Կոռուպցիայի դեմ պայքարը՝ որպես ահաբեկչություն։ Ռուսական դատարանն օրենքից դուրս է հայտարարել Նավալնիի կազմակերպությունը
Ռուսաստանում դատարանն արգելել է Նավալնիի կազմակերպությունները
Ռուսաստանում դատարանն էքստրեմիստական է ճանաչել ռուսական ընդդիմության առաջնորդ Ալեքսեյ Նավալնիի հետ կապված կազմակերպությունները։ Այդ թվում՝ Կոռուպցիայի դեմ պայքարի հիմնադրամը, որը հետաքննություններ էր հրապարակում նախագահ Պուտինի և նրա շրջապատի կոռուպցիայի մասին։ Սա նշանակում է, որ դրանք օրենքից դուրս են հայտարարվում․ փաստացի՝ իշխանությունն այդ կազմակերպությունների գործունեությունը հավասարեցրել է ահաբեկչության։
Ինչպես հաղորդում է ռուսական «Նովայա գազետան», Մոսկվայի քաղաքային դատարանը Կոռուպցիայի դեմ պայքարի հիմնադրամը, Քաղաքացիների իրավունքների պաշտպանության հիմնադրամն ու «Նավալնիի շտաբները» էքստրեմիստական կազմակերպություններ է ճանաչել և վճռել է անհապաղ լուծարել դրանք և դադարեցնել դրանց գործունեությունը։
Դատարանը վճիռը կայացրել է հունիսի 9-ի երեկոյան։ Դատական նիստը փակ է եղել և տևել է 12 ժամ։
Նավալնիի կազմակերպություններն էքստրեմիստական ճանաչելու պահանջով դատարան էր դիմել Մոսկվայի դատախազությունը, ապրիլի 16-ին «դրանց կողմից էքստրեմիստական գործունեության փաստացի իրականացման առնչությամբ»՝ «սահմանադրական կարգի հիմքերի փոփոխման համար պայմանների ստեղծման նպատակով», այդ թվում՝ «գունավոր հեղափոխության» սցենարի օգտագործմամբ։
- Ինչո՞ւ է Ռուսաստանի նախագահ Պուտինը վախենում ընդդիմադիր գործիչ Նավալնուց
- Լուսարձակներ, սեր և Նավալնի․ ֆոտոռեպորտաժ Ռուսաստանում անցկացված ակցիաներից
- «Չէի կարողանում մարդկանց ճանաչել և չէի կարողանում խոսել»․ Նավալնին պատմում է, թե ինչպես է կենդանի մնացել
Այսուհետ այդ կազմակերպությունների գործունեությունը շարունակելու փորձը քրեական հանցագործություն է համարվում և պատժվում է ազատազրկմամբ։
Վերջերս Ռուսաստանի Պետդուման օրենք է ընդունել, որն արգելում է ընտրություններին մասնակցել այն անձանց, ովքեր մասնակից են «էքստրեմիստական կազմակերպություններին» կամ ուղղակի սատարում են դրանք։
Դատարանի վճիռը մեկնաբանել է բանտում գտնվող Ալեքսեյ Նավալնին։
«Մենք ոչ անվանում ենք, ոչ թուղթ, ոչ էլ գրասենյակ։ Մենք մարդկանց խումբ ենք, որոնք միավորում և կազմակերպում են Ռուսաստանի այն քաղաքացիներին, որոնք դեմ են կոռուպցիային, կողմ են ազնիվ դատարաններին և օրենքի առաջ բոլորի հավասարությանը։ Այդպիսի միլիոնավոր մարդիկ կան։ Դուք եք այդպիսին։ Քանի դեռ դուք կաք, մենք էլ ենք լինելու»,- ասված է քաղաքական գործչի ինստագրամյան էջում արված հրապարակման մեջ։
Նավալնիի համախոհ Լեոնիդ Վոլկովը դեռևս ապրիլի 29-ին պաշտոնապես հայտարարել էր Նավալնիի շտաբերի ցանցի փակման մասին։ Նրա խոսքով՝ մասնակցությունը շտաբների աշխատանքին՝ կհանգեցնի դրա աշխատակիցների և կամավորների ազատազրկման։
Նավալնիի կողմնակիցների հետապնդումը ռուսական իշխանությունը սկսել է այն բանից հետո, երբ Նավալնին, որը հրաշքով է կենդանի մնացել «Նովիչոկ» մարտական քիմիական նյութով թունավորվելուց հետո, կալանավորվել է հունվարի 17-ին, հենց օդանավակայանում, Գերմանիայից Ռուսաստան վերադառնալուց անմիջապես հետո, որտեղ բուժում էր անցնում։
Ավելի ուշ դատարանը նրան դատապարտել էր երկու տարվա և ութ ամսվա ազատազրկման՝ նրա պայմանական ազատազրկման ժամկետը փոխարինելով իրականով։
