Իվանիշվիլին չխուսափեց պատժամիջոցներից, ի՞նչ կլինի նրա շրջապատի հետ. կարծիք
Իվանիշվիլիի դեմ պատժամիջոցները հարվածելու են Վրաստանի իշխանությանը
«Վրաստանի ոչ պաշտոնական կառավարիչ, օլիգարխ Բիձինա Իվանիշվիլիի դեմ ԱՄՆ ֆինանսների նախարարության պատժամիջոցները հարվածելու են ոչ միայն իրեն։ Սա փլուզում է իշխանության համար, որը նա կառուցել է տարիներ շարունակ»,- գրում է քաղաքական մեկնաբան Դավիթ Զուրաբիշվիլին։
ԱՄՆ-ը ֆինանսական պատժամիջոցներ է սահմանել Բիձինա Իվանիշվիլիի դեմ դեկտեմբերի 27-ին։ Այն ներառված է OFAC-ի ցանկում՝ որպես Ռուսաստանի դեմ պատժամիջոցների փաթեթի մաս: ԱՄՆ-ում Իվանիշվիլիի ողջ ունեցվածքն ու ակտիվները, այդ թվում՝ այլ անձանց/ԱՄՆ քաղաքացիների կողմից վերահսկվողները, սառեցվելու են։
Մեկնաբանություն
Քաղաքական մեկնաբան Դավիթ Զուրաբիշվիլի. «Ես չգիտեմ, թե որքանով էր Բիձինա Իվանիշվիլին պատրաստ ամերիկյան գանձապետարանի պատժամիջոցներին։ Կարծում եմ՝ ավելի հավանական է, որ պատրաստ չէր, քան պատրաստ էր, չնայած դրանում վստահ լինել չեմ կարող:
Բայց այդ փաստը նրան այնքան ուժեղ չի հարվածի, որքան այն իշխանությանը, որը նա կառուցել է երկար տարիներ։
Բիձինա Իվանիշվիլին տիպիկ ավտորիտար առաջնորդ չէ՝
- Նա չի զբաղեցնում պետական ամենաբարձր պաշտոնը։
- Նա չունի սեփական ուժային կառույց։ Ինչպես, օրինակ, «մահվան ջոկատները» կամ Իսլամական հեղափոխության պահապանների կորպուսը։ Այսինքն՝ նա չունի ուժային կառույց, որն ավելի ուժեղ կլիներ, քան մյուսները։
- Նա որևէ ազդեցիկ շրջանակի կամ խմբի ներկայացուցիչ չէ, ինչպիսին է Մադուրոն Վենեսուելայում (թմրանյութերի մաֆիա, նավթային հատված) կամ Պուտինը (ԿԳԲ):
Մինչ այժմ Իվանիշվիլիի իշխանությունը հիմնված էր պետական ինստիտուտների մանիպուլյացիայի վրա։ Այն ամրապնդվում և սնվում էր նրա ամենակարողության հավատով: Շատերը հավատում էին, որ Բիձինան ամեն ինչ մտածել է, ամեն ինչից գլուխ կհանի, բոլորին կգերազանցի և բոլորին իրենց տեղը կդնի։
Ամերիկյան պատժամիջոցներն այժմ լրջորեն խաթարում են այս համոզմունքը։
Ի վերջո, Իվանիշվիլին իր ողջ շրջապատին վստահեցրել էր, որ պատժամիջոցներ չեն լինի։ Նա բոլորին վստահեցրել էր, որ երբ Թրամփը գա իշխանության, Ուկրաինայում պատերազմը կավարտվի, և ամեն բան կկարգավորվի։
Նա իր նախընտրական ելույթներում ուղղակիորեն ասել էր. «Ես հո խելագար չեմ, որ առանց ամեն ինչ հաշվարկելու նման քայլեր անեմ»։
Ուրեմն հիմա ի՞նչ: Եթե ինքը՝ Բիձինան, չկարողացավ խուսափել պատժամիջոցներից, ի՞նչ կլինի նրա շրջապատի հետ։ Հիմա ո՞ւմ վրա պետք է հույս դնեն։ Կշարունակե՞ն հավատալ, որ իրենց կպաշտպանի մեկը, ով չի կարողացել պաշտպանել ինքն իրեն։
Իսկ նրանք կորցնելու բան ունեն։
Նման տրամադրությունները կարող են լուրջ վտանգ դառնալ իշխանության համար և ամենակարճ ժամկետում քանդել այն համակարգը, որը նա կառուցում է տարիներ շարունակ։
Կարծում եմ, որ հիմա Բիձինան կփորձի ամեն ինչ բարդել Բայդենի վրա և կասի, որ Թրամփի երդմնակալությունից հետո ամեն ինչ կփոխվի։ Բայց ես ուզում եմ ասել նրան և նրա բոլոր համախոհներին՝ ի դժբախտություն ձեզ, Թրամփի իշխանության գալուց հետո ավելի վատ կլինի։ Այս պատժամիջոցներին կավելանան նորերը, իսկ լավագույն դեպքում ամեն ինչ կմնա այնպես, ինչպես հիմա է:
Եթե, իհարկե, հրաշք տեղի չունենա, ու հանկարծ Բիձինան հանդես չգա նոր խորհրդարանական ընտրությունների անցկացման օգտին, իսկ ինքն էլ ամբողջությամբ հեռանա քաղաքականությունից։
Այդ դեպքում հնարավոր է, որ նրա նկատմամբ պատժամիջոցները վերանայվեն»։
