Վրացական «Իմեդի» կառավարական լրատվամիջոցի փոխանցմամբ՝ երկրի վարչապետի պաշտոնում կառաջադրվի իշխող «Վրացական երազանք» կուսակցության ներկայիս նախագահ Իրակլի Կոբախիձեն, իսկ կուսակցության նախագահի պաշտոնը կզբաղեցնի ներկայիս վարչապետ Իրակլի Ղարիբաշվիլին։ Իրակլի Կոբախիձեն կստանձնի նաև կուսակցության քաղաքական քարտուղարի պաշտոնը։
«Իմեդի»-ի փոխանցմամբ՝ հունվարի 24-ին «Վրացական երազանքի» քաղաքական խորհրդի նիստում որոշվել է, որ կուսակցության համագումարը տեղի կունենա փետրվարի 1-ին։
Իրակլի Ղարիբաշվիլին երկու անգամ զբաղեցրել է կառավարության ղեկավարի պաշտոնը։ Նա առաջին անգամ Վրաստանի վարչապետ է նշանակվել 2013 թվականին, սակայն երկու տարի անց՝ 2015 թվականին, հանկարծակի լքել է պաշտոնը։
Այնուհետև նա նույն պաշտոնում նշանակվել է 2021 թվականի փետրվարի 18-ին՝ այն ժամանակվա վարչապետ Գիորգի Գախարիայի հրաժարականից հետո։
Այդ ընթացքում Ղարիբաշվիլին հասցրել է լինել «Վրացական երազանք» կուսակցության գլխավոր քարտուղար և պաշտպանության նախարար։
Փորձագետները «Վրացական երազանքի» հիմնադիր, օլիգարխ Բիձինա Իվանիշվիլիի՝ երկրորդ անգամ քաղաքականություն վերադառնալուց հետո խոսում էին կառավարությունում սպասվող փոփոխությունների մասին։
2012 թվականի խորհրդարանական ընտրություններում «Վրացական երազանքի» հաղթանակից հետո Իվանիշվիլին դարձավ Վրաստանի վարչապետ, սակայն պաշտոնը լքեց 2013 թվականի նոյեմբերին։ Հինգ տարի անց՝ 2018 թվականին, նա վերադարձավ քաղաքականություն և դարձավ կուսակցության նախագահ։ 2018 թվականին երկրում անցկացվեցին նախագահական ընտրություններ։ Իսկ 2021 թվականին Իվանիշվիլին կրկին հայտարարեց քաղաքականությունից հեռանալու մասին։
Վրաստանի ընդդիմությունն ու քաղաքացիական սեկտորը, սակայն, կարծում են, որ Բիձինա Իվանիշվիլին փաստացի չի հեռացել քաղաքականությունից և այդ ամբողջ ընթացքում կուլիսներից վերահսկել է կուսակցությունը՝ կայացնելով կարևոր որոշումներ։
2024 թվականին Վրաստանում տեղի կունենան խորհրդարանական ընտրություններ:
