TI․«Georgian Airways»-ը մասնակցել է Իվանիշվիլիի նախկին խորհրդականի առևանգմանը
Իվանիշվիլիի նախկին խորհրդականի առևանգումը
Transparency International Georgia (TI)-ն հրապարակել է Գիորգի Բաչիաշվիլիի առևանգման իրավական գնահատականը։ Բաչիաշվիլին Համաներդրումային հիմնադրամի նախկին նախագահն է և Վրաստանի ոչ պաշտոնական կառավարիչ Բիձինա Իվանիշվիլիի նախկին խորհրդականը: Փաստաթղթի համաձայն՝ առևանգմանը մասնակցել է «Georgian Airways» ավիաընկերությունը:
Հավանական է, որ Գիորգի Բաչիաշվիլին Վրաստան է տեղափոխվել մայիսի 26-ին ընկերության VIP չվերթով: Զեկույցում նաև մատնանշվում են «Georgian Airways»-ի կապերը «Վրացական երազանք»-ի կառավարության և Ռուսաստանի հետ:
2025 թվականի մայիսի 27-ին հայտնի դարձավ Գիորգի Բաչիաշվիլիի ձերբակալության մասին, ով եղել է Բիձինա Իվանիշվիլիի նախկին խորհրդականը ֆինանսական հարցերով և Համաներդրումային հիմնադրամի նախկին ղեկավարը: Բաչիաշվիլին ձերբակալվել է Վրաստանի Պետական անվտանգության ծառայության (ՊԱԾ) կողմից վրաց-հայկական սահմանի մոտակայքում՝ մինչև 42 միլիոն դոլարի յուրացման մեղադրանքով:
Բաչիաշվիլիի միջազգային փաստաբանները պնդում են՝ նրան բռնի կերպով վերադարձրել են Վրաստան, իսկ ձերբակալությունը պայմանավորված է Վրաստանի դե ֆակտո կառավարիչ Բիձինա Իվանիշվիլիի անձնական վրեժով:
Բաչիաշվիլիի դեմ գործը հարուցվել է 2023 թվականին՝ Բիձինա Իվանիշվիլիի դիմումի հիման վրա: Դատախազությունը նրան մեղադրել է մինչև 40 միլիոն դոլարի կրիպտոարժույթ յուրացնելու մեջ: 2023 թ․-ի հուլիսի 6-ին Թբիլիսիի քաղաքային դատարանը Բաչիաշվիլիի նկատմամբ խափանման միջոց է ընտրել 2,5 միլիոն լարի գրավի վճարումը:
2025 թ․-ի մարտի 2-ին Գիորգի Բաչիաշվիլին գաղտնի կերպով լքել է Վրաստանը: Դատախազությունը նրա նկատմամբ հետախուզում է հայտարարել: 2025 թ․-ի մարտի 10-ին Թբիլիսիի քաղաքային դատարանը հեռակա 11 տարի ազատազրկման է դատապարտել Գիորգի Բաչիաշվիլիին՝ կրիպտոարժույթի գործով: Իվանիշվիլիի նախկին գործընկերը մեղավոր է ճանաչվել «խոշոր գումարների յուրացման» և «ապօրինի եկամուտների օրինականացման» մեջ:
Ի՞նչ է ասված զեկույցում
«Բաչիաշվիլիի խոսքով՝ իրեն առևանգելու և Վրաստան տեղափոխելու հատուկ գործողությանը մասնակցել է նաև «Georgian Airways» ավիաընկերությունը: Բաչիաշվիլին նույնիսկ անվանել է վերոնշյալ ընկերությանը պատկանող ինքնաթիռի տեսակը՝ Bombardier: Հենց դրանով են, ըստ նրա, իրեն բերել Վրաստան: Ավիաընկերությունը, իհարկե, դա չի հաստատում: Այնուամենայնիվ, bm.ge պարբերականի տվյալներով, որը հիմնվում է ռադիոլոկացիոն տվյալների վրա, մայիսի 26-ին Գրինվիչի ժամանակով 12:39-ին (կամ տեղական ժամանակով 15:23-ին) Աբու Դաբիում է վայրէջք կատարել «Georgian Airways»-ի VIP ինքնաթիռ: Ինքնաթիռի 4L-TGB նավիգացիոն հաղորդիչն անջատված է եղել թռիչքի 2/3-ի ընթացքում և միացվել է միայն Պարսից ծոցի վրայով վայրէջքից 20 րոպե առաջ:
Համապատասխանաբար, հանրամատչելի տվյալների բազայում բացակայում է տեղեկատվությունն այն մասին, թե ինքնաթիռը որ երկրից է թռչել: Գրինվիչի ժամանակով 14:25-ին (կամ տեղական ժամանակով 18:25-ին) ինքնաթիռն օդ է բարձրացել և կրկին անջատել է իր նավիգացիոն հաղորդիչը Պարսից ծոցի վրա, ուստի անհայտ է, թե որտեղ է այն վայրէջք կատարել: Այս ոչ ամբողջական, բայց բավարար տեղեկատվական տվյալները թույլ են տալիս անել հիմնավոր ենթադրություն, որ իր առևանգման ապօրինի հատուկ գործողության մեջ «Georgian Airways»-ի մասնակցության մասին Բաչիաշվիլիի տեղեկությունը կարող է ճիշտ լինել:
«Georgian Airways» ավիաընկերության հնարավոր ներգրավվածությունը այս ապօրինի գործողության մեջ անսպասելի չէ՝ հաշվի առնելով նրա կապերը «Վրացական երազանք»-ի կառավարության և Ռուսաստանի հետ:
2023 թվականի հուլիսին Ուկրաինայի իշխանությունները պատժամիջոցներ են սահմանել «Georgian Airways» ընկերության և նրա հիմնադիր Թամազ Գայիաշվիլիի դեմ: Պատժամիջոցների տակ է հայտնվել նաև Թամազի եղբայր Դավիթ Գայիաշվիլին, որին պատկանում է «Georgian Airways»-ի 80 տոկոսը: Պատժամիջոցների պատճառը «Georgian Airways» ավիաընկերության՝ դեպի Ռուսաստան թռիչքներն են, որոնք մեկնարկել են 2023 թվականի մայիսին՝ այն բանից հետո, երբ Կրեմլը վերացրեց Վրաստան ուղիղ թռիչքների արգելքը: Թամազ Գայիաշվիլին հրապարակավ ողջունել է Վլադիմիր Պուտինի որոշումը՝ վերականգնել Ռուսաստանի և Վրաստանի միջև ուղիղ օդային հաղորդակցությունը: Ուկրաինայի ընկերության դեմ պատժամիջոցներ սահմանելու որոշման մեջ նաև նշվում է, որ Գայիաշվիլի ընտանիքին պատկանող ընկերությունները Վրաստանում ծառայություններ են մատուցում ռուսական «Azimut» և «Red Wings» ավիաընկերություններին:
2023 թվականի մայիսի 20-ին Վրաստանի նախագահ Սալոմե Զուրաբիշվիլին հայտարարել էր «Georgian Airways»-ը բոյկոտելու մասին՝ ասելով. «Դա ընկերություն է, որն անընդհատ օգտագործում է երկրում ստեղծված իրավիճակը իր հարստացման համար: Այդպես է եղել բոլոր կառավարությունների ժամանակ, այդպես էր նաև Covid-ի ժամանակաշրջանում, իսկ այժմ այն ուզում է օգտագործել նոր իրականությունը, ինչն անընդունելի է մեր բնակչության շատ մեծ մասի համար: Ես չեմ բարձրանա նրանց ինքնաթիռ, որպեսզի չհարստացնեմ ընկերությանը, որը հանուն փողի պատրաստ է ամեն ինչի»: Թամազ Գայիաշվիլին իր հերթին Սալոմե Զուրաբիշվիլիին անցանկալի անձ էր հայտարարել և սահմանափակել նրա հասանելիությունը ընկերության ծառայություններին:
2025 թվականի փետրվարի 12-ին Եվրախորհրդարանն ընդունել էր բանաձև՝ Եվրոպայի խորհրդին և անդամ երկրներին կոչ անելով պատժամիջոցներ սահմանել Թամազ Գայիաշվիլիի նկատմամբ:
Մարդկանց ուրիշ երկրի տարածքից առևանգելու պրակտիկան սովորական երևույթ է ավտորիտար և բռնապետական պետությունների պատմության մեջ: Վրաստանում դա առաջին անգամ տեղի ունեցավ ադրբեջանցի լրագրող Աֆղան Մուխթարլիի հետ, ինչը հանգեցրեց միջազգային արձագանքի և, ի վերջո, Ստրասբուրգի դատարանի որոշման:
Բաչիաշվիլիի գործը, ըստ էության, այս կործանարար պրակտիկայի շարունակությունն է: Վրաստանի անվտանգության ծառայության վարկածը համոզիչ չէ: Այն մարդը, ում բանտում մահով են սպառնացել, ով ստիպված է եղել այլ երկիր փախչել Իվանիշվիլիի «արդարադատությունից», դժվար թե որոշեր զբոսնել վրացական սահմանի մոտակայքում:
Անհանգստություն է առաջացնում այն փաստը, որ Իվանիշվիլիի ապօրինի գործունեության ծավալները վրացական սահմաններից և իրավազորությունից դուրս են: Իր անձնական ընդդիմախոսի նկատմամբ վրեժի համար նա ապօրինի գործողությունների մեջ է ներգրավել ոչ միայն Վրաստանի պետական կառույցներին, այլև օտար պետությունների հատուկ ծառայություններին, ինչպես նաև մասնավոր ընկերություններին»,- ասված է Transparency International-ի իրավական գնահատականում:
Հետևեք մեզ — Facebook | Youtube | Telegram
Իվանիշվիլիի նախկին խորհրդականի առևանգումը
