Լեհաստանում դատում են բելառուսների և ուկրաինացիների «ստրկական աշխատանքի» օգտագործման համար մեղադրվողները
Լեհաստանում սկսվում է բելառուսների և ուկրաինացիների ստրկական աշխատանքի օգտագործման մասին գործով դատական գործընթացը: Ինչպես հետևում է գործի նյութերից, երկու մեղադրյալները 2015թ-ի հուլիսից մինչև 2016թ-ի հոկտեմբերն արտասահմանցիներին աշխատանքի են վերցրել հանրային սննդի ոլորտում և պահել նրանց ծանր պայմաններում:
Բորիս Ս.-ն և Միրոսլավ Կ.-ն՝ հանցավոր սխեմայի կազմամկերպիչներն, օգտվում էին մարդկանց կրիտիկական ֆինանսական դրությունից, հավաքագրում նրանց Բելառուսում և Ուկրաինայում, այնուհետև տեղափոխում Լեհաստան՝ խոստանալով բարձր աշխատավարձով վստահելի աշխատանք:
Արտասահմանցիները, որոնք ծանոթ չեն եղել Լեհաստանի աշխատանքային օրենսդրությանը, ստիպված են եղել աշխատել Վարշավայի հանրային սննդի հաստատություններում ամսական 350 ժամ: Բազմաթիվ «տուգանքների» պատճառով նրանք աշխատավարձը ժամանակին և ամբողջ ծավալով չէին ստանում: Ընդ որում, այդ մարդիկ վախենում էին իրավապահ մարմիններին դիմել արդեն վաստակած գումարները չկորցնելու համար:
Բելառուսների և ուկրաինացիների վրա նաև հոգեբանական ճնշում է գործադրվել: Ոմանց ստիպել են պարտքով գումար ստանալու մասին ստացական ստորագրել, ինչը նրանց էլ ավելի է գցել ֆինանսական կախվածության մեջ: Մարդիկ ապրել են բանվորների համար նախատեսված հյուրանոցներում և Վարշավայի տարածքում մասնավոր բնակարաններում, որոնք վարձակալվել են հանցավոր սխեմայի կազմամկերպիչների կողմից: Այդ տարածքներում բնակարանային պայմանները քննիչները «սկանդալային» են անվանել: Բացի այդ, աշխատողների կյանքը մարդկանց վաճառքով զբաղվողների լիակատար վերահսկողության տակ է եղել:
Կասկածյալ Բորիս Ս.-ն ամբողջությամբ խոստովանել է իր մեղքը և բացատրել սխեման, որով աշխատել է կազմակերպությունը: Նա սկսել է աշխատել Միրոսլավ Կ.-ի ռեստորանում 2015թ-ին սկզբում որպես սովորական բանվոր: Այնուհետև Միրոսլավ Կ.-ն նրան առաջարկել է մյուս բանվորների «վերակացուն» լինել: Միրոսլավն իր մեղքը չի խոստովանում:
Կազմակերպիչներին մինչև 15 տարվա ազատազրկում է սպառնում:
Վերջին ժամանակները Վրաստանում նույնպես՝ և լրատվամիջոցներում, և սոցցանցերում, հաճախակի են դարձել Լեհաստան աշխատանքի մեկնած` խաբեյության զոհ դարձած վրացիների մասին հաղորդագրությունները:
Ապրիլի 2-ին «Ռուսթավի-2» հեռուստաընկերությունը սյուժե էր ցուցադրել Վրաստանի մի քանի քաղաքացիների մասին, որոնք միջնորդին վճարել են 1000-ից մինչև 1500 դոլար Լեհաստանում օրինական աշխատանքի տեղավորվելու համար: Սակայն տեղ հասնելուց հետո պարզել են, որ պայմանները չեն համապատասխանել խոստացածին, իսկ աշխատանքի դիմաց նրանց այդպես էլ չեն վճարել: Ռեպորտաժում խոսվում է, որ միջնորդը հրաժարվում է վերադարձնել գումարը — JAMnews:
