Կադիրով. իմ աղջիկները երբեք հիջաբը դպրոցում չեն հանելու

Չեչնիայի ղեկավարը քննադատել է Ռուսաստանի կրթության և գիտության նախարար Օլգա Վասիլևային դպրոցներում հիջաբ կրելու անհարիրության մասին հայտարարության համար: Կադիրովի խոսքով, նա զարմացած է նախարարի դիրքորոշման վրա, որն ըմբռնումով է վերաբերվել մորդովական դպրոցում մուսուլմանական գլխաշոր կրելու արգելքին:

«Զարմանք է առաջացնում, որ նախարարը տեղի ղեկավարներին ուղղելու փոխարեն իր «անձնական համոզմունքը» տարածում է միլիոնավոր քաղաքացիների վրա: Իմ երեք աղջիկները դպրոցում են սովորում, հիջաբ են կրում, գերազանց գնահատականներ ունեն: Օլգա Վասիլևան պահանջում է, որ նրանք հանե՞ն գլխաշորերը: Նրանք երբեք դա չեն անի», — գրել է Կադիրովն Ինստագրամում:

Նրա խոսքով, Ռուսաստանի սահմանադրությունը երաշխավորում է յուրաքանչյուրի խղճի և դավանանքի ազատությունը, սակայն ակնհայտ է, որ «ոչ բոլոր ռուս պաշտոնյաներն են կարդացել այդ հոդվածը»:

Հունվարի 24-ին կրթության և գիտության նախարարը Մորդովիա կատարած այցի ընթացքում հայտարարել է, որ ռուսական դպրոցների աշակերտները չպետք է իրենց դավանանք ընդգծեն համապատասխան ատրիբուտներով: «Ես չեմ կարծում, որ իսկական հավատացյալներն ատրիբուտներով են ձգտում ընդգծել իրենց վերաբերմունքը հավատքի հանդեպ: Մեզ մոտ կրթությունն աշխարհիկ բնույթ է կրում», — հայտարարել է Վասիլևան: Նա ընդգծել է նաև, որ «հարցն արդեն լուծված է Սահմանադրական դատարանով» և «հիջաբները, որոնք ազգային պատկանելիությունն են ընդգծում, տեղ չունեն դպրոցներում»:

Իրականում 2015 թ-ի փետրվարին Ռուսաստանի Գերագույն դատարանը Մորդովիայի կառավարության կողմից հանրապետության դպրոցներում հիջաբ և այլ կրոնական խորհրդանիշներ, ինչպես նաև մինի-կիսաշրջազգեստներ, ջինս, խորը լանջաբացվածքով հագուստ և փիրսինգ կրելու արգելքն օրինական է ճանաչել:

Ավելի վաղ, 2012թ-ին հիջաբ կրելու շուրջ վեճ է ծագել Ստավրոպոլյեում. երկրամասի որոշ շրջաններում մուսուլման աղջիկներին դադարել են դպրոց թողնել հիջաբով, ինչը մուսուլմանների վրդովմունքն է առաջացրել: Այն ժամանակ կոնֆլիկտին միջամտել էր ՌԴ նախագահ Վլադիմիր Պուտինը, որը հայտարարել էր, որ դպրոցներում հիջաբ կրելու մեջ ոչ մի լավ բան չկա: Նրա խոսքով, այդպիսի ավանդույթ Ռուսաստանում, անգամ մուսուլմանական շրջաններում երբեք չի եղել:

Կոնլֆիկտի ադյունքում Ստավրոպոլի երկրամասի բոլոր դպրոցներում դասական տիպի պարտադիր համազգեստ ներմուծվեց: Աշակերտներին պաշտոնապես արգելեցին գլխաշոր, այդ թվում՝ հիջաբ և կրոնական խորհրդանիշներով հագուստ կրել:

2013թ-ի ամռանը Ռուսաստանի Գերագույն դատարանը օրինական ճանաչեց Ստավրոպոլյեի հանրակրթական դպրոցներում հիջաբ կրելու արգելքը: