Կորոնավիրուսի երկրորդ դեպքը Վրաստանում։ Վարակը հայտնաբերվել է Իտալիայից վերադարձած կնոջ մոտ

Կորոնավիրուսի ևս մեկ դեպք է Վրաստանում հաստատվել լաբորատոր ստուգման արդյունքում։

Վարակը հայտնաբերվել է Վրաստանի քաղաքացու մոտ, որը հնգօրյա ուղևորություն էր ունեցել դեպի Իտալիա։ Նա երկիր է վերադարձել Քութայիսիի օդանավակայանով։ Ժամանման օրը 31-ամյա կինը ոչ մի ախտանիշ չի ունեցել, սակայն հաջորդ օրը նրա ինքնազգացողությունը վատթարացել է, և նա բժշկի է դիմել։

Հիվանդի վիճակը ներկա պահին բավարար է։ Նա գտնվում է Թբիլիսիի ինֆեկցիոն հիվանդանոցում։ Ըստ կլինիկայի ներկայացուցչի՝ ներկա պահին ջերմություն կամ այլ ախտանիշներ չկան։

•Ինչպե՞ս Վրաստանը «դիմավորեց» կորոնավիրուսի առաջին դեպքը։ Իշխանությունների և քաղաքացիների արձագանքը 

•Ինչպե՞ս չհիվանդանալ կորոնավիրուսով, և ո՞րն է դրա սպառնալիքը։ Հարցերի պատասխաններ 2–րոպեանոց տեսանյութում 

Մասնագետներն այժմ համաճարակային հետազոտություն են անցկացնում, այսինքն՝ փնտրում են մարդկանց, որոնք շփվել են վարակված կնոջ հետ նրա՝ Վրաստան վերադառնալուց հետո։

Այժմ Լուգարայի անվան լաբորատորիան ստուգում է ևս երկու պացիենտի։

«Չի բացառվում, որ նրանց մոտ ևս կորոնավիրուս հայտնաբերվի», — ասել է Հիվանդությունների վերահսկման կենտրոնի ղեկավար Ամիրան Գամկրելիձեն։

Ներկա պահին Վրաստանում կարանտինում է 87 մարդ։ Նրանցից 35–ը մանկական բաժանմունքներում են։

Մասնագետները հորդորում են Իտալիայից վերադարձած բոլոր քաղաքացիներին մեկուսացման մեջ մնալ 14 օր։ Եթե որևէ մեկի մոտ այդ ընթացքում ի հայտ գա ջերմություն, հազ, շնչառական խնդիրներ, դիմել բժշկի։

Ավելի վաղ վարակը հայտնաբերվել էր Վրաստանի քաղաքացու մոտ, որն Իրանից էր վերադարձել Ադրբեջանի տարածքով։