Կորոնավիրուսը շարունակում է տարածվել Հայաստանում, հատուկ ռեժիմ է սահմանվել Արենի գյուղում

Մեկ օրվա ընթացքում Հայաստանում դեպքերի թիվն աճել է 189-ով՝ հասնելով 4 հազար 472-ի։ Փաստացի բուժում է ստանում այս պահին 2 463 մարդ:

Գրանցվել է մահվան ևս հինգ դեպք:

Առողջապահության նախարարությունից հայտնում են, որ մահացել է երկու կին՝ 80 և 89 տարեկան, և երեք տղամարդ՝ 51, 74 և 78 տարեկան։ Բոլորն ունեցել են ուղեկցող քրոնիկական հիվանդություններ: Մահվան դեպքերի ընդհանուր թիվն արդեն հասել է 60-ի:

Արձանագրվել է մահվան ևս երկու դեպք։ Սակայն, ըստ բժիշկների, այս պացիենտների մահվան պատճառ են հանդիսացել այլ հիվանդություններ։ Նման դեպքերի թիվը հասել է 24-ի։

Համավարակի սկբից ի վեր կատարվել է 40 230 թեստավորում:

• Հայաստանում կորոնավիրուսի հետ կապված մահացության վիճակագրությունը սկսել են այլ կերպ մատուցել
• Ինչ տեսք ունի Երևանը տեղաշարժի սահմանափակման չեղարկումից հետո։ Տեսանյութ

Վարակի բռնկում Արենի գյուղում

Արենի գյուղում կորոնավիրուսի բռնկման հետևանքով հատուկ ռեժիմ է սահմանվել։ Պարետ Տիգրան Ավինյանի որոշմամբ․ մայիսի 16-ի 22:00-ից մինչև 26-ը՝ ժամը 23:59-ը Վայոց ձորի մարզի այս համայնքի մուտքն ու ելքը սահմանափակվել են:

Արգելվել է մարդկանց և տրանսպորտային միջոցների տեղաշարժը՝ բացառությամբ առաջին անհրաժեշտության ապրանքների, պարագաների, սննդամթերքի, դեղորայքի, վառելիքի մատակարարման, գյուղատնտեսական ու այգեգործական աշխատանքներ իրականացնելու նպատակով մուտքն ու ելքը։ Ոստիկանությունը կվերահսկի Մ2 միջպետական և դեպի Խաչիկ բնակավայր տանող ճանապարհներով երթևեկությունը։

Հայաստանում արտակարգ դրությունը երկարաձգվել է մինչև հունիսի 13-ը, սակայն արդեն վերադարձել է աշխատանքի տնտեսվարողների մեծ մասը։ Մայիսի 18-ից կաշխատի նաև հանրային տրանսպորտն ու մետրոն։ Կառավարությունը որոշել գնալ ոչ թե սահմանափակումների, այլ նոր վարքականոնների ներդրման ճանապարհով։ Դա բացատրվում է նրանով, որ կորոնավիրուսի դեմ պայքարը կարող է տարիներ տևել։

Նոր վարքականնոների ցանկում է պաշտպանիչ դիմակների օգտագործումը, մայիսի 18-ից՝ փակ տարածքներում, իսկ մայիսի 25-ց՝ ամենուր։