Հայաստանի իշխանությունների և բողոքի շարժման միջև բանակցությունները կրկին ձախողվեցին

22:00, 27 ապրիլի

Վարչապետի ժամանակավոր պաշտոնակատար Կարեն Կարապետյանը մեկնաբանել է գործող իշխանությունների դեմ պայքարի շարժման առաջնորդ Նիկոլ Փաշինյանի հետ չհանդիպելու պատճառը: Նա նշել է, որ Փաշինյանի առաջարկած տարբերակը՝ բանակցել լրագրողների ներկայությամբ, հեռանկարային չէ:

«Բանակցությունները հեռանկարային են այն դեպքում, երբ որ կողմերը մեկը մյուսին լսելու ցանկություն ունեն, մեկը մյուսի դիրքորոշումն ընկալելու ցանկություն ունեն: Հետո իրենք կպայմանավորվեն, թե չէ, ճկուն կլինեն որպես բանակցող, թե չէ, դա արդեն գործընթաց է: Բայց ի սկզբանե, երբ որ հայտարարվում է, որ օրակարգը սա է, և մյուս կողմն իրավունք չունի որևիցե օրակարգ ձևավորել, դա արդեն բանակցություն չի, նույնիսկ չգիտեմ ինչ է»,- պարզաբանել է Կարեն Կարապետյանը:

Նիկոլ Փաշինյանը շարունակում է հայտարարել, որ ինքը վարչապետի «համաժողովրդական» թեկնածուն է, մարդիկ Հանրապետության հրապարակում իրեն ընտրել են որպես երկրի ղեկավար և իշխանությունը այլընտրանք չունի, քան՝ հաշտվել դրա հետ:

Արդեն հայտնի է, որ իշխանական կոալիցիան օրերս լքած Հայ Հեղափոխական Դաշնակցություն կուսակցությունը համաձայնել է Նիկոլ Փաշինյանին վարչապետի պաշտոնում ընտրել: ՀՅԴ կարծիքով՝ թեկնածուն պետք է «համախոհության հիման վրա ներկայացնի կառավարության համապատասխան կազմ և գործունեության ծրագիր»: Խորհրդարանական մյուս երկու խմբակցությունները՝ «Ծառուկյան» և «Հանրապետական», դեռևս չեն հայտարարել՝ արդյոք ներկայացնելու են իրենց թեկնածուն, թե քվեարկելու են Փաշինյանի օգտին:

Ժամեր առաջ

Վարչապետի ժամանակավոր պաշտոնակատար Կարեն Կարապետյանն անհեռանկարային է համարում մասնակցել բանակցություններին, որին նրան հրավիրել էր բողոքի շարժման առաջնորդ Նիկոլ Փաշինյանը:

Հիշեցնենք, որ երեկ երեկոյան՝ շարժման հանրահավաքին, որը պայքարում է Հայաստանի հանրապետական կուսակցության իշխանության դեմ, դրա առաջնորդ Փաշինյանը Կարեն Կարապետյանին այսօր 12:00-ին հրավիրել էր «Մարիոթ» հյուրանոց՝ քննարկելու երկրում ստեղծված իրավիճակն ու դրա լուծումը: Նա հայտարարել էր, որ հանդիպումը պետք է կայանա լրագրողների ներկայությամբ:

Ինչպես ավելի վաղ հայտնել էր JAMnews-ն, արդեն նախկին վարչապետ Սերժ Սարգսյանը նախքան իր հրաժարականը հրաժարվել էր նման ձևաչափի բանակցություններից: Պատմությունը կրկնվում է:

Կարապետյանի մամուլի ծառայությունը նրա անունից հայտարարություն էր տարածել, որում, մասնավորապես, ասվում էր. «Կարեն Կարապետյանը մնում է այն տեսակետին, որ լրատվամիջոցների առջև բանակցությունների անցկացումն արդեն իսկ ենթադրում է, որ բանակցությունների նպատակը որևէ արդյունք արձանագրելը չէ:
Այդ իսկ պատճառով մասնակցել «բանակցությունների», որոնք լուծումներ գտնելու հավանականություն չունեն, վարչապետի պաշտոնակատարը համարում է անհեռանկարային»:

Հայտարարության մեջ ասվում է նաև, որ Փաշինյանի կողմից արժե ընդունել բոլոր խորհրդարանական և արտախորհրդարանական ուժերին ուղղված Հանրապետության նախագահի առաջարկությունը՝ երկրում ստեղծված իրավիճակը և դրանից դուրս գալու ուղիները համատեղ քննարկելու մասին: