Լևադա կենտրոնի հարցումը. ռուսներն ամենից շատ հպարտանում են Հայրենական պատերազմում տարած հաղթանակով և Ղրիմի միացումով

Ռուսներն ամենից շատ հպարտանում են Հայրենական մեծ պատերազմում տրած հաղթանակով և Ռուսաստանին Ղրիմի միացումով, ամենից շատ ամաչում  են աղքատությանից և անբարեկարգությունից, ափսոսում են ԽՍՀՄ-ի փլուզման համար. այսպիսին են «Լևադա կենտրոն» հասարակական կարծիքի ուսումնասիրման անկախ կազմակերպության անցկացրած հարցման արդյունքները:

Հարցին, թե «մեր երկրի պատմության մեջ որ իրադարձություններն են ձեզ մոտ հպարտության զգացում առաջացնում», հարցվածների ճնշող մեծամասնությունը՝ 83 տոկոսը, նշել է հաղթանակը 1941-45 թթ-ի Հայրենական Մեծ պատերազմում: Հարցվածների 43 տոկոսը հպարտ է «Ղրիմի՝ Ռուսաստանի Դաշնության կազմ վերադարձով»:

Ռուսները նաև հպարտանում են այն հանգամանքով, որ Ռուսաստանը առաջատար դեր ունի տիեզերքի յուրացման գործում. այս մասին նշել է հարցվածների 41 տոկոսը: Իսկ Պուտինի օրոք երկրի կայունացումը  և տնտեսական աճը հպարտության առիթ են համարում հարցվածների միայն 18 տոկոսը:

Հարցին, թե ինչն է ամոթի և վշտի զգացում առաջացնում ռուսական պատմության մեջ, հարցվածների մեծամասնությունը՝ 54 տոկոսը, պատասխանել է, որ դա«մշտական աղքատությունն ու անբարեկարգությունն է»,  ինչի պայմաններում ապրում է «հզոր ազգը և հարուստ երկիրը»: ԽՍՀՄ փլուզուման համար ափսոսանք է հայտնել հարցվածների 33 տոկոսը,  իսկ բնավորության կոպտության, գռեհիկության, միմյանց հանդեպ մարդկանց անարգանքի համար ափոսանք է հայնտել հարցվածների 24 տոկոսը:

Բռնաճնշումները, ահաբեկչությունը և ազգերի տեղահանումը 1920-50 թթ-ին ստիպում են ափսոսանք զգալ հարցվածների 22 տոկոսին, իսկ Արևմուտքից մշտապես հետ մնալը՝ հարցվածների 20 տոկոսին:

Հարցումն անցկացվել է 2017 թ-ի հունվարի 20-ից  23-ը 48 մարզում 1600 մարդկանց շարքում քաղաքային և գյուղական բնակչության ներկայացուցչական համառուսական ընտրանքային միջոցով՝ անձնական հարցազրույցների մեթոդի կիրառմամբ: