Կրակել են Վրաստանի առաջին նախագահի որդու վրա։ Ցոտնե Գամսախուրդիան ծանր վիրավորվել է

Առաջին նախագահի որդուն հիվանդանոց են տեղափոխել անգիտակից վիճակում։ Նա կրծքի և գլխի հատվածում դանակի մի քանի հարված է ստացել։

Բժիշկները երկու բարդ վիրահատություն են արել, մեկը՝ սրտի և թոքերի հատվածում, մյուսը՝ գլխի վրա։ Հիվանդի վիճակը գնահատվում է որպես ծայրահեղ ծանր։

Հանցագործը փախել է։ Ոստիկանությունը դեռ չի նշում, թե ով է հարձակվել Ցոտնե Գամսախուրդիայի վրա։

ՆԳՆ-ն արդեն հետաքննություն է սկսել Վրաստանի ՔՕ 19-108 հոդվածով՝ դիտավորյալ սպանության փորձ։

Ըստ վարկածներից մեկի՝ հարձակվողը Գամսախուրդիայի հարևանն էր, որի հետ նա ինը տարի առաջ միջադեպ է ունեցել։ 2011 թ-ի ապրիլին Գամսախուրդիան մեղավոր էր ճանաչվել Դավիթ Բաջելիձեին վիրավորելու համար և դատապարտվել ինը տարվա և վեց ամսվա ազատազրկման։

Վրացական պարբերականներից մեկը, վկայակոչելով իր անանուն աղբյուրը, գրում է, որ դա վրեժ էր։

Որոշ դիտորդներ չեն բացառում, որ կատարվածը կարող է կապված լինել Ցոտնե Գամսախուրդիայի ընդդիմադիր գործունեություն հետ։ Մի քանի ժամ առաջ Ֆեյսբուքում Գամսախուրդիան քննադատել և ցենզուրայից դուրս արտահայտություններ էր արել վարչապետի կրոնական հարցերով խորհրդական Սոզար Սուբարիի հասցեին։

•2018 թ-ի դեկտեմբերին Ցոտնեն ու նրա եղբայր Կոնստանտինեն հացադուլ էին հայտարարել՝ իրենց հոր մահվան գործի քննությունն ավարտին հասցնելու պահանջով։

•Զվիադ Գամսախուրդիան Վրաստանի նախագահն էր 1991-1992 թթ-ին ընդամենը ինն ամսով։ 1992 թ-ի հունվարին նա պաշտոնանկ արվեց զինված հեղաշրջման հետևանքով։ Գամսախուրդիան փախավ Վրաստանից։ Մահացավ 1993 թ-ի վերջին չբացահայտված հանգամանքներում։