Հայաստանի առողջապահական համակարգում վերջին շրջանի փոփոխությունները թվերով

Հուլիսի 5-ի դրությամբ Հայաստանում կորոնավիրուսով վարակվածների թիվն ավելացել է 706–ով և դարձել 28 606:

Մահացել է ևս 7 մարդ: Մահացածների ընդհանուր թիվը հասավ 484-ի։

Առողջացել է ևս 205 պացիենտ, նրանց ընդհանուր թիվը կազմում է 16 140։ Շարունակում են բուժում ստանալ  11 824։

Ընդհանուր առմամբ, կատարվել է 122 682 թեստավորում, անցած օրվա ընթացքում՝ 2 437:

● Հայաստանի վարչապետի գործունեությունից գոհ է բնակչության մեծ մասը․ GALLUP International–ի հարցում

● Կանայք քաղաքականության մեջ, բանակն առանց կորոնավիրուսի, ամառն առանց զբոսաշրջիկների. «Շաբաթը Կովկասում» «JAMnews»-ից

Փոխվարչապետ, արտակարգ դրության ժամանակահատվածում նաև պարետ Տիգրան Ավինյանը Facebook-ի իր էջում ամփոփել է վերջին շրջանում առողջապահական համակարգում տեղի ունեցած փոփոխությունները թվերով․

«Սկզբնական փուլում կորոնավիրուսային հիվանդության հայտնաբերման նպատակով իրականացվող օրական մինչև 300 թեստի փոխարեն մայիսին անցկացվում էր արդեն մինչև 1000 թեստ, իսկ հունիսին կարողությունների հետագա զարգացման շնորհիվ հետազոտությունների թիվը կրկնապատկվեց՝ հասնելով օրական ավելի քան 2000 թեստի»:

Փոխվարչապետը տեղեկացնում է, որ պացիենտների հիվանդանոցային բժշկական օգնությունն իրականացվում է 19 բժշկական կազմակերպություններում, որից 7-ը մարզերում, իսկ 12-ը` Երևանում։ Ընդ որում ամբողջ ընթացքում իրականացվել է բուժանձնակազմի ուսուցում․

«5680 բուժաշխատող մասնակցել է նոր կորոնավիրոսային վարակի, դրա կանխարգելման ու հսկողության, նմուշառման տեխնիկայի վերաբերյալ դասընթացների։ Ավելի քան 2270 հոգի մասնակցել է նեղ մասնագիտական միջազգային ու տեղական վեբինարների նոր կորոնավիրուսային վարակի վերաբերյալ»:

Տիգրան Ավինյանը հայտնում է նաև, որ Չինաստանից պարետատան տեղափոխած հումքն օգտագործելով՝ Մոլեկուլային կենսաբանության ինստիտուտը սկսել է պատրաստել կորոնավիրուսի ախտորոշման թեստեր․

«Արդեն իսկ 5500 թեստեր տրամադրվել են ԱՆ Հիվանդությունների վերահսկման և կանխարգելման ազգային կենտրոնին: Ընդհանուր առմամբ այս փուլում նախատեսվում է պատրաստել 100 000 հայկական արտադրության թեստ»: