Երևանում շարունակվում են Սերժ Սարգսյանի վարչապետության դեմ իրականացվող շուրջօրյա ակցիաները. ծրագրվում է վաղն էլ փակել խորհրդարան տանող բոլոր փողոցները
20:15
Հայտնի է դարձել, թե Բաղրամյան փողոցում ոստիկանների ու ակցիայի մասնակիցների միջև այսօր տեղի ունեցած բախումների հետևանքով քանի մարդ է վնասվածքներ ստացել: Առողջապահության նախարարության փոխանցմամբ, բուժօգնության համար դիմել է 46 քաղաքացի, այդ թվում՝ պատգամավոր Նիկոլ Փաշինյանը: Տուժածների թվում կա 6 ոստիկան:
20:00
Երևանի կենտրոնում շարունակվում է ընդդեմ Սերժ Սարգսյանի վարչապետության իրականացվող շուրջօրյա հանրահավքը: Շարժման առաջնորդ, պատգամավոր Նիկոլ Փաշինյանը ներկայացնում է վաղվա անելիքները:
«Վաղը «Փակիր փողոց»-ը ակցիան պետք է իրականացնենք ավելի մեծ մաշտաբներով: Պետք է բլոկադայի ենթարկենք Ազգային ժողովին մոտեցող բոլոր մուտքերը»,- հայտարարեց Ն. Փաշինյանը:
Հիշեցնենք, որ վաղը՝ ապրիլի 17-ին, Ազգային ժողովում նախատեսված է վարչապետի պաշտոնում առաջադրված միակ թեկնածուի՝ Սերժ Սարգսյանի, ընտրությունը:
Պատգամավորը կոչ արեց համահայկական դասադուլ ու գործադուլ իրականացնել: «Մենք պետք է այնպես անենք, որ այդ չարաբաստիկ նիստը չկայանա, պետք է այնպես անենք, որ Սերժ Սարգսյանը չվերադառնա»,- շեշտեց Նիկոլ Փաշինյանը:
17:30
Նիկոլ Փաշինյանը վերադարձավ Բաղրամյան փողոց, որտեղ նրան դիմավորեցին ոչ միայն իր համակիրները, այլև՝ «Ելք» դաշինքի մյուս 2 ուժերի առաջնորդները, ովքեր չէին ողջունում պատգամավորի առաջարկած փողոցային տարբերակը՝ Սերժ Սարգսյանի վարչապետության դեմ պայքարելու հարցում: Միաժամանակ նրանք տեղեկացրել են, որ իրենց դիրքորոշումը չի փոխվել, իրենք չեն միանում Փաշինյանին, պարզապես եկել են, որ կանխեն բռնությունը:
Համակիրները ծափերով էին ընդունում նրանց: Մեկը համբուրեց Ն. Փաշինյանի ձեռքը:
«Մենք պարտավոր ենք ապահովել քաղաքացիների հաղթանակը: Հույս ունեմ, որ հաջորդ անգամ մեզ չեք կանգնեցի»,- դիմելով ոստիկանությանը ասաց Ն. Փաշինյանը: Նա քաղաքացիներին ասաց, որ հանրահավաքը Ֆրանսիայի հրապարակից տեղափոխվում է Բաղրամյան փողոց:
17:06
«Նաիրի» հիվանդանոցում գտնվող Նիկոլ Փաշինյանի ինքնազգացողությունը, ով տուժել էր Բաղրամյանում տեղի ունեցած բախումների հետևանքով, բավարար է, նա շուտով դուրս կգրվի հիվանդանոցից: Լրագրողների հետ զրույցում Նիկոլ Փաշիյանն անձամբ ասել է, որ իրեն նորմալ է զգում, թեև նրա ձեռքերը վիրակապված էին:
Պատգամավորը նշել է, որ շորերը պատառոտված են, կոշիկները ճղվել են, բայց ինքը կգնա Բաղրամյան, իսկ մինչ այդ կփոխի շորերն ու կոշիկները:
Նիկոլ Փաշինյանը հաստատեց՝ ինքը վնասվածքները ստացել է, երբ փշալարերի վրայով է անցել, իսկ այդ քայլին է դիմել, որովհետև ցանկացել է գնալ իր աշխատավայր՝ Ազգային ժողով, այնինչ ոստիկանները թույլ չեն տվել:
«Երբ անցնում էի փշալարի վրայով, այնպես ստացվեց, որ կտրվեցի ցուցարարներից: Երբ ինձ փորձում էին քաշել այսկողմ, ես փշալարերից բռնեցի ու պատռվածքներ ստացա: Հիմա կարել են: Իսկ աչքիս վնասվածքը բեկորային չէ: Հարված կա: Կապտուկը, եթադրում եմ, ձայնային նռնակի ալիքից է»,- նշել է պատգամավորը:
Ն. Փաշինյանն ասել է, որ որպես պատգամավոր ինքը իրավունք ունի քաղաքացիների համար ընդունելություն կազմակերպել Ազգային ժողովի շենք:
16: 56
Բաղրամյան փողոցում տեղի ունեցած բախումների հետևանքով տուժած 3 ոստիկաններից մեկի առողջական վիճակը ծանր է: Բուժհաստատությունից հայտնում են, որ ոստիկանին տեղափոխում են վերակենդանացման բաժանմունք:
16:55
11 ցուցարար տեղափոխվել է Երևանի Սուրբ Գրիգոր Լուսավորիչ հիվանդանոց՝ տարբեր աստիճանի վնասվածքներով: Նրանց թվում է քաղաքացիական անհնազանդության շարժման ակտիվիստներից Ալեն Սիմոնյանը:
16:30
Բաղրամյան պողոտայի բախումների հետևանքով տուժել է նաև 3 ոստիկան: Նրանցից մեկի վիճակը ծանր է: Ոստիկանը ստացել է բեկորային վնասվածք: Այս մասին հայտնել են բուժհաստատությունից:
16:25
Նիկոլ Փաշինյանը ձեռքի վնասցվածքներ է ստացել, երբ փորձել է անցնել Բաղրամյան փողոցի վրա ոստիկանության կողմից դրված փշալարը: Շարժման առաջնորդը գտնվում է հիվանդանոցում, որտեղից ակտիվիստները հայտնում են, որ բժիշկները վիրակապում են Փաշինյանի ձեռքերը: Նիկոլ Փաշինյանը վնասվածքներ է ստացել նաև աչքի շրջանում:
16:18
Ընդդեմ Սերժ Սարգսյանի վարչապետության դեմ պայքարող շարժման մասնակիցների փոխանցմամբ՝ առաջնորդ Նիկոլ Փաշինյանը ստացել է թեթև վնասվածքներ: Նա գտնվում է հիվանդանոցում: Լուրը հաստատել է նաև Փաշինյանի կինը: Նա տեղեկացրել է, որ բուժօգնություն ստանալուց հետո Նիկոլ փաշինյանը կվերադառնա ցուցարարների մոտ:
15:30
Երևանում Հայաստանի 3-րդ նախագահ Սերժ Սարգսյանի վարչապետության դեմ պայքարող ցուցարարների և ոստիկանության միջև բախումներ են տեղի ունենում: Կան տուժածներ, որոնց թիվը դեռևս հայտնի չէ:
Լրատվամիջոցների փոխանցմամբ տուժել է քաղաքացիական անհնազանդության շարժման առաջնորդ, պատգամավոր Նիկոլ Փաշինյանը, ում բախումներից հետո տեղափոխել են հիվանդանոց: Առայժմ հայտնի չէ, թե ինչ վնասվածքներ ունի նա: Տեսախցիկները ֆիքսել են նրա արյունոտ դեմքն ու ձեռքերը:
Ակտիվիստները փորձել են շարժվել Բաղրամյան փողոցով դեպի Ազգային ժողովի շենք, սակայն հարյուրավոր ոստիկաններ պատնեշ են կազմել ու թույլ չեն տվել նրանց առաջ գնալ: Ցուցարարները մի քանի անգամ փորձել են ճեղքել ուժային կառույցի պատնեշը՝ ձեռքերը վեր բարձրացրած, ցույց տալով, որ իրենք զինված չեն:
Հանդիպելով ժողովրդի դիմադրությանը ոստիկանությունը կիրառել է հատուկ միջոցներ, մասնավորապես պայթուցիկներ, որոնք նետվել են ցուցարարների ուղղությամբ: Դրանց արդյունքում էլ քաղաքացիներ են տուժել: Հայտնի չէ, թե ինչ պայթուցիկներ են դրանք եղել:
Ոստիկանների ու ակտիվիստների միջև պայմանավորվածություն է ձեռքբերվել չկիրառել գազային միջոցներ:
15:12
Իրավիճակը լարված է: Հազարավոր մարդիկ Նիկոլ Փաշինյանի առաջնորդությամբ շարժվում են Ազգային ժողովի շենքի մոտ, որը շրջապատված է ոստիկանության կողմից: Փաշինյանը հայտարարել է, որ ինքը պատգամավոր է, գնում է աշխատանքի և ոստիկանությունը չի կարող իրեն թույլ չտալ շարժվել դեպի խորհրդարան:
Նրա խոսքով՝ ոստիկանությունը պետք է թույլ տա ոչ միայն իրեն, այլև քաղաքացիներին, ովքեր իր մոտ այցելության են գնում:
Երևանում սկսվել է անհնազանդության հերթական ակցիան: Նախկին նախագահ Սերժ Սարգսյանի իշխանության երկարաձգման դեմ շարժման տասնյակ ակտիվիստներ, հիմնականում՝ ուսանողներ, փակում են մայրաքաղաքի կենտրոնական փողոցները բարիկադներով և աղբամաններով: Քաղաքային տրանսպորտի վարորդները ստիպված փոխում են երթուղին:
Նախօրեին «Քաղաքացիական պայմանագիր» ընդդիմադիր կուսակցության առաջնորդ Նիկոլ Փաշինյանը Երևանի շրջափակման պլան էր ներկայացրել: Նա հայտարարել էր, որ մայրաքաղաքում տրանսպորտային կոլապս է լինելու, կոչ էր արել մարդկանց զրոյացնել բանկերում իրենց հաշիվները, գործադուլ սկսել և Ազգային ժողովի շենքի մոտ ցույցի մասնակցել:
Ինչ վերաբերում է տրանսպորտային երթևեկության խաթարմանը, ապա պլանի այդ հատվածն իրոք սկսվեց իրականացվել խոստացված ժամին՝ առավոտյան 8:15-ին: Առաջինն ավտոբուսի դիմաց նստեց ինքը՝ Փաշինյանը: Ակտիվիստները վանկարկում են շարժման կարգախոսը դարձած արտահայտությունը՝ «Քա՛յլ արա, մերժի՛ր Սերժին»:
Ոստիկանները բարիկադավորել են Բաղրամյան պողոտան՝ ցուցարարներին խորհրդարանի շենքին մոտ չթողնելու համար: Շարժման առաջնորդ Փաշինյանը ժամանակ առ ժամանակ բարձրախոսը ձեռքին ներողություն է խնդրում երևանցիներից ստեղծված անհարմարությունների համար: Նրա խոսքով՝ այդպիսով շարժման ակտիվիստներն ուզում են ազատել նրանց ավելի տհաճ անհարմարություններից և իրադարձությունների զարգացման սցենարից:
JAMnews-ն ավելի վաղ հաղորդել էր Հայաստանում սկսված անհնազանդության շարժման մանրամասները, որի նպատակն է նախկին նախագահ Սերժ Սարգսյանին թույլ չտալ զբաղեցնել վարչապետի պաշտոնը և շարունակել գլխավորել երկիրը: Դրա համար շարժման առաջնորդն ու նրա համախոհները կոչ են անում մարդկանց փողոց դուրս գալ, միանալ իրենց: Նրանց նախատեսածի համաձայն՝ պետք է մինչև 100 հազար մարդ լինի իրենց հետ: Դա անհրաժեշտ է ապրիլի 17-ին խորհրդարանի շենքը շրջափակելու, վարչապետի ընտրույթանը պատգամավորներին մասնակցելու հնարավորություն չտալու համար:
Սահմանադրության համաձայն՝ այն դեպքում, եթե վարչապետի ընտրությունները երկու անգամ ձախողվում են, գործող խորհրդարանը զրկվում է իր իրավասություններից, և նոր խորհրդարանական ընտրություններ են նշանակվում: Այսպիսով, ըստ ընդդիմադիրների, կփոխվի խորհրդարանական մեծամասնությունը և Սերժ Սարգսյանի «վերարտադրում» տեղի չի ունենա:
JAMnews-ը շարունակում է հետևել իրադարձություններին:
Այլ մանրամասներին շարժման մասին կարելի ծանոթանալ մեր նախորդ հրապարակումներում.
Հայաստանի ընդդիմությունը ներխուժել է Հանրային ռադիոյի շենք՝ պահանջելով ուղիղ եթեր
