Հայաստանն ու Եվրամիությունն ավարտել են բանակցությունները Համապարփակ և ընդլայնված գործընկերության համաձայնագրի շուրջ

«Այսօրվա հանդիպման կենտրոնական թեման Հայաստան-Եվրոպական միություն նոր շրջանակային համաձայնագիրն էր: Եվ այսօր ես գոհունակությամբ կարող եմ ասել, որ կողմերը ավարտել են բանակցությունները։ Նոր իրավական փաստաթուղթը՝ Համապարփակ և ընդլայնված գործընկերության համաձայնագիրը, արտահայտում է Հայաստան-ԵՄ հարաբերությունների իրական ընդգրկումն ու խորությունը», — ասել է Հայաստանի նախագահ Սերժ Սարգսյանը՝ ամփոփելով Եվրոպական խորհրդի նախագահ Դոնալդ Տուսկի հետ հանդիպման արդյունքները:

Հայկական կողմն առաջընթաց է համարում նաև ոլորտային համագործակցությանը վերաբերող Փոքր և միջին ձեռնարկությունների և նորարարության «Հորիզոն 2020» ծրագրերի ստորագրումը:  Առաջիկայում էլ կողմերը կավարտվեն նաև Ընդհանուր ավիացիոն գոտու պայմանագիրը և «Ստեղծագործ Եվրոպա» նախաձեռնությանը միանալու աշխատանքները:

Հայաստանի նախագահը համարում է, որ նախորդ երկու տարիները Հայաստան-Եվրամիություն համագործակցության տեսանկյունից առանձնացել են ակտիվությամբ՝ զգալիորեն աշխուժացել է քաղաքական երկխոսությունը, ընդլայնվել է համագործակցությունը տարբեր ոլորտներում.

«Ակնկալում ենք, որ առաջիկայում կմեկնարկի նաև Հայաստանի հետ վիզաների ազատականացման շուրջ երկխոսությունը, ինչն ամրագրված էր Արևելյան գործընկերության Ռիգայի գագաթնաժողովի համատեղ հռչակագրում, և մեծապես կնպաստի մեր ժողովուրդների միջև կապերի ընդլայնմանն ու խորացմանը»:

Բելգիայի թագավորություն աշխատանքային այցի շրջանակում նախատեսված են նաև Սերժ Սարգսյանի հանդիպումները մի շարք այլ բարձրաստիճան պաշտոնյաների հետ, ինչպես նաև` հայ համայնքի գործարար ներկայացուցիչների հետ: