Աբխազիայի խորհրդարանի պատգամավորին զրկե՞լ են ՌԴ քաղաքացիությունից
Կան Կվարչիան՝ ՌԴ ազգային անվտանգության սպառնալի՞ք
Չհաստատված տեղեկությունների համաձայն՝ Աբխազիայի խորհրդարանի պատգամավոր և ընդդիմության առաջնորդներից Կան Կվարչիային զրկել են Ռուսաստանի քաղաքացիությունից, քանի որ ռուսական հետախուզական ծառայությունները նրա գործողությունները որակել են որպես ազգային անվտանգության սպառնալիք։
Ռուսաստանի ՆԳՆ Կրասնոդարի երկրամասի միգրացիայի հարցերով վարչության պաշտոնական հաղորդագրության մեջ ասվում է, որ «Աբխազիայի Հանրապետության 50-ամյա բնակիչը, ձեռք բերելով Ռուսաստանի քաղաքացիություն, կատարել է գործողություններ, որոնք սպառնալիք են ստեղծել Ռուսաստանի Դաշնություն ազգային անվտանգության համար», ինչի արդյունքում նրա ռուսական անձնագիրը ճանաչվել է անվավեր և ենթակա է առգրավման։ Այլ մանրամասներ չեն հաղորդվել:
Սակայն սոցցանցերի աբխազական հատվածը «դեդուկտիվ մեթոդով» ենթադրում է, որ դա կարող է լինել միայն պատգամավոր Կան Կվարչիան: Որովհետև նա տղամարդ է, 50 տարեկան է, և Կրեմլը վաղուց նրա հետ հաշիվներ ունի։
2024 թվականի նոյեմբերից տարբեր անանուն Telegram ալիքներ պնդում են, որ Մոսկվան մտադիր է Կվարչիային զրկել Ռուսաստանի քաղաքացիությունից, քանի որ նա եղել է ռուս-աբխազական ներդրումային համաձայնագրի վավերացման դեմ բողոքի ցույցերի առաջնորդներից մեկը։
Այս բողոքի ցույցերն ի վերջո հանգեցրին փոքր պետական հեղաշրջման. ընդդիմությունը և նրա կողմնակիցները ներխուժեցին կառավարության շենք, նախագահ Ասլան Բժանիային ստիպեցին հրաժարական տալ, իսկ հետո խորհրդարանին համոզեցին չվավերացնել համաձայնագիրը:
Իրադարձությունների այս շրջադարձը Կրեմլը չափազանց բացասաբար ընդունեց։ Ռուսական տարբեր լրատվամիջոցներ Կան Կվարչիային անվանեցին հակառուսական քաղաքական գործիչ։
- «Բարեփոխումներն Աբխազիայում անխուսափելի են, Մոսկվան պետք է դա հաշվի առնի». կարծիք
- «Կրկին հեղաշրջում և նախագահի տապալում Աբխազիայում». ինչպե՞ս դուրս գալ այս շրջապտույտից
Կան Կվարչիային ռուսական քաղաքացիությունից, իբր, զրկելու մասին լուրը Աբխազիայի խորհրդարանին ստիպեց գումարել պետաիրավական քաղաքականության հանձնաժողովի նիստ՝ հրավիրելով արտգործնախարար Սերգեյ Շամբային։ Պատգամավորները նախատեսել էին նրանից պարզել այս տեղեկատվության իսկությունը։ Սակայն Շամբան հրաժարվել է մասնակցել նիստին։
Աբխազիայի քաղաքացիների համար շատ կարևոր է երկրորդ՝ Ռուսաստանի քաղաքացիություն ունենալը, քանի որ Աբխազիայի անձնագիրը միջազգայնորեն ճանաչված չէ։
