Հայաստանում խորհրդարանական ընտրությունների քարոզարշավի ընթացքում և քվեարկության օրը գործելու է թեժ գիծ

2017թ.-ի մարտի 5-ից Հյաստանում սկսվում է ապրիլին կայանալիք խորհրդարանական ընտրությունների քարոզարշավը:  Եվ հենց առաջին օրվանից՝ ժամը 09.00-18.00, իսկ քվեարկության օրը շուրջօրյա, ՀՀ գլխավոր դատախազությունում գործելու է թեժ գիծ՝ (010) 511-603 հեռախոսահամարով: Այն գործելու է ընտրական բնույթի հանցագործությունների վերաբերյալ տեղեկատվությունները ստուգելու, դրանց բացահայտմանն ուղղված իրավապահ մարմինների գործողությունների արդյունավետությունը բարձրացնելու նպատակով:

Լրատվամիջոցները հաղորդում են, որ շահագրգիռ անձինք առերևույթ ընտրական բնույթի հանցագործությունների վերաբերյալ հավաստի տեղեկությունները կարող են հայտնել թեժ գծի միջոցով, տեղեկություն հայտնողի գաղտնիությունը երաշխավորվում է:

Հատուկ աշխատանքային խումբը 2017 թվականի մարտի 4-ի դրությամբ արդեն ուսումնասիրել է խորհրդարանական ընտրությունների հետ կապված զանգվածային լրատվամիջոցներում հրապարակված 79 ենթադրյալ ընտրական իրավախախտումների վերաբերյալ հաղորդում և ՀՀ ոստիկանությունում ստացված մեկ անանուն ահազանգ:

ՀՀ գլխավոր դատախասությունից  հայտնում են, որ «ուսումնասիրված 80 հաղորդումներից միայն 19-ն են պարունակել առերևույթ ընտրական բնույթի հանցագործության վերաբերյալ տեղեկատվություն… 19 հաղորդումներից 14-ը վերաբերել են առերևույթ ընտրակաշառքի, 5-ը՝ քաղաքացու ընտրական իրավունքի ազատ իրականացմանը խոչընդոտելու դեպքերի»: