Կորոնավիրուս․ ամենավտանգավոր իրավիճակն Իտալիայում է, ամենաանկանխատեսելին՝ Իրանում։ Հիմնական փաստեր և թվեր աշխարհում և Կովկասում մարտի 12–ին

Հիմնական աղբյուր՝ CNN–ի և Բի–Բի–Սիի հատուկ ռեպորտաժներ։

• Առողջապահության համաշխարհային կազմակերպությունը մարտի 11–ի երեկոյան հայտարարել է COVID-19 կորոնավիրուսի գլոբալ պանդեմիայի մասին։

• Աշխարհում կորոնավիրուսով 126,258 հիվանդ կա՝ ըստ մարտի 12–ի առավոտյան տվյալների՝ այն պահից ի վեր, երբ առաջին դեպքերն են հայտնաբերվել կենտրոնական Չինաստանում 2019 թ–ի դեկտեմբերին։

• Նրանցից 4,638–ը մահացել է։

• 68,284 մարդ ապաքինվել է։

• Կորոնավիրուսի տարածման վիճակագրությանը կարելի է հետևել այստեղ։ 

•Կորոնավիրուս․ պանդեմիա է հայտարարվել։ Ի՞նչ է դա նշանակում, և ի՞նչ սպասել

•Ինչպե՞ս խուսափել կորոնավիրուսից, և ո՞րն է դրա սպառնալիքը։ Հարցերի պատախաններ՝ երկու րոպեանոց տեսանյութում 

•Կորոնավիրուս․ այլևս ոչ մի գրկախառնություն, ողջույններ՝ միայն արմունկներով և կոշիկներով։ ՏԵՍԱՆՅՈՒԹ

• Ամեն ինչ՝ կորոնավիրուսի մասին

Առավել շատ այս պահին տուժել են այս հինգ երկրները․

• Մայրցամաքային Չինաստան․ 80,932 վարակման դեպք, 3,056 մահացության դեպք։

• Իտալիա․12,462 դեպք, 827 մահացած հիվանդ։

• Իրան․ 9,000 դեպք, 354 զոհ։

• Հարավային Կորեա․ 7,869 դեպք, մահացության 66 դեպք։

• Ֆրանսիա․ 2,284 դեպք, 48 զոհ։

Իրավիճակը Կովկասում

• Ադրբեջանում 14 հիվանդ կա, նրանցից երեքն ապաքինվել են և դուրս գրվել հիվանդանոցից, մեկը մահացել է։ Բոլոր վարակվածներն Իրանից են ժամանել։ Ադրբեջանը փակել է Իրանի հետ սահմանը, ողջ երկրում փակ են դպրոցներն ու մանկապարտեզները։

• Չորս հիվանդ կա Հայաստանում։ Առաջին վարակվածն Իրանից էր եկել, մյուս երեքն՝ Իտալիայից հատուկ չվերթով, որը կազմակերպվել էր Հայաստանի քաղաքացիների համար։ Երկիրը վիզային ռեժիմ է մտցրել Իրանի հետ։

• 24 հիվանդ կա Վրաստանում։ Երկուսն Իրանից են ժամանել, մյուսներն՝ Իտալիայից։ Վրաստանը փակել է Իրանի հետ սահմանը, փակ են դպրոցներն ու մանկապարտեզները։

Խորանում է ճգնաժամն Իտալիայում․ երկիրը վարակվածների թվով երկրորդն է Չինաստանից հետո

• Իտալիայում մեկ օրում՝ մարտի 11–ին, ավելի քան չորս հազար մարդ է վարակվել կորոնավիրուսով։ Այժմ վարակվածների թիվը հասել է 12,462–ի, նրանցից 827–ը մահացել է։ Վարակվածների թվում է «Յուվենտուս» ֆուտբոլային ակումբի մարզիկ Դանիել Ռուգանին։

• Մարտի 10–ից Իտալիան ամբողջությամբ կարանտինի մեջ է։ Մարտի 12–ից նոր արգելք է ավելացել․ փակ են արդեն ոչ միայն ուսումնական հաստատությունները, գրասենյակներն ու թանգարաններն, այլ նաև բոլոր սրճարաններն ու ռեստորանները, բոլոր խանութները՝ բացառությամբ մթերայինների, գործում են դեղատները։

Իրան․ իրավիճակը կրիտիկական է, սարսափելի տեսանյութ՝ Ղոմ քաղաքի դիահերձարանից

• Կորոնավիուսով վարակվածների և դրանից մահացածների թվի կտրուկ աճ Իրանում։ Վարակը տարածվել է երկրի բոլոր շրջաններում։ Պաշտոնապես հաղորդվում է 9 հազար հիվանդի մասին, որոնցից 354–ը մահացել է։ Սակայն միջազգային և տեղի մասնագետներն ասում են, որ, ըստ ամենայնի, թվերը շատ ավելի մեծ են, քան հաղորդվում է։

Սոցցանցերում տարածվել է այս տեսանյութը, որում ցուցադրված է Ղոմ քաղաքի դիահերձարանը՝ լի դիերով, որոնք պետք է կորոնավիրուսի առկայության ստուգում անցնեն։

Եվրոպայում շոկի մեջ են 26 եվրոպական երկրների համար մուտքը փակելու ԱՄՆ որոշումից

• ԱՄՆ–ում վարակման քանակի արագ աճ է գրանցվել՝ ավելի քան 600 դեպք մարտի 11–ի ընթացքում, այդ թվում՝ Նյու Յորքում։ Ընդհանուր առմամբ, մարտի 12–ի առավոտյան դրությամբ գրանցվել է 1,312 դեպք։ Հիվանդներից 70–ն ԱՄՆ քաղաքացիներ են, որոնք տարհանվել են Չինաստանից և Ճապոնիայում գտնվող Diamond Princess զբոսանավից։ Մնացած դեպքերն ԱՄՆ տարածքում հայտնաբերվել և հաստատվել են 43 նահանգներում։ 38 մարդ է մահացել կորոնավիրուսից։

• Նախագահ Դոնալդ Թրամփը մարտի 11–ի երեկոյան ուղերձ է հղել ազգին, որում խոսել է երկրում հաստատված արտակարգ իրավիճակի մասին և Չինաստանին մեղադրել նրա համար, որ վարակն առաջացել է հենց այնտեղ։ Նույն օրն ավելի վաղ ելույթ ունենալիս Թրամփի ազգային անվտանգության հարցերով խորհրդական Ռոբերտ Օ’Բրայենը նույնպես հարկ է համարել ընդգծել, որ «այդ վարակն առաջացել է ոչ թե ԱՄՆ–ում, այլ Չինաստանի Հուբեյի շրջանի Ուհան քաղաքում»։

• Թրամփը հայտարարել է, որ ԱՄՆ–ն փակում է մուտքը Շենգենյան գոտու 26 եվրոպական երկրների համար։ Վաշինգտոնում մի քանի եվրոպական դեսպաններ հայտարարել են, որ շոկի մեջ են, քանի որ իրենց չեն զգուշացրել՝ չնայած այն բանին, որ իրենք միշտ կապի մեջ են եղել նախագահի վարչակազմի հետ վերջին մի քանի օրվա ընթացքում։

• Կորոնավիրուսով վարակման ևս երկու դեպք է գրանցվել Սթենֆորդի համալսարանի աշխատակիցների և ուսանողների շրջանում։ Այնտեղ արդեն ընդհանուր առմամբ երեք հիվանդ կա։ Դասընթացներն ամբողջությամբ առցանց են անցկացվում։ Վարչակազմը խնդրանքով դիմել է այն ուսանողներին, որոնք բնակվում են համալսարանի տարածքում, հնարավորինս մեկնել այդտեղից։ Հարվարդն ու երկրի մյուս համալսարաններն անցել են առցանց ռեժիմի և ուսանողներին խնդրում են հեռանալ կամպուսի տարածքից։

• Սեզոնը կասեցրել է ԱՄՆ բասկետբոլի ազգային լիգան այն բանից հետո, երբ մարզիկներից մեկի մոտ կորոնավիրուս է հայտնաբերվել։

Թոմ Հենքսը կորոնավիրուսով է վարակվել Ավստրալիայում

• Կորոնավիրուսով վարակվել են դերասան Թոմ Հենքսն ու նրա կինը՝ դերասանուհի Ռիտա Ուիլսոնը։ Նրանք բուժվում են Ավստրալիայում, որտեղ նոր ֆիլմի նկարահանումների էին մասնակցում։ Ընդհանուր առմամբ, երկրում հաստատվել է 126 դեպք, չորս հիվանդ մահացել է։

Մարտի 12–ին Ավստրալիայի կառավարությունը հայտարարել է, որ 17,63 մլն ավստրալական դոլար է տրամադրում կորոնավիրուսի դեմ պայքարի համար։ Փաթեթը ներառում է աշխատավարձերի սուբսիդիաներ և դրամական օգնություն փոքր բիզնեսին։