Հայաստանում կորոնավիրուսով վարակվածների թիվը շարունակում է աճել՝ 374 նոր դեպք

Մայիսի 23-ի դրությամբ Հայաստանում  կորոնավիրուսով վարակվածների թիվն ավելացել է 374-ով և հասել 6 302-ի։ Բուժվել է 2 936 պացինետ: Շարունակում են բուժում ստանալ 3 257 մարդ:

Կորոնավիրուսից մահվան ևս երեք դեպք է արձանագրվել։ Մահացածների ընդհանուր թիվը հասավ 77-ի։

• Հայաստանում կան կորոնավիրուսով վարակված երեխաներ և հղիներ
• Անսպասելի, բայց սպասված. ինչպես հեռավար կրթությունը դպրոցից տուն մտավ

Առողջապահության նախարար Արսեն Թորոսյանը ֆեյսբուքյան իր էջում պատմել է կորոնավիրուսային հիվանդությանը բնորոշ ախտանիշներից մեկի մասին։

«Ախտանիշներից մեկն արյան՝ թթվածնով հագեցվածությունն է, կամ ինչպես բժիշկներն են ասում` թթվածնի սատուրացիան (SpO2): Այն նորմայում պետք է լինի 95%-ից բարձր, ինչը նշանակում է, որ թոքերում թթվածնի փոխանցումն արյան մեջ տեղի է ունենում բավարար քանակով և օրգանիզմում թթվածնաքաղց չի առաջանում», – գրել է նախարարը:

Երբ կորոնոավիրուսի պատճառով առաջանում է թոքաբորբ և թոքերի մի հատվածը դուրս է մնում թթվածնի փոխանակման գործընթացից, սատուրացիան սկսում է անկում ապրել: Ինչքան սատուրացիան ցածր է, այնքան թոքային հյուսվածքի ախտահարման ծավալը մեծ է և պացիենտի վիճակը ծանր է:

«Հենց սատուրացիան բարձրացնելու համար են բժիշկները պացիենտներին թթվածնաթերապիա անում՝ սկզբում սովորական դիմակով շնչացնելով, իսկ ավելի ծանր դեպքերում թոքերի ոչ-ինվազիվ և ինվազիվ արհեստական օդափոխությանը միացնելով», — նշել է նախարարը:

Այս ցուցանիշը, ըստ նախարարի, բոլոր պացիենտների մոտ օրական մի քանի անգամ չափվում է։ Նախարարն ուրախությամբ հայտնել է, որ իր մոտ «բարեբախտաբար թթվածնի սատուրացիան դեռ 98% է»: