Կիևում գիշերը ցուցարարների և ոստիկանության միջև բախումներ են տեղի ունեցել

Անցյալ գիշեր Կիևի Եվրոպական հրապարակում ոստիկանության և ցուցարարների միջև տեղի ունեցած բախումների հետևանքով 3 ոստիկան լրջորեն տուժել է, 5 ցուցարար ձերբակալվել է:

«Կին ոստիկանի մատներն են կոտրել: Մյուսի ձեռքը: Երրորդը փակ գանգուղեղային վնազվածք ունի, քիթն է կոտրված», — հաղորդել է Ազգային ոստիկանության ղեկավար Սերգեյ Կնյազևը:

Միաժամանակ, ինչպես հաղորդում է Hromadske TV-ն, Կարմիր խաչի բուժաշխատողները, որոնք Մայդանում հերթապահում էին, հաղորդել են բախումների հետևանքով նվազագույնը 10 տուժածի մասին: Նրանց խոսքով, տուժածներից մեկը գանգուղեղային վնասվածք ունի:

Փետրվարի 19-ին Կիևի կենտրոնում Անկախության կոթողի մոտ տեղի ունեցած ակցիայից՝ ի աջակցություն Կիևի վերահսկողության տակ չգտնվող Դոնբասի տարածքների հետ առևտրի շրջափակման «ժողովրդական ժողովից» հետո միջոցառման մասնակիցներն ուղղվեցին դեպի նախագահի վարչակազմի շենք: Այնտեղ նրանք փորձեցին վրան տեղադրել, սակայն ետ մղվեցին նստավայրից: «Բլոկադային վեչեի» մասնակիցներն, այդ թվում նաև՝ Գերագույն ռադայի պատգամավորներ Սեմյոն Սեմենչենկոն և Եգոր Սոբոլևը փորձեցին մոտենալ նստավայրին, սակայն ոստիկանությունը թույլ չտվեց «վեչեի» մասնակիցներին Եվրոպական հրապարակից անցնել դեպի Կրեշչատիկ: Այնտեղ բախումներ տեղի ունեցան, որոնց արդյունքում կամուֆլյաժով մի քանի մարդ ձերբակալվեց:

Ավելի ուշ ձերբակալվածներն ազատ արձակվեցին, ոստիկանների վրա հարձակման փաստով քրեական գործ է հարուցվել:

Մայդանում ցուցարարների վրա կրակելու երրորդ տարելիցի կապակցությամբ Կիևում փետրվարի 18-ից ակցիաներ անցկացվեցին: