«Կորոնավիրուսով վարակված տանը սպասող քաղաքացի այլևս չկա» - Հայաստանի առողջապահության նախարար

Հունիսի 23-ի դրությամբ Հայաստանում կորոնավիրուսով վարակվածների թիվն ավելացել է 418–ով և դարձել 21 006:

Մահացել է ևս 12 մարդ: Մահացածների ընդհանուր թիվը հասավ 372-ի։

Առողջացել է ևս 1 013 պացինետ, նրանց ընդհանուր թիվը կազմում է 10 144։ 10 364-ը շարունակում են բուժում ստանալ։

Ընդհանուր առմամբ, կատարվել է 98 117 թեստավորում, անցած օրվա ընթացքում՝ 1 274:

• Ում և ինչ օժանդակություն է տրամադրվում Հայաստանում կորոնավիրուսի տնտեսական հետևանքների հաղթահարման ծրագրերով
• Կորոնավիրուսն ըննդեմ բիզնեսի։ Տեսանյութ Երևանից

Հունիսի 22-ին պարետատան նիստից հետո առողջապահության նախարար Արսեն Թորոսյանը հայտարարել է, որ «երեկ երեկոյից կորոնավիրուսով վարակված տանը սպասող քաղաքացի այլևս չկա»․

«Այն քաղաքացիները, որոնց մոտ հաստատվում է կորոնավիրուսային հիվանդություն և նրանք կարիք ունեն հոսպիտալիզացիայի իրենց առողջական վիճակով պայմանավորված, հրատապ հոսպիտալացվում են: Այս առումով մենք կարող ենք ասել, որ այդ խնդիրը լուծված է: Հաջորդ խնդիրը մնում է որոշ բուժհաստատություններից դեպի կորոնավիրուսային հիվանդությամբ զբաղվող հիվանդանոցներ տեղափոխումը, դա նույնպես մոտ օրերս կլուծվի»։

Նախարարի խոսքով՝ մոտակա օրերին ևս մի քանի հիվանդանոցներ կմիանան կորոնավիրուսի դեմ պայքարին:

«Մենք պետք է շարունակենք կանոնների պահպանումը, որպեսզի ունենանք ավելի ցածր թվեր», —  կրկին հորդորել է երկրի բնակիչներին Թորոսյանը: