Հայաստանի ընդդիմությունը ներխուժել է Հանրային ռադիոյի շենք՝ պահանջելով ուղիղ եթեր
Ընդդիմադիր պատգամավոր, «Քաղաքացիական պայմանագիր» կուսակցության առաջնորդ Նիկոլ Փաշինյանը մոտ 100 համախոհների հետ կարողացել է մուտք գործել Հայաստանի Հանրային ռադիոյի շենք՝ պահանջելով իրեն ուղիղ եթեր տրամադրել: Անվտանգության աշխատակիցը փորձել է խոչընդոտել, բայց չի կարողացել դիմակայել ընդդիմադիր շարժման ակտիվիստների ճնշմանը:
Սա Հայաստանի նախկին նախագահ Սերժ Սարգսյանի իշխանության «վերարտադրության» դեմ ակցիայի շարունակությունն է: Ակցիան սկսվել է երեկ երեկոյան Ազատության հրապարակում: Մանրամասները՝ JAMNews-ի հրապարակման մեջ:
https://jam-news.net/?p=96761&lang=ru
Հանրային ռադիոյի շենքում Նիկոլ Փաշինյանը փորձել է հանդիպել դրա ղեկավար Մարկ Գրիգորյանի հետ, որպեսզի ուղիղ եթերի հնարավորություն ստանա: Սակայն չհասնելով ո՛չ հանդիպման, ո՛չ Հանրային ռադիոյում ուղիղ եթերի՝ Փաշինյանը սկսել է խոսել մամուլի այլ ներկայացուցիչների առաջ: Մասնավորապես, «Ազատություն» ռադիոկայանը ուղիղ եթերով հեռարձակել է այն, ինչ տեղի էր ունենում շենքում:
Այնուհետև Փաշինյանը խնդրել է լրագրողներին իրեն մի քանի րոպե մենակ թողնել և թույլ տալ պատրաստվել ելույթին: Ելույթը կարճ էր: Մասնավորապես, Փաշինյանը կոչ է արել ժողովրդին դուրս գալ փողոց, միանալ իրենց, բողոքի ակցիային, որն այսօր կշարունակվի Երևանի կենտրոնում՝ Ազատության հրապարակում: Նախապես հայտարարված շուրջօրյա ակցիայի նպատակն է թույլ չտալ նախկին նախագահ Սերժ Սարգսյանին դարձյալ դառնալ երկրի ղեկավար:
Նիկոլ Փաշինյանը կրկին մեջբերել է Սերժ Սարգսյանի այն խոստումը, որ նա չի առաջադրվի նախագահի պաշտոնում և չի հավակնի վարչապետի պաշտոնին: Եվ քանի որ Սարգսյանը դրժել է խոստումը, ընդդիմադիր գործիչը և նրա համախոհները իրենց պարտքն են համարում անել ամեն բան, որ նա պարզապես չկարողանա դարձյալ կանգնել իշխանության ղեկին՝ այս անգամ որպես վարչապետ, որը երկրի՝ խորհրդարանական կարգի անցումից հետո դարձել է գլխավոր պաշտոնը:
Իր ելութը Փաշինյանն ավարտել է հետևյալ բառերով. «Կատարե՛ք ձեր քայլը, և Սերժ Սարգսյանը կանի իր հետ քայլը… Մեր երեխաները պետք է ապրեն ազատ երկրում»:
Շարունակական ակցիայի նպատակը հետևյալն է. փողոց դուրս բերել հնարավորինս շատ մարդ, շրջափակել խորհրդարանի շենքը ապրիլի 17-ին (հենց այդ օրն է նշանակված վարչապետի ընտրությունը) և թույլ չտալ քվեարկություն: Համաձայն սահամանդրության՝ եթե վարչապետի ընտրությունը երկու անգամ տապալվի, գործող խորհրդարանը կզրկվի իր լիազորություններից, և կնշանակվեն նոր խորհրդարանական ընտրություններ: Այդպիսով, ըստ ընդդիմադիրների, կփոխվի խորհրդարանական մեծամասնությունը, և չի շարունակվի Սերժ Սարգսյանի իշխանությունը:
Նիկոլ Փաշինյանը վերջին բոլոր օրերին հայտարարում է, որ եթե չհաջողվի հասնել այս շարժման նպատակին, ինքը կհեռանա քաղաքականությունից:
Իսկ շարժումը նա սկսել է երկու շաբաթ առաջ՝ «Իմ քայլը» նախաձեռնությամբ: Նա իր կողմնակիցների հետ անցել է երկրի խոշոր համայքներով՝ Գյումրիից մինչև մայրաքաղաք՝ մոտ 200 կմ՝ կոչ անելով մարդկանց դեմ հանդես գալ Սերժ Սարգսյանի «վերարտադրությանը»: Երեկ Երևանում սկսվել է բազմամարդ հանրահավաք, որից հետո մասնակիցները փակել են քաղաքի կենտրոնական հատվածում երթևեկությունը և գիշերել այնտեղ:
Հենց Փաշինյանի խոսքով՝ գիշերն իրենք շատ չեն եղել՝ մոտ 200 մարդ: Ուստի նա տեղին է համարում օգտագործել բոլոր հնարավորությունները՝ փողոց դուրս գալու իրենց կոչը հնարավորինս շատ մարդկանց հասցնելու համար:
Իշխող Հանրապետական կուսակցությունը այսօր առավոտյան արդեն առաջադրել է Սերժ Սարգսյանի թեկնածությունը վարչապետի պաշտոնում: Կուսակցության նիստը տեղի է ունեցել մայրաքաղաքից ոչ հեռու գտնվող Ծաղկաձոր քաղաքում:
