Արայիկ Հարությունյանը և ԼՂ-ի այլ նախկին ղեկավարներ կալանավորվել են
Արայիկ Հարությունյանին մեղադրանք է առաջադրվել Ադրբեջանի քրեական օրենսգրքի 9 հոդվածներով
ԼՂՀ նախկին ղեկավար Արայիկ Հարությունյանը բերման է ենթարկվել Ադրբեջանի գլխավոր դատախազության և Պետական անվտանգության ծառայության համատեղ անցկացրած հետաքննության շրջանակներում։
«Հետաքննությունը կենտրոնացած է խաղաղության և մարդկության դեմ հանցագործությունների, ռազմական հանցագործությունների, ահաբեկչության և այլ հանցագործությունների շուրջ, որոնք կատարվել են Ղարաբաղում անօրինական հայկական զինված խմբավորումների կողմից», — ասվում է Գլխավոր դատախազության և Պետական անվտանգության ծառայության կողմից հրապարակված տեղեկատվության մեջ։
Հարությունյանը մեղադրվում է նաև չարտոնված զինված խմբավորումների գործունեությունը կազմակերպելու և համակարգելու, այդ խմբերին զենք, զինամթերք և ռազմական տեխնիկա մատակարարելու, Ադրբեջան մաքսանենգ զենք տեղափոխելու և ահաբեկչությանը ֆինանսական աջակցություն ցուցաբերելու մեջ։
Ավելին, Հարությունյանին մեղադրանք է առաջադրվել խիտ բնակեցված Գյանջա քաղաքի բնակելի թաղամասերի և քաղաքացիական շինությունների, ինչպես նաև առաջնագծից դուրս գտնվող Բարդա շրջանի բնակավայրերի վրա բալիստիկ հրթիռների և այլ զինամթերքի արձակման համար։
Ղարաբաղյան երկրորդ պատերազմի ժամանակ Գյանջայի վրա իրականացվել է 5 հրթիռային հարձակում, ինչի արդյունքում զոհվել է 27 խաղաղ բնակիչ, վիրավորվել՝ 125 մարդ։ Բարդայի ուղղությամբ արձակված երկու հրթիռները սպանել են 26 խաղաղ բնակչի, ևս 105-ը վիրավորվել են:
Պաշտոնական տեղեկատվության համաձայն՝ Հարությունյանը բերման է ենթարկվել այս տարվա հոկտեմբերի 3-ին Պետական անվտանգության ծառայության կողմից Խանքենդի (Ստեփանակերտ) քաղաքում, նրան մեղադրանք է առաջադրվել Ադրբեջանի քրեական օրենսգրքի տարբեր հոդվածներով, այդ թվում՝ 100-րդ (ագրեսիվ պատերազմի պլանավորում և իրականացում), 116-րդ (միջազգային մարդասիրական իրավունքի խախտում զինված հակամարտությունների ժամանակ), 117-րդ (զինված հակամարտությունների ժամանակ անօրինական հրամաններ տալը), 120-րդ (կանխամտածված սպանություն), 214-րդ (ահաբեկչություն), 214-1 (ահաբեկչության ֆինանսավորում), 214-3 (ահաբեկչության նպատակով զորավարժությունների անցկացում), 218-րդ (հանցավոր համայնքի ձևավորում) և 279-րդ (անօրինական զինված խմբավորումների ստեղծում) հոդվածներով և այլն։
Դատարանի որոշմամբ Հարությունյանի նկատմամբ նախաքննության ընթացքում որպես խափանման միջոց է ընտրվել կալանավորումը։
Վերոնշյալ մեղադրանքներով Հարությունյանին սպառնում է ցմահ ազատազրկում։
Պետական անվտանգության ծառայությունը տեսանյութ է տարածել, որտեղ մանրամասն նկարագրված է Արայիկ Հարությունյանի կալանավորումը։
Արայիկ Հարությունյանը Լեռնային Ղարաբաղի Հանրապետության նախագահն է եղել 2020 թվականի մայիսի 21-ից։ Նա պաշտոնից հեռացել է 2023 թվականի օգոստոսի 31-ին։ Նրա փոխարեն ընտրվել է Սամվել Շահրամանյանը։
Ձերբակալվել են ևս երկու նախկին նախագահներ և խորհրդարանի նախկին խոսնակը
APA լրատվական գործակալության փոխանցմամբ՝ այսօր (սեպտեմբերի 5-ին) Բակո Սահակյանի, Արկադի Ղուկասյանի և Դավիթ Իշխանյանի նկատմամբ խափանման միջոց է ընտրվել կալանավորումը։
Նրանց բերման ենթարկվելու մասին նախօրեին տեղեկություն էր տարածվել իշխանամետ լրատվամիջոցներում։ Պետական անվտանգության ծառայությունը և Գլխավոր դատախազությունը դեռևս չեն հաստատել կամ հերքել այդ տեղեկությունը։
Նրանք բոլորը ձերբակալվել են 4 ամսով՝ քննչական միջոցառումների իրականացման ժամկետով։
Հետախուզման մեջ են «300 անջատողականներ»
Սեպտեմբերի 29-ին բերման էր ենթարկվել Լևոն Մնացականյանը, ով 2015-2018 թվականներին զբաղեցրել է ԼՂՀ պաշտպանության նախարարի պաշտոնը և ղեկավար այլ պաշտոններ, Դավիթ Բաբայանը, ով 2013-2023 թվականներին աշխատել է որպես ԼՂՀ նախագահի օգնական, ինչպես նաև Ղարաբաղի Պաշտպանության բանակի հրամանատարի նախկին տեղակալ Դավիթ Մանուկյանը։
Բոլորը մեղադրվում են ահաբեկչության, խաղաղության և մարդկության դեմ ուղղված ծանր հանցագործությունների կատարման մեջ։
Վերջերս Ադրբեջանի գլխավոր դատախազ Քամրան Ալիևը հայտարարեց, որ Ադրբեջանը հետախուզում է հայտարարել «ավելի քան 300 հայ անջատողականների նկատմամբ, որոնք մեղադրվում են ծանր հանցագործություններ կատարելու մեջ»:
«Մենք ապացույցներ ենք հավաքել այդ հանցագործությունների հետ կապված։ Ընդհանուր առմամբ, հարուցվել է 300 նման քրեական գործ։ Այդ հանցագործությունների մեջ մեղադրվող ավելի քան 300 մարդու նկատմամբ միջազգային հետախուզում է հայտարարվել։ Այդ գործերով ապացույցներ կան»,- ասել է նա։
