Կոչ Ալիևին. «Ազատե՛ք «Աշխատանքային սեղանի» ակտիվիստներին»
Կոչ՝ ազատել «Աշխատանքային սեղան»-ի ակտիվիստներին
Աշխատանքի մասին լուրերի միջազգային «LabourStart» հարթակը նոր խնդրագրային արշավ է սկսել՝ ուղղված Ադրբեջանի նախագահ Իլհամ Ալիևին։
Խնդրագիրն ուղղված է 2022 թվականին ստեղծված «Աշխատանքային սեղան» արհմիությունների կոնֆեդերացիային աջակցելուն։ Կոնֆեդերացիայի չորս անդամներ ձերբակալված են։ Արշավը մեկնարկել է ապրիլի 16-ին, արդեն գրեթե 2700 էլեկտրոնային նամակներ են ուղարկվել նախագահի աշխատակազմ։
Ո՞վքեր են ձերբակալված ակտիվիստները
Խնդրագիրը պահանջում է ազատ արձակել կոնֆեդերացիայի նախագահ Աֆիյադդին Մամեդովին և նրա անդամներին՝ Այհան Իսրաֆիլովին, Էլվին Մուստաֆաևին և Մոհյադդին Օրուջևին։ LabourStart-ն ու իրավապաշտպան կազմակերպությունները շեշտում են, որ այս անձանց ձերբակալություններն ունեն քաղաքական շարժառիթներ և հակասում են աշխատանքային իրավունքների ոլորտում Ադրբեջանի ստանձնած միջազգային պարտավորություններին։
Ի՞նչ է «Աշխատանքային սեղանը» և ինչո՞ւ է այն հայտնվել ուշադրության կենտրոնում
«Աշխատանքային սեղան» կոնֆեդերացիան ստեղծվել է ոչ ֆորմալ զբաղվածություն ունեցող աշխատակիցներին իրավաբանական աջակցություն տրամադրելու, ինչպես նաև սոցիալական պաշտպանության և արժանապատիվ վարձատրության համար պայքարելու նպատակով։ Կազմակերպությունը բողոքի ակցիաներ է իրականացրել տարբեր ոլորտներում և հանդես է եկել կոլեկտիվ դիմադրության նախաձեռնողի դերում։ Այս գործողությունները հարուցել են իշխանությունների կտրուկ արձագանքը։ Կազմակերպության ղեկավարությունը դարձել է հետապնդման օբյեկտ՝ թմրանյութեր պահելու և խուլիգանության կեղծ մեղադրանքներով։
Խնդրագրի բովանդակությունը
«LabourStart»-ի նամակում ասվում է.
«Նախագահ Իլհամ Ալիև, Աֆիյադդին Մամեդովի, Էլվին Մուստաֆաևի, Այհան Իսրաֆիլովի և Մոհյադդին Օրուջևի՝ քաղաքական շարժառիթներ ունեցող ձերբակալությունները լուրջ մտահոգություն են առաջացնում։ Այս անձանց հետապնդումը խախտում է հավաքների ազատության և միավորման իրավունքի ոլորտում Ադրբեջանի ստանձնած միջազգային պարտավորությունները, այդ թվում՝ Աշխատանքի միջազգային կազմակերպության №87 և №98 կոնվենցիաները»։
Խնդրագիրը ստորագրած անձինք նախագահ Ալիևին կոչ են անում անհապաղ ազատ արձակել ակտիվիստներին և հարգել աշխատավորների իրավունքներն ու ժողովրդավարական ազատությունները։
«Աշխատանքային սեղան». «Հուսով ենք՝ մեր կոչն անպատասխան չի մնա»
Կոնֆեդերացիան հայտարարել է.
«Այս նամակներն արտացոլում են հազարավոր մարդկանց ձայնը, որոնք պահանջում են ազատություն մեր ընկերների համար։ Հուսով ենք՝ այս կոչն անպատասխան չի մնա»։
Համատեքստ. արհմիությունների ճնշում Ադրբեջանում
Վերջին տարիներին անկախ արհմիությունների գործունեությունը Ադրբեջանում էականորեն սահմանափակվել է։ Պետության աջակցությունը վայելող կառույցների շրջանակներից դուրս ստեղծված միավորումները բախվում են տարբեր վարչական և իրավական հետապնդումների։ Այս համատեքստում «Աշխատանքային սեղանը» համարվում է երկրում սոցիալական և աշխատանքային իրավունքները պաշտպանող սակավաթիվ անկախ նախաձեռնություններից մեկը։
Խնդրագրային արշավն ուղղված է այս ճնշումների վրա միջազգային ուշադրություն հրավիրելուն և մեկուսացված ակտիվիստների պաշտպանության ուժեղացմանը։
Հետևեք մեզ — Facebook | Youtube | Telegram
Կոչ՝ ազատել «Աշխատանքային սեղան»-ի ակտիվիստներին
