում կներդնի 2,25 մլրդ դրամ: Արդյունքնում՝ 24 աշխատատեղ կստեղծվի՝ 320 հազար դրամ միջին աշխատավարձով»:

Նախարարն ընդգծել է նաև, որ արդյունքում Հայաստանում կնվազեն հակակարկտային ցանցերի գները:

Սակայն, այնուամենայնիվ, շատ ֆերմերներ կարծում են, որ այս մեթոդի կիրառումը չի կարող ամբողջությամբ լուծել կարկուտից բերքը պաշտպանելու խնդիրը:

Սարգիս Միքայելյանը հակակարկտային ցանցով պատել է խաղողի իր 5 հա  այգին Ալաշկերտ համայնքում: Նա մոտ 2,5 մլն դրամ է ծախսել այդ նպատակով: Հիմա ֆերմերն ուրախ կլինի պաշտպանել իր հողատարածքի մնացած 9 հեկտարն ավելի ցածր գնով:

Միքաելյանը կարծում է, որ ցանցերն առավել արդյունավետ են պաշտպանում կարկուտից: Սակայն և ինքը, և մյուս արմավիրցիները պնդում են, որ այդ մեթոդը կարելի է կիրառել միայն խաղողի այգիների և երիտասարդ, ոչ բարձր ծառերի համար: Ծիրանի և կեռասի հասուն ծառերն անհնար է ցանցով պատել. դրանք 6-7մ բարձրություն ունեն:

Նախորդ կառավարությունը գյուղացիներին առաջարկում էր ծառերի գաճաճ տեսակներ աճեցնել: Եվ ֆերմերները կտրականապես մերժում էին այդ առաջարկը: Մասնավորապես, Հռիփսիմե Ավետիսյանն Արգինա գյուղից ասում էր.

 «Ես չեմ կարող ոչնչացնել իմ այգին, որպեսզի նոր գաճաճ ծառեր տնկեմ, 5-7 տարի բերքի սպասեմ: Էլ չեմ խոսում այն մասին, թե որքան գումար պետք է ներդնել դրա վրա»:

Այնպես որ, գյուղացիները դեռ կսպասեն նոր կառավարությունից նոր առաջարկների: