Հայաստանի ընդդիմությունը թավշյա հեղափոխություն է սկսում
Երևանի գլխավոր հրապարակում ապրիլի 17-ին երեկոյան սկսվեց անհնազանդության շարժման հերթական բազմամարդ հանրահավաքը: Մարդիկ, որոնք փողոց են դուրս եկել դեռևս ապրիլի 13-ին, որպեսզի թույլ չտան, որ Սերժ Սարգսյանը վարչապետ ընտրվի, շարունակում են ցույցեր անել նաև նրա ընտրվելուց հետո
Հանրահավաքը սկսվեց դրա առաջորդ, խորհրդարանական «Ելք» ընդդիմադիր խմբակցության և «Քաղաքացիական պայմանագիր» կուսակցության ղեկավար Նիկոլ Փաշինյանի սովորական ողջույնով. «Հայաստանի ազատ քաղաքացիներ»: Սա և այլ արդեն ավանդական դարձած «Հայաստանի հպարտ քաղաքացիներ» ողջույնը դարձել են շարժման խորհրդանիշները:
Հայաստանի ոստիկանությունը պահանջում է դադարեցնել անհնազանդության ակցիան
Փաշինյանը հայտարարեց, որ տեղի է ունեցել ցավալի և միաժամանակ ծիծաղելի իրադարձություն. Սարգսյանին վարչապետ են ընտրել: Փաշինյանը կոչ է արել շարունակել պայքարը, և այդ ժամանակ հաղթանակն անխուսափելի կլինի:
Հանրահավաքի գլխավոր կոչը հետևյալն էր. պայքարը պետք է խաղաղ լինի, որպեսզի ոստիկանությունն առիթ չունենա ցրելու ցույցը և ուժ կիրառելու:
Ելույթ ունեցողները նշել են, որ հենց ուսանողությունն է մեծ ներդրում ունեցել ակցիայի կայացման գործում: Հայտարարություն հնչեց նաև, որ հայկական սփյուռքի հայտնի ներկայացուցիչները սատարում են շարժմանը:
«Մեր գործողությունները մտածված էին, պլանավորված և արդյունավետ: Դրանք կշարունակվեն այնքան, մինչև իշխանությունը ժողովրդին անցնի: Մենք պետք է հասկանանք մեր շարժման էությունը: Մենք շարունակելու ենք մեր գործողությունները: Մենք պարալիզացնելու ենք այս երթևեկությունը, իշխանության գործունեությունը: Մենք շարունակելու ենք մեր գործողությունները: Սա նյարդերի պայքար է: Եվ մենք հաղթելու ենք: Թավշյա հեղափոխություն է տեղի ունենալու», — հանրահավաքին հայտարարել է շարժման ակտիվիստ Տիգրան Ավինյանը:
Հանրահավաքից մի քանի ժամ առաջ՝ ընտրվելուց հետո Սերժ Սարգսյանը խորհուրդ էր տվել խորհրդարանի պատգամավորներին գործադրել բոլոր ջանքերը և փողոցից խորհրդարան վերադարձնել ընդդիմադիր առաջնորդ, «Ելք» խորհրդարանական խմբակցության և «Քաղաքացիական պայմանագիր» կուսակցության ղեկավար Նիկոլ Փաշինյանին.
«Դա կլինի ձեր մեծագույն վաստակը: Երբեք, որևէ ժամանակ անձամբ ես և ներքաղաքական ուժն արյան ծարավ չի ունեցել: Մենք արյուն շատ ենք տեսել, շատ, բայց նույնիսկ թշնամու արյան ծարավ ես երբեք չեմ ունեցել: Եթե դուք պետական հիմնարկների գրավումը համարում եք խաղաղ ցույցեր, եթե դուք համարում եք, որ հիմա ցուցարարները պետք է գան և Ազգային ժողովի շենքում ձեր աշխատասենյակներում նստելով ձեր փոխարեն օրենքներ գրեն՝ դա ձեր մոտեցումներն են, ձեր պատկերացնումներն են: Եթե ոչ, դուք պետք է հակառակ կողմում լինեք, օրենքի կողմում: Չի կարող ժողովուրդը լինել օրինազանց: Եթե ժողովուրդը լիներ օրինազանց, ապա փողոցներում միլիոնավոր մարդիկ պետք է լինեին: Դուք բոլորից լավ գիտեք, թե քանի մարդ է մասնակցում այս ցույցերին, բայց, ինչպես ասացի, սա ընդամենը խորհուրդ է, ոչ պարտադրանք, ոչ դատավճիռ և ոչ էլ մեղադրանք»:
Պատասխանելով այն մեղադրանքին, թե նախկին նախագահը ցանկացել է վարչապետ դառնալ և երկարաձգել իր իշխանությունը՝ Սերժ Սարգսյանն ասել է.
«Մարդիկ դեռ ամբողջությամբ չեն ընկալել, որ այլևս չկա մարդու իշխանություն, որ մարդու փոխարեն իշխանության է եկել քաղաքական ուժ: Սա լինելու է ոչ թե Սերժ Սարգսյանի երրորդ ժամկետը, այլ կառավարման խորհրդարանական համակարգում Հանրապետական կուսակցության ղեկավարման առաջին ժամկետը»:
Ոստիկանությունը քաղաքում մեծ ուժեր և տեխնիկա է կենտրոնացրել ցույցը ցրելու համար և, տարածված մեդիահաղորդագրության համաձայն, ցանկացած պահի պատրաստ է կասեցնել անհնազանդության շարժման մասնակիցների անօրինական գործողությունները հատուկ միջոցների կիրառմամբ:
Անհնազանդության շարժման մեկնարկի և վերջին օրերի մասին բոլոր մանրամասները՝ JAMnews-ի նյութերում.
Հայաստանի ընդդիմությունը ներխուժել է Հանրային ռադիոյի շենք՝ պահանջելով ուղիղ եթեր
Հայաստանի ոստիկանությունը պահանջում է դադարեցնել անհնազանդության ակցիան
Հայաստանում իշխանության համար պայքարի շոուականացումը
JAMnews-ը շարունակում է հետևել իրադարձությունների ընթացքին:
