Հայաստանում անհետ կորած ռուս պայմանագրային զինծառայողը գտնվել է մերկապարուհու մոտ

JAMnews-ն ավելի վաղ գրել էր, որ 35-ամյա Դմիտրի Լոշմանովը կիրակի՝ ապրիլի 16-ին, ժամը 9:30, դուրս է եկել զորամասից գնումներ կատարելու և չի վերադարձել:

Ոստիկանությունը նրան հայտնաբերել է ապրիլի 19-ի երեկոյան «Մուշ» թաղամասի բնակարաններից մեկում և բերման ենթարկել անհետացման պայմանները պարզելու համար:

Պարզվել է, որ Դմիտրի Լոշմանովն աշխատավարձ է ստացել ապրիլի 16-ին և ընկերների հետ գնացել «Լաքի» գիշերային ակումբ «թուլանալու»:

Գիշերային ակումբում նա խմել է, մերկապարուհիների հետ ծանոթացել և գնացել նրանցից մեկի բնակարան Գյումրիի «Մուշ» թաղամասում, գրում է Armtimes.am հայկական պարբերականը:

Երեք օր Լոշմանովը գտնվել է իր նոր ծանոթուհու մոտ: Երբ փողերը վերջացել են, մերկապարուհին դիմել է ոստիկանություն՝ կորած զինծառայողն իր մոտ է, «եկեք, տարեք»:

Այսօր առավոտյան պայմանագրային զինծառայողին բաց են թողել ոստիկանությունից, հաղորդում է Հայաստանի Քննչական կոմիտեն, «Լոշմանովը ողջ-առողջ է»: