Ղարաբաղի հարցը ոչ թե տարածքային, այլ ինքնորոշման հարց է։ Հայաստանի անվտանգության խորհրդի քարտուղար Արմեն Գրիգորյանը նման կարծիք է հայտնել՝ անդրադառնալով ՄԱԿ-ում Ադրբեջանի նախագահ Իլհամ Ալիևի հայտարարությանը, թե Հայաստանը կա՛մ պետք է տարածքային պահանջներ ներկայացնի, կա՛մ լավ հարաբերություններ հաստատի հարևան պետությունների հետ։
Գրիգորյանն ընդգծել է, որ Ղարաբաղի հարցը պետք է կարգավորել ինքնորոշման իրավունքի շրջանակներում, ինչպես նաև վերահաստատել, որ ԼՂ խնդրի կարգավորման միակ հարթակը ԵԱՀԿ Մինսկի խումբն է։
«Բոլոր համանախագահների՝ ՌԴ-ի, ԱՄՆ-ի, Ֆրանսիայի կողմից հայտարարություն է եղել, որ պետք է վերսկսել բանակցությունները ԵԱՀԿ ՄԽ շրջանակներում։ ԵԱՀԿ ՄԽ շրջանակներում պետք է մի կարևոր հարց քննարկել․ դա կարգավիճակի հարցն է։ ԼՂ խնդիրը կարգավորված չէ, և ԼՂ կարգավիճակի հարցը սպասում է իր լուծմանը։ Եվ այդ լուծումը մենք տեսնում ենք ԵԱՀԿ ՄԽ շրջանակներում։ Անհասկանալի են Ադրբեջանի՝ նման հայտարարությունները», — շեշտել է Արմեն Գրիգորյանը։
Անվտանգության խորհրդի քարտուղարն անդրադարձել է նաև հայ-թուրքական հարաբերություններին՝ հույս հայտնելով, որ հնարավոր կլինի երկխոսություն սկսել առանց նախապայմանների․
«Գոյություն ունեցող բոլոր հարցերը հետագայում քննարկելի են, բայց նախապայմաններով հարաբերություններ սկսելը շատ դժվար կլինի»։
Լրագրողների հետ զրույցում Արմեն Գրիգորյանը հիշեցրել է, որ ինչպես նախընտրական շրջանում, այնպես էլ ընտրություններից հետո իշխող ուժը խոսել է տարածաշրջանում խաղաղության դարաշրջան բացելու մասին։ Թուրքիայի հետ հարաբերությունների կարգավորումն, ըստ նրա, պետք է դիտարկել այդ տրամաբանության շրջանակներում․
«Այդ կարգավորումը պետք է լինի աստիճանական, և մենք համոզված ենք, որ այդ հարաբերությունների կարգավորման հնարավորություններից մեկը բարձր և բարձրագույն մակարդակում երկխոսություն ունենալն է։ Քաղաքական տարբեր մակարդակներում հայտարարել ենք, որ Հայաստանը պատրաստ է Թուրքիայի հետ հարաբերությունների կարգավորմանը»։
Հղում անելով տելեգրամյան ալիքներում սեպտեմբերի 23-ին տարածված տեղեկությանը՝ լրագրողները հետաքրքրվել են, թե ով էր երեկ մասնավոր ինքնաթիռով Թուրքիայից ՀՀ եկել։ Արմեն Գրիգորյանը չի պատասխանել հարցին՝ նշելով, որ չի ուզում մեկնաբանել «շրջանառվող կեղծ լուրերը, որոնք անիմաստ քննարկումների տեղիք են տալիս»։
Այդ տեղեկության համաձայն՝ Թուրքիայից Հայաստան ժամանած մասնավոր օդանավը վայրէջք էր կատարել Երևանում, ապա նույն օրը վերադարձել Թուրքիա։ “Flightradar” հարթակի տվյալներով՝ թռիչքը մասնավոր է եղել։ Հայտնի է միայն, որ այն Երևանից օդ է բարձրացել 16։31-ին։
Ըստ շրջանառվող լուրերի՝ ինքնաթիռում եղել է Թուրքիայի նախագահ Էրդողանի պաշտոնական ներկայացուցիչը։
