Լրատվամիջոցները վրացական իշխանություններին մեղադրում են Ռուսաստանի հետ համագործակցության համար

Լրատվամիջոցները Վրաստանի իրավապահ մարմիններին մեղադրում են Ռուսաստանի հետ համագործակության համար: Խոսքը գնում է Կիևում Ռուսաստանի հարցմամբ հունվարի 15-ին ձերբակալված վրացի նախկին զինվորական Գիա Ծերծվաձեի մասին:

Վրացական հատուկ նշանակության ջոկատի նախկին սպան ներկա պահին մասնակցում է Ուկրաինայում հակաահաբեկչական գործողությանը որպես կամավոր:

Ռուսթավի-2-ի տեղեկատվության համաձայն՝ գործի նյութերում, որոնք ՌԴ քննչական մարմինները փոխանցել են Ուկրաինային, Ծերծվաձեի անձնական տվյալներն են հայտնվել, որոնք հնարավոր էր ստանալ միայն Վրաստանի ՆԳՆ և արդարադատության նախարարության  բազայից:

Գիա Ծերծվաձեն Ռուսաստանում հետախուզման մեջ է իբր 2003թ-ին գործած սպանության համար: Նրա հանդեպ միջազգային հետախուզում է հայտարարվել 2016թ-ի դեկտեմբերի 23-ին՝ ենթադրյալ հանցագործությունից 13 տարի անց:

Նախկին զինվորականի և ուկրաինացի փաստաբանի ընտանիքը պնդում են, որ Ռուսաստանը 2008թ-ի օգոստոսյան պատերազմի մասնակիցների հանդեպ որս է հայտարարել, և այդ գործում նրա դաշնակիցները Վրաստանի իրավապահ մարմիններն են:

«Նա բազմաթիվ հատուկ գործողությունների է մասնակցել, այժմ Ռուսաստանը հետապնդում է նրանց, ովքեր մասնակցել են 2008թ-ի պատերազմին: Գործում փաստաթղթեր կան, որոնք Ռուսաստանը կարող էր ստանալ միայն Վրաստանից: Չնայած որ գործը վերաբերում է Վրաստանի քաղաքացուն՝ Վրաստանի սահմանային ոստիկանությունը և, հնարավոր է նաև այլ մարմիններ, դեռևս համագործակցում են Ռուսաստանի հետ», — հեռուստաընկերությանը տված հարցազրույցում ասել է Ծերծվաձեի փաստաբան Կսենիա Պրոկոնովան:

Ըստ հեռուստաընկերության տեղեկատվության, Վրաստանի արդարադատության նախարարության կամ ՆԳՆ բազայից Մոսկվայի տնօրինության տակ են հայտնվել Ծերծվաձեի անունով Վրաստանում տրված բոլոր անձնագրերի տվայլները, ինչպես նաև այլ երկրների սահմանները նրա կողմից հատելու  վերաբերյալ ամբողջական տեղեկատվությունը:

Այդ առթիվ Վրաստանի ՆԳՆ-ն և այլ գերատեսչությունները դեռևս մեկնաբանություններ չեն արել:

Այն բանից հետո, երբ վրացի նախկին զինվորականի ձերբակալման մասին հայտնի է դարձել հանրությանը, սոցցանցերում արշավներ են սկսվել ի աջակցություն սպայի:

Այսօր Միասնական ազգային շարժումը (որը գլխավորում է նախկին նախագահ Միխայիլ Սահակաշվիլին) դիմել է արտասահմանյան դիվանագետներին դիվանագիտական կապերը գործի դնելու և ձերբակալվածին Ռուսաստանին փոխանցել թույլ չտալու խնդրանքով:

Գիա Ծերծվաձեն տվյալ պահին նախնական կալանքի տակ է և սպասում է Վերաքննիչ դատարանի վճռին: