Իտալիա, Իրան և կորոնավիրուսի տարածման այլ կենտրոններ․ թվեր, վերլուծություն, կանխատեսումներ
Աշխարհում արագ տարածվող կորոնավիրուսը, որը Չինաստանում է հայտնաբերվել, տարածվել է Չինաստանի տասնյակ հազարավոր քաղաքացիների շրջանում և փետրվարի 28–ի դրությամբ ի հայտ եկել շուրջ 50 երկրներում։
Կորոնավիրուսի վիճակագրությունը փետրվարի 28–ի դրությամբ
Փետրվարի 28–ի դրությամբ՝ աշխարհում հաստատվել է կորոնավիրուսով վարակվելու 83, 774 դեպք։ Հիվանդաների բացարձակ մեծամասնությունը Չինաստանի Հուբեյ շրջանում է։ Մնացած 50 երկրներում մոտ 4,300 հիվանդ կա։
Այսօրվա դրությամբ՝ աշխարհում մահացել է 2,867 մարդ, ապաքինվել՝ 36,654–ը։ Աշխարհում հիվանդության տարածմանը կարելի է հետևել այս առցանց քարտեզով։
Աշխարհում գրանցված տվյալները փետրվարի 28–ի դորւթյամբ
Կորոնավիրուսի տարածման գլխավոր աղբյուրը Չինաստանից բացի Հարավային Կորեան է (2,337 հիվանդ), Իտալիան (655 հիվանդ) և Իրանը (338 հիվանդ)։
Իրան
Շատ մասնագետներ տագնապով են գնահատում վիճակագրությունը, որը ներկայացնում է Իրանը։ Մտավախություններ, որ թվերը շատ են նվազեցված, ունեն և տեղի բնակիչները, և այլ երկրները։
Իրանում վարակվել է մի քանի բարձրաստիճան պաշտոնյա, այդ թվում՝ Իրանի առողջապահության փոխնախարար Իրայ Հարիրչին, որը մինչ այդ վստահությամբ հերքում էր Ղոմ քաղաքի պատգամավոր Ահմադ Ամիրաբադի–Ֆարահանիի պնդումները։ Նա իշխանություններին մեղադրում էր երկրում կորոնավիրուսի տարածման մասշտաբների մասին ստելու մեջ։
Հաստատվել է նաև, որ կորոնավիրուսով վարակվել է Իրանի՝ կանանց և ընտանիքի հարցերով փոխնախարարն ու մեջլիսի ազգային անվտանգության հարցերով կոմիտեի ղեկավարն ու կառավարության մի քանի այլ անդամներ։ Տեղի IRNA գործակալությունը հաղորդել է, որ կորոնավիրուսից մահացել է Վատիկանում Իրանի նախկին դեսպան Խադի Խոսրոուշահին։
Իրանը դարձել է հարևան երկրներում կորոնավիրուսի տասնյակ դեպքերի աղբյուր, այդ թվում՝ Վրաստանում և Ադրբեջանում։ Այդ ցուցակում է նաև Աֆղանստանը, Բահրեյնը, Իրաքը, Քուվեյթը, Օմանն ու Պակիստանը։
Իրանի հարևաններից շատերը ժամանակավորապես փակել են նրա հետ սահմաններն, այդ թվում՝ Հայաստանն ու Վրաստանը։
Իտալիա
Իտալիայում արտակարգ միջոցառումներ են իրականացվել՝ վարակի հետագա տարածումը կանխելու համար։
Կարանտինի մեջ է 11 քաղաք երկրի հյուսիսում, որոնք համաճարակի կենտրոնում են հայտնվել։ Այնտեղ ընդհանուր առմամբ ապրում է մոտ 55 հազար մարդ։ Այնտեղ փակ են դպրոցները, համալսարաններն ու կինոթատրոնները, չեղարկվել են հանրային միջոցառումները։
Մի քանի երկրներ՝ Ալժիրը, Դանիան, Ռումինիան և Իսպանիան, իսկ փետրվարի 28–ին նաև Վրաստանը հաղորդել են իրենց տարածքում Իտալիայի հետ կապված դեպքերի հայտնաբերման մասին։
Իտալիայի իշխանությունները նախկինի պես չեն կարող հստակ ասել, թե ինչպես է կորոնավիրուսը հայտնվել երկրում։
Չինաստան
Չինաստանում կոշտ կարանտինը սկսում է արդյունք տալ․ այստեղ նվազում է հիվանդների և մահացածների թիվը։ Ընթացիկ շաբաթվա մեջ թվերը հարյուրներով, այլ ոչ թե հազարներով են հաշվվում, ինչպես փետրվարի սկզբին–կեսերին էր՝ բռնկումից հետո։
Երկրներ, որտեղ առաջին անգամ են հիվանդներ հայտնվել
Փետրվարի 24–ին սկսված շաբաթվա ընթացքում եվրոպական երկրներից Ավստրիան, Խորվաթիան, Հունաստանը, Նորվեգիան, Շվեյցարիան, Բելառուսը, Վրաստանն, Ադրբեջանն ու Հյուսիսային Մակեդոնիան հաղորդվել են իրենց տարածքում հիվանդության առաջին դեպքի մասին։
Բրազիլիան հայտարարել է Լատինական Ամերիկայում հիվանդության առաջին դեպքի մասին։
Աֆրիկայում առաջին դեպքերը հաստատվել են Ալժիրում, Եգիպտոսում և Նիգերիայում։
Առաջին վարակվածի մասին է հաղորդել նաև Նոր Զելանդիան։
Իսպանիան, Ֆրանսիան և Գերմանիան հայտարարել են վարակվածների նոր դեպքերի մասին։
•Ադրբեջանում գրանցվել է կորոնավիրուսով վարակվելու առաջին դեպքը
•Կորոնավիրուսի երկրորդ դեպքը Վրաստանում։ Վարակը հայտնաբերվել է Իտալիայից ժամանած երիտասարդ կնոջ մոտ
•Թե ինչպես են օգնում հազարավոր ընտանի կենդանիներին, որոնց լքել են համաճարակի գոտում
Ի՞նչ սպասել
Առողջապահության համաշխարհային կազմակերպությունն իրավիճակը դեռևս գլոբալ համավարակություն չի հայտարարել։ Սակայն խոսում է «գլոբալ սպառնալիքի» մասին և բոլոր երկրների իշխանություններին զգուշացնում կանխարգելիչ միջոցների և լուրջ պատրաստվածության անհրաժեշտութան մասին։
Համաշխարհային տնտեսության կորուստները կորոնավիրուսից կանխատեսվում են 1 տրլն դոլար միայն 2020 թ–ին։
Արդեն չեղարկվել է Բարսելոնում անցկացվելիք համաշխարհային համակարգչային համաժողովն, Իտալիայի և Իռլանդիայի միջև ռեգբիի խաղը։ Սպառնալիքի տակ է Ճապոնիայում նախատեսված ամառային Օլիմպիադան:
Միաժամանակ մասնագետները հիշեցնում են, որ կորոնավիրուսը պակաս վտանգավոր է, քան «թռչնի» և «խոզի» գրիպն ու ատիպիկ թոքաբորբը։ Երբեմն հիվանդությունը կարող է ընթանալ նույնիսկ առանց վառ արտահայտված ախտանիշների։
Մասնագետները, սակայն, ասում են, որ դա իր մինուսն ունի․ շատ հիվանդների մոտ ախտանիշների բացակայությունը դժվարացնում է նրանց իրական թվի պարզումը։
