Իրակլի Կոբախիձեն` Վրաստանի վարչապետ․ կառավարության կազմը հաստատվել է

Իրակլի Կոբախիձեն՝ Վրաստանի նոր վարչապետ

Իրակլի Կոբախիձեն Վրաստանի նոր վարչապետն է։ Խորհրդարանը հաստատել է կառավարության նոր կազմը, որին կողմ է քվեարկել 84 պատգամավոր, դեմ՝ 10։ Նախարարների նոր կաբինետում փոխվել է միայն պաշտպանության նախարարը։ Ջուանշեր Բուրչուլաձեի փոխարեն նախարարության ղեկավար է դարձել Իրակլի Չիկովանին։ Ինչպես փետրվարի 1-ին հայտարարել էր Կոբախիձեն, ինքը՝ Բուրչուլաձեն է ցանկացել լքել պաշտոնն ու հեռանալ քաղաքականությունից՝ գործունեության այլ բնագավառ։

Վրաստանի նախագահ Սալոմե Զուրաբիշվիլին անմիջապես հրամանագիր է ստորագրել Իրակլի Կոբախիձեին վարչապետի պաշտոնում նշանակելու մասին՝ բացատրելով այս որոշումը նրանով, որ «բնական աղետների դեմ պայքարում որևէ խոչընդոտ չպետք է լինի, որպեսզի ակտերը ժամանակին ընդունվեն և հրատապ խնդիրներին արձագանք լինի»։

Երբ վարչապետ Իրակլի Կոբախիձեին հարցրել են, թե արդյոք պատրաստվում է այցելել վրաց-աբխազական և վրաց-օսական հակամարտությունների օկուպացիոն գիծ (ավելի վաղ նա ասել էր, որ օկուպացիոն գծում երբևէ չի եղել — JAMnews), Կոբախիձեն պատասխանել է, որ իր նոր կարգավիճակի բերումով անպայման պետք է լինի այնտեղ։

«Սա կարևոր նշանակություն կունենա երկրի առջև ծառացած խնդիրների լուծման համար»,- նշել է նա։

Կոբախիձեն նաև ասել է, որ իր համար չափազանց կարևոր են իշխող «Վրացական երազանք» կուսակցության պատվավոր նախագահ Բիձինա Իվանիշվիլիի խորհուրդները, քանի որ «նա քաղաքականության մեջ գրոսմայստեր է»։

«Նա կարող է նախապես հաշվարկել 10-15-20 քայլ: Այդպիսին են նրա հնարավորությունները քաղաքականության մեջ և ոչ միայն քաղաքականության մեջ, թեև խոսքս կոնկրետ քաղաքականության մասին է։ Ուստի, իհարկե, նրա խորհուրդները չափազանց կարևոր են մեզ համար»,- ասել է Կոբախիձեն։

Խորհրդարանական մեծամասնության անդամները շնորհակալություն են հայտնել Բիձինա Իվանիշվիլիին վարչապետի պաշտոնում Կոբախիձեի թեկնածությունն առաջադրելու համար։

Խորհրդարանական մեծամասնության ներկայացուցիչ Բեկի Օդիշարիան հայտարարել է, որ Կոբախիձեն հրաշալի է ղեկավարել իշխող «Վրացական երազանք» կուսակցությունը։ «Այսօր կուսակցությունն ընկերական ընտանիք է և պատրաստ է ցանկացած մարտահրավերի»,- ասել է պատգամավորը։

«Վրացական երազանքի» պատգամավոր Նինո Ցիլոսանին նույնպես բարձր է գնահատել Իրակլի Կոբախիձեի հնարավորությունները։ «Անձամբ նա ընդդիմության թիվ մեկ թիրախն էր։ Եվ եթե չլիներ նրա էմոցիոնալ կայունությունը, խելքն ու քաղաքական խորաթափանցությունը և, որ ամենակարևորն է, նրա հայրենասիրությունը, մեր խորհրդարանական թիմի համար դժվար կլիներ հաղթահարել այդ դժվարությունները»,- ասել է Ցիլոսանին։

• Վրաստանի վարչապետն ու իշխող կուսակցության նախագահը տեղերով կփոխվեն
• «Ճնշող և նվաստացուցիչ միջավայր». ԽԿԿ-ն գնահատել է Սաակաշվիլիի վիճակը «Վիվամեդ» կլինիկայում
• Պատմակա՞ն, թե՞ հերթական․ Երևանն ու Թբիլիսին հռչակագիր են ստորագրել

Իշխող «Վրացական երազանք» թիմի նախկին նախագահ Իրակլի Կոբախիձեն փետրվարի 1-ին է ներկայացվել որպես վարչապետի թեկնածու։ Համապատասխան որոշումը հրապարակվել է «Վրացական երազանքի» համագումարում։ Կոբախիձեի թեկնածությունն առաջադրել է «Վրացական երազանքի» պատվավոր նախագահ Բիձինա Իվանիշվիլին, որը համարվում է երկրի ստվերային կառավարիչը։

Կոբախիձեն վարչապետի պաշտոնում կփոխարինի Իրակլի Ղարիբաշվիլիին, որը պաշտոնը լքել է հունվարի 29-ին։ Ղարիբաշվիլին իր հերթին զբաղեցրել է կուսակցության նախագահի պաշտոնը։ Այսինքն՝ Ղարիբաշվիլին ու Կոբախիձեն փաստացի տեղերով փոխվել են։ «Վրացական երազանքի» անդամները միաձայն Ղարիբաշվիլիին ընտրել են կուսակցության նախագահ։

Համագումարի ավարտից հետո լրագրողների հետ զրույցում Կոբախիձեն ասել էր, որ Ղարիբաշվիլիի վարչապետության երեք տարիները «առանձնապես հաջող էին», ուստի նոր վարչապետը մտադիր չէ փոխել կառավարության կազմը։

Կառավարության 97 էջանոց ծրագիրը, որ հրապարակվել էր Կոբախիձեի կողմից, ընդգծում է չորս հիմնական ուղղություններ՝ արտաքին քաղաքականություն, տնտեսական զարգացում, սոցիալական ուղղություն և պետական ​​կառավարում։

Իրակլի Կոբախիձեն՝ Վրաստանի նոր վարչապետ