Հայաստանը կդառնա տարանցիկ ճանապարհ՝ Իրանի ու Եվրասիական տնտեսական միության երկրների միջև
Եվրասիական տնտեսական միության և Իրանի միջև ստորագրվեց ազատ առևտրի գոտու ստեղծման մասին համաձայնագիր: Հայաստանի համար սա կարևոր էր, և երկրի նոր կառավարությունը դրական է գնահատում այս գործընթացը:
Իրանի հետ ԵԱՏՄ բանակցությունները մեկնարկել են Հայաստանի նախաձեռնությամբ: Պաշտոնական Երևանը միության անդամ-պետությունների հետ ցամաքային սահման չունի և Իրանի հետ համագործակցությունը, իշխանությունների խոսքով, մեծ հնարավորություններ է ստեղծում Հայաստանի տնտեսության զարգացման համար:
Վարչապետ Նիկոլ Փաշինյանը հայտարարել է, որ Հայաստանի շահերն այս համաձայնագրում լիարժեք ներկայացված են:
Փորձագետները նշում են, որ Հայաստանը կդառնա տարանցիկ ճանապարհ՝ Իրանի ու Եվրասիական տնտեսական միության մյուս երկրների՝ մասնավորապես Ռուսաստանի միջև: Նաև Հայաստանի համար կբացվի իրանական շուկան, և հայ արտադրողները առանց խոչընդոտների կներկայացնեն իրենց ապրանքը:
Իրանագետ Արման Վարդանյանի խոսքով՝ ազատ առևտրի գոտու ստեղծմամբ մի քանի հարյուր անուն ապրանքների մաքսատուրքերը կզրոյացվեն.
«Իրանը նախկինում վարել է հովանավորչական տնտեսական քաղաքականություն, որպեսզի պաշտպանի տեղական ապրանքը՝ բարձր մաքսատուրքեր է սահմանել ներկրվող ապրանքների վրա, ինչի հետևանքով հայկական ապրանքները չէին կարողանում մուտք գործել իրանական շուկա, դիմանալ մրցակցությանը»:
Իրանագետը նշել է, որ հայկական ապրանքները մաքսատուրքերի պատճառով թանկ էին վաճառվում իրանական շուկայում, և դրանց զրոյացնելուց հետո կդառնան մրցակցային:
«Դեռևս պարզ չէ, թե քանի ապրանք է ներկրվելու Իրան առանց մաքսատուրքի, ինչ ապրանքներ են լինելու դրանք: Երբ հրապարակվի համաձայնագիրը, կկարողանանք ավելի կոնկրետ խոսել ապրանքների մասին»,— ասել է Արման Վարդանյանը:
