Հայաստանում ամեն տարի աճում է դոնորական արյան քանակը

Հայաստանում տարեցտարի աճում է դոնորների թիվն ու դոնորական արյան քանակը: Ըստ պաշտոնական տվյալների՝ 2017թ-ին արյուն է հանձնվել 15 հազար անգամ: Համեմատության համար՝ 2000-2001թթ-ին գրանցվել է դոնորական արյան հանձնման 6000-7000 դեպք:

Սակայն, ինչպես նշում են Հայաստանի առողջապահության նախարարությունում, չնայած դրական դինամիկային, պահպանվում է դոնորական արյան հանձնման աճ ապահովելու խնդիրը:

«Արյան տարբեր հիվանդություններից տառապող անձանց բուժման համար մեծ քանակությամբ արյան կոմպոնենտներ են անհրաժեշտ: Հաճախ հիվանդի հարազատներն ի վիճակի չեն արյուն հանձնել, սակայն դա չի նշանակում, որ նա համապատասխան բուժօգնություն չի ստանա: Նման դեպքերում դոնորական արյուն է օգտագործվում», — նշված է հաղորդագրությունում:

Հունիսի 14-ն Արյան դոնորի համաշխարհային օրն է: Հայաստանում այսօր դոնորական արյան անհատույց հանձնման ակցիա է անցկացվում: Միջոցառումներն անցկացվում են «Նվիրիր արյուն, փրկիր կյանք, դարձիր հերոս» կարգախոսով: