«Մտնում ենք կորոնավիրոսի ճգնաժամի հաղթահարման փուլ» - Հայաստանի վարչապետ

Հուլիսի 23-ի դրությամբ Հայաստանում կորոնավիրուսով վարակվածների թիվն ավելացել է 469-ով և դարձել 36 162:

Մահացել է ևս 10 մարդ: Մահացածների ընդհանուր թիվը հասավ 688-ի։

Մահվան դեպքերի վերաբերյալ առողջապահության նախարարությունից հայտնում են, որ բոլոր պացիենտներն ունեցել են ուղեկցող քրոնիկական հիվանդություններ։

Առողջացել է ևս 478 պացիենտ, նրանց ընդհանուր թիվը կազմում է 25 244։

Ընդհանուր առմամբ, կատարվել է 151 879 թեստավորում, անցած օրվա ընթացքում՝ ընդամենը 1 981:

● Կորոնավիրուսը կարող է օդով փոխանցվել։ Սա հայտարարվել է պաշտոնապես և փոխում է համավարակի դեմ պայքարի ողջ համատեքստը

● Տասը հոգուց ավելի չհավաքվել։ Վրաստանի կառավարությունն ուզում է երկարաձգել սահմանափակումներն՝ արտակարգ դրություն չհայտարարելով

Վարչապետ Նիկոլ Փաշինյանը հուլիսի 22-ին ասել է, որ կորոնավիրուսի հետ կապված իրավիճակը շարունակում է մնալ լարված, բայց տեսանելի է, որ առողջապահական համակարգի վրա ծանրաբեռնվածությունը թուլանում է:

«Կարող ենք զգուշավոր գնահատական տալ, որ մտնում ենք առողջապահական իմաստով կորոնավիրուսի ճգնաժամի հաղթահարման փուլ, եթե իհարկե մենք շարունակենք պահպանել այն հակահամաճարակային կանոնները, որոնք սահմանված են», — ասել է վարչապետը:

Նիկոլ Փաշինյանը շեշտել է, որ լարվածության այս թուլացումը առաջին հերթին դիմակներ կրելու արդյունք է.

«Այստեղ որևէ կասկած չկա: Եթե մենք հետևողական այս պրոցեսը չշարունակենք, այդտեղ էլ որևէ կասկած չկա, որ նորից կունենանք թվերի աճ: Ընդ որում, սա մեզ ցույց է տալիս նաև այլ երկրների օրինակը»: