Հայաստանի խորհրդարանի խոսնակին «կրկնակի գործակալ» են անվանում, ԱԱԾ-ն հերքում է
Նախկին նախագահ Սերժ Սարգսյանի փեսա, Վատիկանում Հայաստանի նախկին դեսպան Միքայել Մինասյանը ֆեյսբուքյան իր էջում ուղիղ եթերում ՀՀ խորհրդարանի խոսնակ Արարատ Միրզոյանին կրկնակի գործակալ է անվանել։
Նա նշել է, որ Հայաստանի Ազգային ժողովի ղեկավարին հավաքագրել են Թուրքիայի հատուկ ծառայությունները։ Այնուհետև Հայաստանի Ազգային անվտանգության ծառայությունը, պարզելով այս փաստը, իբր Արարատ Միրզոյանին առաջարկել է կամ իր համար աշխատել, կամ դատվել պետական դավաճանության համար։
Մինասյանի մեղադրանքները խոսնակը հերթական «ցնդաբանություն» է անվանել, ԱԱԾ-ն նույնպես հերքել է նրա հրապարակած տեղեկությունները։
Միքայել Մինասյանը պարբերաբար քննադատում է ներկայիս իշխանություններին, անձամբ Հայաստանի վարչապետ Նիկոլ Փաշինյանին և նրա թիմին։ Թե որտեղ է նա այժմ, հայտնի չէ, քանի որ նրա նկատմամբ հետախուզում է հայտարարվել քրեական գործի շրջանակում, և նա թաքնվում է արտասահմանում։ Իր «բացահայտումները» նա պարբերաբար հրապարակում է սոցցանցերում։
Խորհրդարանի խոսնակի հետ կապված սկանդալային պատմության մանրամասները։
- Հայաստանի նախկին նախագահ Սերժ Սարգսյանի մոտ շրջապատն՝ իրավապահ մարմինների ուշադրության կենտրոնում
- «Հայերի փրկությունը հենց հայերի ընտրությունն է»․ քաղաքագետ
Մինասյանի մեղադրանքները
Միքայել Մինասյանը պնդում է, որ Թուրքիայի հատուկ ծառայությունները հավաքագրել են Արարատ Միրզոյանին, երբ նա ԱՄՆ-ում է եղել և հետազոտական աշխատանքով է զբաղվել․ ուսումնասիրել է Հայոց ցեղասպանության ճանաչման գործընթացը։ Եվ իբր նա համաձայնել է տեղեկություններ փոխանցել այն մասին, թե ինչ է կատարվում Հայոց ցեղասպանության թանգարան-ինստիտուտում։
Այնուհետև, ըստ Մինասյանի, նա «կրկնակի գործակալ» է դարձել, քանի որ Հայաստանի ԱԱԾ-ն արդեն պարզել է նրա հավաքագրման փաստը, և նրան պատիժ էր սպառնում պետական դավաճանության համար․
«Նա թուրքերին ասել է այն, ինչ պետք է ասի, ԱԱԾ-ն է թույլ տվել, որ նա փոխանցի այս կամ այն տեղեկությունը, և իմացել է, թե ինչն է հետաքրքրում թուրքական հատուկ ծառայություններին»։
Որպես իր խոսքերի հաստատում՝ Մինասյանն ԱԱԾ-ի հետ համագործակցության վերաբերյալ համաձայնության մասին փաստաթղթի լուսանկարն է հրապարակել, որն իբր իր ձեռքով գրել է Արարատ Միրզոյանը։
Լուսանկարի տակ արված գրառման մեջ Մինասյանն առաջարկել է «թուրք լրտեսի ձեռագրի փորձաքննություն» անցկացնել և հարցաքննել, թե ինչ հանգամանքներում է «նա դարձել հայկական հատուկ ծառայությունների գործակալ»։
Ինչպես պնդում է Միքայել Մինասյանը, վարչապետ Նիկոլ Փաշինյանը միշտ իմացել է, որ Միրզոյանը գործակալ է, և նրա միջոցով կապ է պահել Թուրքիայի հետ։
Միրզոյանի և ԱԱԾ հերքումը
«Միքայել Մինասյանի հերթական ցնդաբանությունը պետք է արժանանա պատշաճ քրեաիրավական գնահատականի, և Մինասյանը պետք է պատասխան տա նաև այս սուտ մատնության համար», — այսպես է արձագանքել խորհրդարանի խոսնակը Facebook-ի իր էջում։
Ազգային անվտանգության ծառայությունն, առաջին հերթին, հաղորդում է, որ Վատիկանում Հայաստանի նախկին դեսպանի հրապարակած տեղեկությունը կեղծ է և իրականության հետ ոչ մի աղերս չունի։
Ի՞նչ են գրում սոցցանցերում
Ֆեյսբուքի հայկական տիրույթի օգտատերերն այս պատմությանը ոչ միանշանակ են վերաբերվել։ Ոմանք սատարել են Մինասյանին, մյուսները՝ Միրզոյանին։
Ահա մի քանի մեկնաբանություն․
«Ի՞նչ վստահություն կարող է լինել պետական մարմինների հաղորդագրությունների նկատմամբ՝ պատերազմի ընթացքում նրանց ստերից հետո։ Ոչ մի վստահություն չի լինելու, քանի դեռ Փաշինյանն իր բանդայի հետ չի հեռացել իշխանությունից»։
«Փաշինյանի թիմից ամեն ինչ կարելի է սպասել։ Նա դավաճան է, նրա թիմն էլ»։
«Այնպես եմ հասկանում, որ Մինասյանչիկը դարձել է Կրեմլի խոսնակը։ Մինասյանչիկ, դատարան ներկայացիր այդ ձեռագրի փորձաքննությամբ, ԱԱԾ վկաներով, պետք է քո հայտնաբերած ստորին դատել հարենիքի դավաճանության համար։ Արի, դու հո վախկոտ չե՞ս»։
Ինչո՞ւմ է մեղադրվում Միքայել Մինասյանը
Նրա դեմ քրեական գործ է հարուցվել դեռևս 2020 թ․ մարտին, ապօրինի հարստացման, եկամուտների մասին կեղծ տեղեկությունների հայտարարագրման և հանցավոր ճանապարհով կուտակած ունեցվածքի օրինականացման մեղադրանքով։ Այդ ժամանակ էլ նրա նկատմամբ հետախուզում է հայտարարվել։
2020 թ․ մայիսին դատարանը որոշում է ընդունել Մինասյանին կալանավորելու մասին։
Սակայն 2020 թ․ դեկտեմբերին Հայաստանի Վերաքննիչ դատարանը չեղարկել է Վատիկանում Հայաստանի նախկին դեսպանի կալանքի մասին վճիռը։
Մինասյանի փաստաբանը հայտարարել է, որ իր վստահորդի դեմ քրեական գործը քաղաքական ենթատեքստ ունի, իսկ դատարանի վճիռը գնահատել է որպես Հայաստանի վարչապետի հերթական ձախողում։
«Ցավով պետք է արձանագրեմ, որ եթե Նիկոլ Փաշինյանը Միքայել Մինասյանի նկատմամբ գործ կարելու իր ջանքերի տասը տոկոսն ուղղեր մեր օր օրի փոքրացող հայրենիքի առջև ծառացած արհավիրքները կանխելուն, մեր բոլորիս վիճակն այսօր այդքան ողբալի չէր լինի», — գրել է փաստաբան Միհրան Պողոսյանը Ֆեյսբուքի իր էջում։
