«Հայաստանին այժմ անհրաժեշտ է ամուր թիկունք, բայց կորոնավիրուսի տարածումը դեռ շարունակվում է» - վարչապետ

Հուլիսի 17-ի դրությամբ Հայաստանում կորոնավիրուսով վարակվածների թիվն ավելացել է 442-ով և դարձել 34 001:

Մահացել է ևս 13 մարդ: Մահացածների ընդհանուր թիվը հասավ 620-ի։

Առողջացել է ևս 561 պացիենտ, նրանց ընդհանուր թիվը կազմում է 22 492։ Շարունակում են բուժում ստանալ 10 692-ը։

Ընդհանուր առմամբ, կատարվել է 143 114 թեստավորում, անցած օրվա ընթացքում՝ 1 704:

● Կորոնավիրուսը կարող է օդով փոխանցվել։ Սա հայտարարվել է պաշտոնապես և փոխում է համավարակի դեմ պայքարի ողջ համատեքստը

● Տասը հոգուց ավելի չհավաքվել։ Վրաստանի կառավարությունն ուզում է երկարաձգել սահմանափակումներն՝ արտակարգ դրություն չհայտարարելով

«Հայաստանին այժմ անհրաժեշտ է ամուր թիկունք, բայց կորոնավիրուսի տարածումը դեռ շարունակվում է», — հուլիսի 16-ի կառավարության նիստին հայտարարեց վարչապետ Նիկոլ Փաշինյանը։

Նա տեղեկացրեց, որ վերջին շաբաթվա ընթացքում առողջապահական համակարգի լարվածությունը որոշակիորեն թուլացել է․

«Մենք վերլուծում ենք, որ այդ լարվածության թուլացումը կարող է կապված լինել միայն հակահամաճարակային գործողությունների և մասնավորապես դիմակների կրման ծավալների ընդլայնման հետ: Ցավոք, ոչ բոլորն են մինչև այս պահը կրում դիմակներ, և մեր կոչն է` անպայման հետևել հակահամաճարակային կանոններին»:

Առողջապահության նախարար Արսեն Թորոսյանը հայտնում է, որ ծանր և ծայրահեղ ծանր վիճակում է գտնվում 650 վարակակիր, 50 մարդ միացված է արհեստական շնչառության սարքերի: Թորոսյանի խոսքով՝ վիճակը կառավարելի կայուն, բայց ծանր է։

«Ցավոք սրտի, դեռ բացարձակ թվով բավականին շատ դեպքեր են արձանագրվում. 554 թիվն, իհարկե, այն ցանկալի թիվը չէ, որ մենք ձգտում ենք ունենալ: Սակայն համեմատական անցկացնելով մոտավորապես 2 շաբաթվա վաղեմության թվերի և իրավիճակի հետ, այնուամենայնիվ, պետք է արձանագրենք, որ առողջապահական համակարգի լարվածության, մահճակալների ազատ լինելու և մեր քաղաքացիներին արագ և պատշաճ բուժօգնություն տրամադրելու մասով մենք ունենք էական առաջընթաց»: