Հայաստանի վարչապետ Սերժ Սարգսյանն ու նրա հրաժարականը պահանջող ընդդիմադիր պատգամավոր Նիկոլ Փաշինյանը կհանդիպեն
ԹԱՐՄԱՑՈՒՄ
23:56, ապրիլի 21
Վաղը տեղի կունենա Հայաստանի վարչապետ Սերժ Սարգսյանի և վերջինիս հրաժարականը պահանջող պատգամավոր Նիկոլ Փաշինյանի հանդիպումը: Երկխոսության առաջարկով հանդես եկող իշխանության ներկայացուցիչ՝ ՀՀ նախագահ Արմեն Սարգսյանն այսօր այցելել էր Հանրապետության հրապարակ, որտեղ տեղի էր ունեցել նրա հանդիպումը Փաշինյանի հետ:
Զրույցից հետո Նիկոլ Փաշինյանը հայտարարել էր, որ ինքը պատրաստ է իշխանության հետ բանակցել, բայց շեշտել էր, որ օրակարգում միայն մեկ հարց պետք է լինի՝ Սերժ Սարգսյանի հրաժարականն ու իշխանության անցնցում փոխանցման պայմանները:
«Արմեն Սարգսյանի հետ հանդիպումից հետո մենք ստացանք հաստատում, որ Սերժ Սարգսյանը պատարստ է հանդիպել այդ օրակարգով: Առավոտյան 10:00-ին «Մարիոթ» հյուրանոցում տեղի կունենա իմ և Սերժ Սրագսյանի հանդիպումը՝ նրա հրաժարականի և իշխանությունն անցնում փոխանցելու պայմանների շուրջ»,- հայտարարել է Նիկոլ Փաշինյանը:
Ընդդեմ Սերժ Սարգսյանի վարչապետության դեմ ապրիլի 13-ին մեկնարկած շարժումը շարունակում է թափ հավաքել: Մարզերից Երևան են գալիս քաղաքացիներ՝ միանալու պատգամավոր Նիկոլ Փաշինյանի գլխավորությամբ անցկացվող ակցիաներին: Դրանք լարված մթնոլորտում են իրականանում՝ ոստիկանության հետ պարբերաբար բախումների պայմաններում:
Ցուցարարներն այսօր ևս երթեր են իրականացրել և պարալիզացրել երթևեկությունը թե մայրաքաղաքի կենտրոնում, թե ծայրամասերում:
Բավական լարված է եղել Արմավիր մարզից Երևան եկող ճանապարհը: Տեղի ազդեցիկ անձանցից մեկը՝ Առաքել Մովսիսյանն, ով իշխող «Հանրապետական» կուսակցության անդամ է, նախկին պատգամավոր, իր կողմնակիցների հետ փակել է ճանապարհը, որ քաղաքացիները չկարողանան հասնել Երևան ու միանալ ակցիաներին: Այս ընթացքում ոստիկանությունը անգործություն է ցուցաբերել և որևէ կերպ չի խոչընդոտել, որ Մովսիսյանի կոզմնակիցները փակեն փողոցը:
ՀՀԿ-ական մեկ այլ պատգամավոր, գործարար Սամվել Ալեքսանյանն էլ, Մալաթիա-Սեբաստիա համայնքում բողոքի ակցիա իրականացնող ավտոմեքենայի ողևորին ոտքով է հարվածել:
Պաշտոնական տվյալներով՝ 16:00-ի դրությամբ ոստիկանություն բերման ենթարկվածների թիվը 90 է եղել: Բերման են ենթարկել նաև շարժման ակտիսվիտ, քաղաքագետ, նախաձեռնող խմբի անդամ Արմեն Գրիգորյանին:
Արարատ-Երևան ավտոճանապարհին` բողոքի ակցիա իրականացնող քաղաքացիների ավտոերթը լուսաբանելիս, քաղաքացիական հագուստով անձը հարվածել է «Ազատություն» ռադիոկայանի լրագրող Արուս Հակոբյանի գլխին, նրա ձեռքից փորձել է խլել տեսախցիկը, սակայն լրագրողը թույլ չի տվել:
Լրագրողը ուղիղ եթերում լուսաբանելիս է եղել, թե ինչպես է ոստիկանությունը փակել ավտոերթ իրականացնող արարատցիների ճանապարհը, ովքեր Արարատից շարժվում էին Երևան՝ միանալու Նիկոլ Փաշինյանի գլխավորած շարժմանը:
Վարչապետ Սերժ Սարգսյանն այսօր կոչ է արել Նիկոլ Փաշինյանին անհապաղ երկխոսություն սկսել.
«Խորապես մտահոգված եմ ծավալվող ներքաղաքական զարգացումներով: Անդառնալի կորուստներից խուսափելու նպատակով՝ կոչ եմ անում Ազգային ժողովի պատգամավոր Նիկոլ Փաշինյանին նստել քաղաքական երկխոսության և բանակցությունների սեղանի շուրջ: Դա պետք է անել անհապաղ»:
Այս առնչությամբ Նիկոլ Փաշինյանը հայտարարել է.
«Մենք պատրաստ ենք քննարկել Սերժ Սարգսյանի հեռացման պայմանները»:
Հանրապետության նախագահ Արմեն Սարգսյանը հայտարարել է, որ խորապես անհանգստացած է երկխոսության առաջարկի մերժմամբ, քանի որ դա կարող է հանգեցնել առճակատման: Նա իր պատրաստակամությունն է հայտնել հանդիպել Նիկոլ Փաշինյանին՝ լարվածությունը քաղաքական ուժերի երկխոսության միջոցով մեղմելու նպատակով:
Շարժման առաջնորդը հրավիրել է նախագահին Երևանի գլխավոր հրապարակ ժամը 19:00: Այդ ժամին այստեղ կսկսվի հերթական հավաքը:
Նշված ժամին նախագահ Արմեն Սարգսյանը եկավ Հանրապետության հրապարակ: Նիկոլ Փաշինյանի հետ կարճատև զրույցից հետո նախագահը հանդիպել է Սերժ Սարգսյանին։
JAMnews-ը շարունակում է հետևել զարգացուներին:
