Հայաստանում կալանավորվել են զորամասի հրամանատարի թիկունքի գծով տեղակալը և պարենային ծառայության պետը

ՀՀ քննչական կոմիտեն մեղադրանք է առաջադրել N զորամասի հրամանատարի թիկունքի գծով տեղակալին և պարենային ծառայության պետին՝ շահադիտական նպատակներով պաշտոնեական դիրքը չարաշահելու և պետությանը նյութական վնաս պատճառելու համար։

ՀՀ քննչական կոմիտեն նախնական քննությամբ պարզել է, որ N զորամասին մատակարարված հացի իրական քանակը չի համապատասխանել հաշիվ-ապրանքագրերով ներկայացված տվյալներին. դրանցում ներառվել են կեղծ տվյալներ՝ ներկայացվել է մատակարարված հացի ավելի մեծ քանակ։

Պարզվել է, որ N զորամասի հրամանատարի տեղակալ, կոչումով փոխգնդապետ Վ.Պետրոսյանը, այդ զորամասին հաց մատակարարող ՍՊԸ-ի պատասխանատու աշխատողների հետ պայմանավորվածություն է ձեռք բերել՝ անձնակազմի համար անհրաժեշտ փաստացի մատակարարված հացի քանակը փաստաթղթով ավելին ներկայացնել և գրանցված յուրաքանչյուր N քանակի դիմաց ստանալ համապատասխան գումար։

Միաժամանակ փոխգնդապետ Վ.Պետրոսյանը, ում պարտականությունների մեջ էր մտնում կազմակերպել և վերահսկել զորամասում ստացված հացի սահմանված հաշվառման ու հաշվետվության կարգը, հանձնարարել է նույն զորամասի պարենային ծառայության պետ, մայոր Է.Ալեքսանյանին ՍՊԸ ուղարկել արդեն իսկ զորամաս մատակարարված հացի վերաբերյալ ապրանքագրեր, որոնք վերադարձվել են մատակարարված հացի քանակն ավել ներկայացված կեղծ գրառումներով։

Այսպիսով, վերադաս հրամանատարությանը ներկայացվել են փաստաթղթեր զորամասում ըստ կաթսայական բավարարման համար անհրաժեշտ քանակից ավելի շատ հաց մատակարարվելու մասին, որի արդյունքում պետությանը պատճառվել է նյութական վնաս։ Վ.Պետրոսյանը և Է.Ալեքսանյանը կալանավորվել են:

Հաց մատակարարող ՍՊԸ-ի աշխատակցին մեղադրանք է առաջադրվել առանձնապես խոշոր չափերով խարդախություն կատարելու համար, նրա նկատմամբ որպես խափանման միջոց է ընտրվել ստորագրություն՝ չհեռանալու մասին։