Հայաստանում կորել է կորոնավիրուսից մահացած տատիկի դին

Հուլիսի 2-ի դրությամբ Հայաստանում կորոնավիրուսով վարակվածների թիվն ավելացել է 593–ով և դարձել 26 658:

Մահացել է ևս 6 մարդ: Մահացածների ընդհանուր թիվը հասավ 459-ի։

Առողջացել է ևս 473 պացիենտ, նրանց ընդհանուր թիվը կազմում է 15 036։ Շարունակում են բուժում ստանալ 11 010-ը։

Ընդհանուր առմամբ, կատարվել է 115 765 թեստավորում, անցած օրվա ընթացքում՝ 2 100:

• Ում և ինչ օժանդակություն է տրամադրվում Հայաստանում կորոնավիրուսի տնտեսական հետևանքների հաղթահարման ծրագրերով
• Կորոնավիրուսն ըննդեմ բիզնեսի։ Տեսանյութ Երևանից

Գյումրեցի 82-ամյա Սոնիկ Կարապետյանի դին, ով մահացել է հունիսի 29-ին, Երևանի Սուրբ Գրիգոր Լուսավորիչ բժշկական կենտրոնում, կորել է: Այս մասին  ֆեյսբուքյան իր էջում գրել է «Բարգավաճ Հայաստան» խմբակցության պատգամավոր Նաիրա Զոհրաբյանը․

«Ինձ գրել և այնուհետեւ զանգահարել էր գյումրեցի Մարիամ Մալխասյանը, ով պատմեց, որ հունիսի 29-ի առավոտյան «Գրիգոր Լուսավորիչ» կլինիկայում կորոնավիրուսից մահացել է իր տատիկը, բայց տատիկի դին մինչ այս պահը իրենք չեն կարողանում գտնել»:

Զոհրաբյանի խոսքով` հունիսի 29-ին մահացած տատիկի հարազատներին տեղեկացրել են, որ տատիկի դին կարող են ստանալ Աբովյան քաղաքի անատոմիկից: Երկու օր Մարիամի եղբայրը անատոմիկում փորձել է գտնել տատիկի դին, սակայն ապարդյուն: Երիտասարդը, անտեսելով վտանգը, անձամբ մտել է անատոմիկ և դիակների մեջ փորձել գտնել տատիկին:

Ըստ Նաիրա Զոհրաբյանի՝ հարազատներին հաջողվել է այլ աղբյուրներից պարզել, որ դին անատոմիկ տեղափոխած սանիտարը տատիկի անուն-ազգանունը լավ չի կարդացել, և, ըստ ամենայնի, տատիկի դին ստացել և արդեն հուղարկավորել են բոլորովին այլ մարդիկ:

Մահացած տատիկի բարեկամները դիմել են ոստիկանություն, սակայն մինչ այս պահը տատիկի դին չի գտնվել:

Դիակի անհետանալու լուրը արդեն մեկնաբանել է առողջապահության նախարարի մամուլի խոսնակ Ալինա Նիկողոսյանը․

«Մանրամասներն այս պահին ենթակա չեն հանրայնացման: Այնուամենայնիվ, անհրաժեշտության դեպքում կկատարվի դիակի ԴՆԹ հետազոտություն», — ֆեյսբուքյան իր էջում գրել է Նիկողոսյանը: