Վրաստանի ԿԸՀ ընդդիմադիր անդամները կրկնակի ընտրություններ են պահանջում
Կրկնակի ընտրությունների պահանջ Վրաստանում
Վրաստանի Կենտրոնական ընտրական հանձնաժողովի (ԿԸՀ) ընդդիմադիր անդամները պահանջում են ԿԸՀ-ի անհապաղ նիստ անցկացնել և կրկնակի ընտրություններ նշանակել, քանի որ նրանց կարծիքով՝ հոկտեմբերի 26-ին կայացած խորհրդարանական ընտրությունների ժամանակ խախտվել է քվեարկության գաղտնիությունը:
«Ընտրությունների օրվանից անցել է 10 օր, և այդ 10 օրերի ընթացքում քաղաքական կուսակցությունները, հասարակական կազմակերպությունները, և որ ամենակարևորն է, վրացի ընտրողները բողոքել են Սահմանադրության հիմնարար սկզբունքի` քվեարկության գաղտնիության խախտման դեմ:
ԿԸՀ ընդդիմադիր անդամները հանձնաժողովի նախագահ Գիորգի Կալանդարիշվիլիից պահանջում են անհապաղ գումարել հանձնաժողովի նիստ, որի ժամանակ ընտրությունները կհամարվեն չեղյալ: Մենք պահանջում ենք անցկացնել կրկնակի ընտրություններ»,— հայտարարել է ԿԸՀ-ում «Միասնություն-Ազգային շարժում» կոալիցիայի ներկայացուցիչ Դավիթ Քիրթաձեն:
ԿԸՀ-ի մեկ այլ ընդդիմադիր անդամ Գիորգի Սիորիձեի խոսքով՝ ընտրությունների ժամանակ քվեարկության գաղտնիության խախտումը հաստատվել է նաև Վրաստանի հարավում գտնվող Տետրի-Ծկարո քաղաքի դատարանի կողմից, որը չեղյալ է ճանաչել քվեարկության արդյունքները 30 տեղամասերում, և դա անհերքելի փաստ է:
«Սա նշանակում է, որ առկա են իրավական հիմքեր ընտրությունները չեղյալ հայտարարելու և կրկնակի ընտրություններ նշանակելու համար»,— կարծում է Սիորիձեն։
Նոյեմբերի 4-ին դատավոր Վլադիմեր Խուչուան չեղյալ է համարել քվեարկության արդյունքները Տետրի-Ծկարոյի և Ծալկայի համայնքների 30 տեղամասերում՝ որոշելով, որ դրանցում խախտվել է քվեարկության գաղտնիությունը: Վրաստանի երիտասարդ իրավաբանների ասոցիացիան, որը ներկայացրել էր այդ հայցը, կարծում է՝ այդ որոշումը ձևավորել է նոր նախադեպ:
