«Իր երրորդ գալստյամբ Իվանիշվիլին «գերազանցեց» նույնիսկ Քրիստոսին»․ վրացի քաղաքագետ
Իվանիշվիլիի երրորդ վերադարձը
«Վրացական երազանք» կուսակցության հիմնադիր Բիձինա Իվանիշվիլին «գերազանցեց նույնիսկ Քրիստոսին»՝ ժողովրդին ներկայանալով իր «երրորդ գալստյամբ», երբ պարզվեց, որ նա է գլխավորում ընտրական ցուցակը, որով կուսակցությունը մտադիր է մասնակցել 2024 թվականի հոկտեմբերի 26-ին Վրաստանում կայանալիք խորհրդարանական ընտրություններին։ Վրացի քաղաքագետ Գիա Խուխաշվիլիի կարծիքն է։։
«Սակայն Իվանիշվիլին պատգամավոր դառնալու որոշումը չի կայացրել լավ կյանքից»- ասել է Խուխաշվիլին վրացական Interpressnews գործակալությանը տված հարցազրույցում։
Սեպտեմբերի 10-ին իշխող «Վրացական երազանք» կուսակցությունը ներկայացրել է իր ընտրական ցուցակի առաջին քսանյակը։ Ցուցակը գլխավորում է «Վրացական երազանքի» հիմնադիր և պատվավոր նախագահ Բիձինա Իվանիշվիլին։ Ցուցակում ընդգրկվել են նաև երկու օլիմպիական չեմպիոններ։
Մեկնաբանություն
Գիա Խուխաշվիլի
«Բիձինա Իվանիշվիլիի՝ ցուցակում առաջին համարով առաջադրվելն ունի թե՛ ռացիոնալ, թե՛ իռացիոնալ բացատրություն։
Ռացիոնալ բացատրությունն այն է, որ նա ընտրություններում «Երազանքի» հաղթանակի իրական հույս չունի։ Ուստի նա, հնարավոր է, ստիպված լինի որևէ մեկի հետ կոալիցիա ձևավորել, և կարևոր է, որ այդ բանակցություններում ունենա գործողությունների լիարժեք սպեկտր։ Հնարավոր է՝ նա ստիպված լինի վռնդել երկու Իրակլիներին («Վրացական երազանքի» նախագահ Իրակլի Ղարիբաշվիլիին և վարչապետ Իրակլի Կոբախիձեին— JAMnews), և դա լինի ընտրություններից հետո կոալիցիա ձևավորելու պայմաններից մեկը։
Պոտենցիալ գործընկերոջ հետ հարաբերություններում Իվանիշվիլին պետք է անաչառություն ցուցաբերի։ Նա պետք է հարմարավետ զգա որոշումներ կայացնելիս։ Եթե առաջին համար նշանակված լիներ մեկ ուրիշը, դա անհնար կդարձներ նման մանևրը, քանի որ ընդդիմությունից ոչ ոք բանակցություններ չի վարի ո՛չ Կոբախիձեի, ո՛չ Ղարիբաշվիլիի հետ։
Բացի այդ, նա հասկանում է, որ իրեն անհրաժեշտ է քաղաքական անձեռնմխելիություն, և այդ պատճառով մասամբ օրինականացնում է իր դերը, քանի որ որոշակի մտահոգություններ ունի իր ապագայի վերաբերյալ։
Եվ սա արդեն իռացիոնալ բացատրություն է և շատ տխուր պատմություն՝ Իվանիշվիլիի երրորդ գալստյան պատմությունը։ Կարելի է ասել, որ նա գերազանցեց նույնիսկ Քրիստոսին։ Բայց նա դա լավ կյանքից չէ, որ անում է։ Սա հարկադրված և անհարմար քայլ է նրա համար։
Վարչապետ ընտրվելուց ընդամենը մեկ տարի անց՝ 2013 թվականին քաղաքականությունից առաջին անգամ պաշտոնապես հեռանալուց հետո Բիձինա Իվանիշվիլիին սկսեցին մեղադրել իշխող «Վրացական երազանք» կուսակցությունը «կուլիսներից» վերահսկելու մեջ։
Բիձինա Իվանիշվիլին արդեն երկու անգամ հայտարարել է քաղաքականությունից հեռանալու մասին՝ 2013-ին և 2021 թվականներին, և ամեն անգամ վերադարձել է։ Սա նրա երրորդ վերադարձն է։
Ենթադրում եմ, որ ապագայում նա կհավակնի նախագահի պաշտոնին, քանի որ նախագահի կարգավիճակը և սահմանադրական ձևաչափը նրան հարմար են. դա անձեռնմխելիություն է տալիս, բայց միևնույն ժամանակ չի պարտավորեցնում նստել գրասենյակում և շուրջօրյա ռեժիմով աշխատել։
Ինչ վերաբերում է «Երազանքի» ցուցակին ընդհանուր առմամբ, այն աղետալի թույլ է։ Ըստ երևույթին, տարբեր ոլորտներից հայտնի անձանցից ոչ ոք չի համաձայնել, և հույսը մնացել է երկու մարզիկների վրա։
Բացի այդ, ինչո՞ւ է ցուցակը բաղկացած 20 հոգուց, եթե նրանք հավակնում են սահմանադրական մեծամասնության։ Ինչո՞ւ ոչ 50 հոգի։ Սա ցույց է տալիս, որ նրանք առայժմ քիչ հույսեր ունեն, որ խորհրդարան կանցնեն երկար ցուցակով»։
